Mu Chugur Ngak Got ni Ma Fulweg Taban e Meybil

BOOR e girdi’ ni yad ma yog ni ke mich Got u wan’rad e dabiyog ni ngar weliyed fan e michan’ rorad. Maku dabiyog ni ngar weliyed fan ni girdien e teliw e ba ga’ ni ma rin’ e tin nib kireb nge fan ni ke pag Got e gafgow. N’en nrayog ni ngar rin’ed e yad ma meybil ngak Got ndarur nanged ko ir mini’.

Machane riyul’ nrayog ni ngam chugur ngak Got. Rayog ni nge gel e michan’ rom ni faan ga ra nang fan u murung’agen Got ya ireray e n’en nra ayuwegem ni nge t’uf rom. Ra gel e michan’ rom ngak Got ni faanra bay e mich riy. (Hebrews 11:1) Faanra kam nang e tin riyul’ u murung’agen Got, ma rayog ni ngam non ngak me mang fager rom. Mu lemnag e n’en ni buch rok boch e girdi’ ni kafram e yad ma meybil ni yugu aram rogon ni i maruwaran’rad ko bay e Got fa dariy.

◼ Patricia, ir faen ni kan weliy murung’agen ko bin som’on e article. “Reb e rran ni gu bay u fithik’ e pi fager rog ni sogonap’an yad ragag ni yad be weliy murung’agen e teliw. Ku gog ngorad ni kug chuw ko naun romad, ya papa’ rog nde mich Got u wan’ nge reb e Mich Rok Jehovah e yow be maluagthin, ere kug mil rorow. Reb ko fapi fager rog e yog ni gaar: ‘Sana Pi Mich Rok Jehovah e yad e sororad.’

“Me fulweg bagayad ni gaar: ‘Ere mang fan ndab da uned nga reb e pi muulung rorad ma gad nang?’ Ma ireray e n’en ni kug rin’ed. Yugu aram rogon ni be maruwaran’mad, ma boch i gamad e ka yad be ulul i un ko muulung ya bochan ni Pi Mich Rok Jehovah e yad ba gol.

“Machane, reb e Madnom ma kug rung’ag ban’en ni ke thilyeg e lem rog. Faen ni be pi’ e welthin e ke weliy ko mang fan ni ma yib e gafgow ngak e girdi’. Kafram e da gu nang ni fa bin som’on e girdi’ e kan sunmiy nib flont machane ke denen, me af e denen nge yam’ ngak urngin e girdi’ ni bochan taa be’. Miki weliy nib t’uf e yam’ ni tay Jesus ya ngan sulweg ngak e girdi’ e pi n’en ni ke mul u pa’rad ni bochan Adam. * (Roma 5:12, 18, 19) Chingiyal’ nem ma kug nang fan. Ku gog u lanin’ug ni lungug, ‘Riyul’ ni bay e Got ni be lemnag rarogodad.’ Kug ulul i fil e Bible, ma de n’uw nap’an nga tomuren, ma ke yog rog ni nggu meybil ngak e bin riyul’ e Got.”

◼ Allan, kan weliy murung’agen ko bin som’on e article. “Reb e rran ma ke yib e Pi Mich Rok Jehovah nga tabinaw romow, me piningrad e ppin rog ngar bad nga naun ya baadag e n’en ni yad be weliy ni murung’agen e yafas ni manemus u fayleng. Kug damumuw. Ere kug digeyew yad ma gamow e ppin rog e kug warow nga taang ma ku gog ngak ni lungug, ‘Mu kol ayuw. Gathi riyul’ e n’en yad be yog!’

“Me fulweg ni gaar: ‘Ere mang fan ni dab man ngam dag ngorad nde puluw e n’en ni yad be yog.’

 “Riyul’ ni dabiyog ni nggu dag ngorad nde puluw e machib rorad. Machane, ri yad ba gol mi yad pi’ ngog ba ken e babyor ni be tamilangnag ko kan sunmiy e girdi’ fa ke sum ko gamanman. Rib tamilang e n’en ni be weliy fare ke babyor ma bay e mich riy, ere kug turguy ni nggu fil boch u murung’agen Got. Ke tabab e Pi Mich Rok Jehovah ni ngar filed e thin nu Bible ngog, ma ke tamilang u wan’ug ni n’en ni be yog e Bible e rib thil ko n’en ni kug lemnag u murung’agen e teliw kafram. Ma nap’an ni kug fil murung’agen Jehovah, ma kug tabab ni ngaug meybil ngak ni gu be weliy ban’en nib tamilang ngak. Kafram, ma bay e lem rog nde puluw, ere kug ning e ayuw ngak nge yog ni nggu pag. Ma ke mudugil u wan’ug ni ma fulweg Jehovah taban e meybil.”

◼ Andrew, ni ma par u Ngalis. “Yugu aram rogon ni kari mich u wan’ug e science ma ri gu baadag ni nggu fil murung’agen, machane ke mich u wan’ug ni ke sum e girdi’ ko gamanman ya boch e girdi’ e ka rogned ni bay e mich riy. Daki mich Got u wan’ug ni bochan boor ban’en nib kireb ni be buch u fayleng.

“Yu ngiyal’ e gu ma yog u lanin’ug ni lungug: ‘Faanra riyul’ ni bay Got ma gu baadag ni nggu nang fan urngin ban’en ni be buch. Mang fan ni  kaygi yoor e kireb ni ma rin’ e girdi’ ma yima mahl?’ Ma nap’an nra yib e magawon ngog, ma yu ngiyal’ e gu ma meybil, ni gu be ning e ayuw, machane da gu nang ko mini’ e gu be non ngak.

“Me munmun ma immoy be’ ni ke pi’ reb e tract ngak e ppin rok ni ke ngongliy e Pi Mich Rok Jehovah ni bay kenggin ni: Ra Magay Girdien E Fayleng Nib Fas, Fa? Ri aram e re deer ni gu ma fal’eg i lemnag. Re tract nem e ke k’aringeg ni nggu lemnag murung’agen e Bible, ma kug fith u lanin’ug ni lungug, ‘Ba ga’ fan ni ngan nang e fulweg ko re deer ney, fa?’ Tomur riy, u nap’an e holiday ma immoy be’ ni ke pi’ ngog ba ke babyor ni be tamilangnag ni Bible e aram e thin rok Got. Nap’an ni kug nang ni Bible e ba puluw e thin riy nga boch ban’en ni ma yog girdien e science, ma kug guy nib t’uf ni nggu fil boch murung’agen e Bible. (The Bible​—God’s Word or Man’s?) Ere nap’an ni yog bagayad e Pi Mich Rok Jehovah ngog ni nggu filew e re ke babyor nem nfaanra gu baadag, ma kug gog nrayog. Nap’an ni ke tamilang u wan’ug e tin nib m’agan’ Jehovah ngay, ma kug thamiy ni kug nang ni ir e bin riyul’ e Got, ma rayog ni nggu non ngak u daken e meybil.”

◼ Jan, ir be’ nu London ni ma un ko Protestant ni ka nap’an ni kab bitir. “Bochan ni kug guy ni teliw e dariy e yul’yul’ riy ma boor e girdi’ ni kar gafgowgad ma aram e da kug un ko teliw rog. Ma da kug un ko skul nib tolang ma kug tabab i un ko tang ma gu ma chubeg e gita ni fan e nge yog e salpiy ngog. Ma ireray e ngiyal’ ni kug mada’gow Pat. Nap’an ni kab bitir ma ma un ko Katolik me munmun me tal ni bod gag.

“Kug parew u lan reb e naun ni kan digey maku bay boch e girdi’ ni ma par u rom ni kar talgad ko skul, ma yad baadag e teliw ko pi nam ni bod e India, China, nge Sapan. Gamad ma weliy fan e yafas nge yan i mada’ ko ngiyal’ ni ke n’uw e nep’. Yugu aram rogon nde mich Got u wan’mow Pat, ma kug thamiyew ni susun bay ‘gelngin ban’en ni ma ayuweg e yafas.’

“Tomuren ni kug warow nga lel’uch u Ngalis ya gamow be gay e maruwel ni bay rogon ko musik, ma kug gargelnag e bitir romow. Reb e nep’ me yib e m’ar ngak, ma kug meybil ngak fare Got nde mich u wan’ug faram. Ma de n’uw nap’an nga tomuren, ma gathi ri kab fel’ e tha’ u thilmow Pat, ere kug fek e bitir romow kug chuwgow. Kug meybil bayay ni gu be ning e ayuw, ya gu be susunnag ni bay be’ ni be motoyil ngog. Ma da gu nang ni ku ireray e n’en ni be rin’ Pat.

“Faani taaboch ko rorran nem, ma l’agruw e Pi Mich Rok Jehovah e kar ranow ko naun rok Pat mar dagew ngak boch e fonow u Bible. Me non Pat ngog ni be fitheg ko gu baadag ni gamow nge Pi Mich Rok Jehovah e nggu filed e Bible u taabang. De n’uw nap’an, ma kug nangew ni faanra gamow baadag ni nggu fel’gow u wan’ Got, mab t’uf ni nggu fal’egew e babyor ko mabgol romow. Gowa rib mo’maw’ e re n’em ya gathi ri kab fel’ e tha’ u thilmow Pat.

“Gamow baadag ni nggu nangew boch u rogon ni ke lebug e pi yiiy u Bible, nge fan ni ma yib e gafgow, nge murung’agen Gil’ilungun Got. Me munmun ma kug nangew ni ma lemnag Got rarogon e girdi’, ma gamow baadag ni nggu rin’ew e n’en ni be yog. Ere kug mabgolgow. Thin rok Got e ke ayuwegmow ni nggu chuguliyew fa dalip e bitir romow. Ke mudugil u wan’mow ni ma motoyil Jehovah ko meybil romow.”

Mu Yaliy e Mich Riy Ma Ga Nang Fan

Taareb rogon ko pi cha’nem ni kad weliyed murung’agrad, ma bokum milyon e girdi’ nde yag rok girdien e pi yurba’ i teliw ni googsur ni ngar bannaged yad. Ma kar nanged fan ni ke pag Got e gafgow. Gur, kam guy ni nap’an ni kari tamilang e thin nu Bible u wan’ e picha’ nem ma aram fini mich u wan’rad nriyul’ ni ma fulweg Jehovah taban e meybil?

Ga baadag ni ngam yaliy e mich riy ni bay Got, fa? Baadag e Pi Mich Rok Jehovah ni ngar ayuweged gur ngam nang e tin riyul’ u murung’agen Jehovah nge rogon ni ngam chugur ngak ni ir e En ma “fulweg taban e meybil.”​—Psalm 65:2.

[Footnote]

[Blurb on page 10]

“Nap’an ni ke tamilang u wan’ug e tin nib m’agan’ Jehovah ngay, ma kug thamiy ni kug nang ni ir e bin riyul’ e Got, ma rayog ni nggu non ngak u daken e meybil”

[Picture on page 9]

Ra gel e michan’ rom ngak Got ni faanra bay e mich riy, ma riyul’ ni ga baadag ni ngam nang e tin riyul’ u murung’agen