Mini’ e Ma Rung’ag e Meybil?

FAANRA bay be’ ni ma rung’ag e meybil ma susun ir e En Tasunmiy. Goo Got e rayog ni nge nang e tafinay rodad ya ir e ke sunmiy e girdi’. Ma goo Got e ra fulweg taban e meybil ko girdi’ ma ma pi’ e tin nib t’uf rorad. Machane, ga ra lemnag, ‘Ba puluw ni nge mich e En Tasunmiy u wan’dad, fa?’

Boor e girdi’ ni yad be lemnag nrayog ni nge mich e en Tasunmiy u wan’um ni faanra ngam togopuluw ko pi n’en ni be yog girdien e science e ngiyal’ ney. Machane, n’en ni be lemnag e girdi’ ni michan’ ngak Got e ba togopuluw ko science ma re n’ey e de riyul’. Mu lemnag e pi n’en ni baaray.

◼ Dawori n’uw nap’an, ma kan nang ni u fithik’ 1,646 e sensey ko 21 e skul nib tolang u Meriken, ma kemus ni sogonap’an 550 e ka rogned nde “mich Got u wan’rad.”

Bin riyul’ riy, e boor girdien e science ni yad be lemnag ni bay e Got.

Pi N’en ni Be Micheg ni Bay e En Tasunmiy

Ra mich u wan’dad ni bay e Got nyugu aram rogon ndariy e mich riy, fa? Danga’. Gathi riyul’ e n’en ni be lemnag e girdi’ ni michan’ e be yip’ fan ni ke mich ban’en u wan’ be’ ndariy e mich riy. Bible e be yog nra “nge michan’dad ma aram e ke pagan’dad ko pi n’en ni ir e ke l’agan’dad ngay, ma ke michan’dad ko pi n’en ndarid guyed nga owchedad.” (Hebrews 11:1) Bod ni dabiyog ni ngam guy e nifeng, machane rayog ni ngam guy e n’en ni ma rin’ u nap’an ni be mithmith yuwan e gek’iy, ma aram e ra mich u wan’um ni bay e nifeng. Maku arrogon e En ma Fulweg taban e meybil rodad ni dabiyog ni ngad guyed, machane rayog ni ngad guyed e mich riy nra ayuwegdad ngad nanged ni ba’.

Uw e rayog ni ngad pirieged e mich riy ni bay Got? Kemus ni ngad guyed toobdad. Be yog e Bible ni gaar: “Urngin e naun ma mmudugil ni ba’ be’ ni ir e toy mi Got e ir e ke sunumeg urngin ban’en.”  (Hebrews 3:4) Gur, ba fel’ u wan’um e pi thin ney? Sana nap’an ni ga ra lemnag feni ba yaram e pi n’en ni bay u palpalth’ib, nge murung’agen e en ni ir e ma yib e yafas rok, nge rogon ni kan fal’eg e man’ey ko girdi’, e rayog ni nga mog nriyul’ ni bay be’ ni kab tolang ngak e girdi’.

Machane pi n’en ni ke sunmiy Got e dabiyog ni nge fil ngodad urngin ban’en u murung’agen Got. Gad ra yaliy e pi n’en ni ke sunmiy Got ma bod ni gad be rung’ag lingan ay be’ ni be yib ko mab nib man. Ga manang ni bay be’ machane dawor mu nang ko mini’. Rayog ni ngam nang ni faanra ngam bing fare mab. Ba t’uf ni ngad rin’ed ban’en ni aram rogon ma rayog ni ngad nanged ko mini’ e En ke sunmiy urngin ban’en.

Bible e rayog ni ngan taareb rogonnag ko fare mab. Faanra ngam pithig e Bible ma ngam fil murung’agen e pi yiiy nge rogon ni ke lebug ma rayog ni ngam guy e mich riy nriyul’ ni bay Got. * Maku thin nu Bible ni be weliy murung’agen e n’en ni ke rin’ Got ngak e girdi’ kakrom e be m’ug riy e ngongol rok nib fel’.

Uw Rarogon e En Ma Fulweg Taban e Meybil?

Ke tamilangnag e Bible murung’agen e En ma Fulweg taban e meybil ni ir be’ nrayog ni ngam nang. Riyul’ ni kemus ni be’ e rayog ni nge motoyil nga ban’en ma ra nang fan. Be yog e Bible ni gaar: “Ga be fulweg taban e meybil. Urngin e girdi’ e ngar bad ngom.” (Psalm 65:2) Ma rung’ag e meybil rok e piin nib mich Got u wan’rad. Got e bay fithingan, ya be yog e Bible ni gaar: “Ma par Jehovah nib palog rok e piin nib kireb, machane ma rung’ag e meybil rok e piin nib mat’aw.”​—Proverbs 15:29, NW.

 Rayog ni nge thamiy Jehovah ban’en ni bod gadad. “Gadad ba t’uf” rok Got ma yibe pining e “Got nib felfelan’” ngak. (2 Korinth 13:11; Psalm 104:31) Nap’an ni ke yoor e piin nib kireb u fayleng me yog e Bible u murung’agen Got ni gaar: “Me par ni kari kolngan’ riy.” (Genesis 6:5, 6) Gathi riyul’ e n’en ni ma yog e girdi’ ni Got e ma k’aring e gafgow ni bochan e nge skengnag e girdi’. Be yog e Bible ni gaar: “I Got, ni Gubin ma Rayog rok e der ma rin’ e kireb.” (Job 34:12, BT) Machane, sana ga ra lemnag, ‘Faanra Got e ir e En Tasunmiy ni gubin ma rayog rok, ma mang fan ni ke pag ni nga i yib e gafgow ngodad?’

Ke pag Jehovah e girdi’ ni ngar fanayed e puf rogon ni kan pi’ ngorad, ma re n’ey e be fil ngodad ban’en u murung’agen Got. Gur, gathi ba ga’ fan u wan’dad nrayog ni ngad turguyed ban’en ni gad baadag ni ngad rin’ed? Machane, boor e girdi’ nib kireb rogon ni kar fanayed e puf rogon ni kan pi’ ngorad ma wenegan riy e kar gafgownaged yad nge boch e girdi’. Chiney e bay reb e deer ni ngad lemnaged nib fel’ rogon: Uw rogon nra chuweg Got e gafgow ndabi kirebnag e puf rogon ni ke pi’ ngak e girdi’? Gad ra weliy murung’agen e re deer ney ko bin migid e thin.

[Footnote]

[Box on page 5]

Be Maruwaran’um ni Bay e Got Ya Bochan e Kireb ni Ma Rin’ Girdien e Teliw?

Teliw e ma k’aring e girdi’ ni nge maruwaran’rad ko bay e Got ni ma Fulweg taban e meybil fa dariy. Bochan ni girdien e teliw e yad ma un ko mahl, nge terrorism, ma yad ma pag ni ngaun gafgownag e bitir, ma aram fan ni mus ko girdi’ ni yad ma meybil ku Got e yad ma yog ni “De mich Got u wan’rad.”

Mang fan nib ga’ ni teliw e ma k’aring e kireb? Ya girdi’ nib kireb e yad ma rin’ e tin nib kireb u fithingan e teliw rorad. Be yog e Bible ni bay gelngin ban’en nra gagiyegnag e Kristiano ngar fanayed e re n’ey nib togopuluw ko tin nib m’agan’ Got ngay. Ke yog apostal Paul ngak e piin piilal ni Kristiano ni gaar: “Bayi taw nga ba ngiyal’ me ban boch e girdi’ ko biromed e ulung nga rogned e tin nde riyul’ ngar pow’iyed e piin ni ke mich Jesus u wan’rad nga bang ngar uned ngorad.”​—Acts 20:29, 30.

Ke dabuy Got e teliw ni googsur. Thin rok Got e be yog ni yira “gechignagrad ni bochan e ni pirieg rachaen e pi profet nge girdien Got u lan; er rogon, ni rachaen urngin e piin ni kan li’rad u fayleng.” (Revelation 18:24) Bochan ni pi yurba’ i teliw ni googsur e de yog rorad ni ngar filed ko girdi’ murung’agen Got ni ma t’ufegey, ma aram e kar denengad nib togopuluw ngak Got.​—1 John 4:8.

Fare Got ni ma Fulweg taban e meybil e be runguy e piin ni be gafgownagrad e pi yurba’ i teliw ni googsur. Dabki n’uw nap’an ma t’ufeg rok Got ngak e girdi’ e ra k’aring ni nge pufthinnag urngin e pi teliw ni googsur u daken Jesus. I yog Jesus ni gaar: “Ma ra yan i taw ko Chirofen nem ma boor e girdi’ e ra gaar ngog, Somol, Somol! U daken fithingam e ug weliyed e thin rok Got riy ngak e girdi’, . . . Ma aram e bay lungug ngorad, Ri da gu nangmed. Mu chuwgad rog, gimed e piin ni gimed ma rin’ e kireb!”​—Matthew 7:22, 23.