«Tsʼoʼok in tsʼáaik kʼaj óoltbil a kʼaabaʼ»

«Teneʼ tsʼoʼok in tsʼáaik kʼaj óoltbil a kʼaabaʼ tiʼ le máaxoʼob ta tsʼáajten way yóokʼol kaaboʼ. [...] Teneʼ tsʼoʼok in tsʼáaik u kʼaj óoltoʼob a kʼaabaʼ, yéetel yaan u seguer in tsʼáaik kʼaj óoltbil» (JUAN 17:6, 26).

¿Baʼax tu yóotaj u yaʼal Jesús? Le ka kaʼansajnaj Jesúseʼ tu yaʼalaj tiʼ le máakoʼob bix u kʼaabaʼ Diosoʼ. Tsʼoʼoleʼ cada ken u xok kaʼach le tsʼíiboʼob ich hebreooʼ ku chʼaʼchiʼitik u kʼaabaʼ Dios (Lucas 4:16-21). Tu kaʼansaj xan tiʼ u discípuloʼob u yaʼaloʼob ich oración lelaʼ: «K-Taata, santificartaʼak a kʼaabaʼ» (Lucas 11:2).

¿Baʼax tu beetaj le yáax cristianoʼoboʼ? Le ka tʼaanaj apóstol Pedro yéetel le ancianoʼob yanoʼob Jerusalénoʼ tu yaʼalajtiʼobeʼ Dioseʼ tsʼoʼok u jóoʼsik «junpʼéel kaaj bisik u kʼaabaʼ» (Hechos 15:14). U apóstoloʼob yéetel u discípuloʼobeʼ Jesúseʼ ku kaʼanskoʼob kaʼacheʼ «tuláakal máax kun chʼaʼchiʼitik u kʼaabaʼ Jéeobaeʼ yaan u salvartaʼal» (Hechos 2:21; Romanos 10:13). Le yáax cristianoʼoboʼ ku tsʼáaikoʼob kaʼach u kʼaabaʼ Dios tiʼ u tsʼíiboʼob. Le ley ku meyaj kaʼach tiʼ le judíoʼob ku kʼaabaʼtik Toseftaoʼ kex teʼ año 300 ka tsʼoʼok u tsʼíibtaʼaloʼ, teʼeloʼ ku tʼaan tiʼ le ka tóokaʼab le tsʼíib ku meyaj kaʼach tiʼ le cristianoʼoboʼ. Teʼeloʼ ku yaʼalik: «[Le Evangelioʼob] yéetel le u maasil libroʼoboʼ [maʼ xaaneʼ le libroʼob tsʼíibtaʼan tumen le judíoʼob cristianoʼoboʼ] unaj u tóokaʼaloʼob. Kʼaʼabéet u tóokaʼal le libroʼob paʼteʼ yéetel u kʼaabaʼ Dios yaan ichiloʼ».

Teʼ kʼiinoʼobaʼ, ¿máaxoʼob beetik beyoʼ? Tu káajbal le Biblia Revised Standard Versiono’ ku yaʼalik: «Xuʼul u chʼaʼchiʼitaʼal u kʼaabaʼ Dios tumen le judíoʼob táanil tiʼ u taal Jesúsoʼ tumen minaʼan uláakʼ diosoʼob utiaʼal ka páajchajak u confundirtaʼal. Tsoʼoleʼ le Iglesia Cristianaoʼ ku yaʼalikeʼ junpuliʼ maʼ maʼalob ka chʼaʼchiʼitaʼak u kʼaabaʼ Diosiʼ» (Biblia aprobartaʼan tumen le Consejo Nacional de las Iglesias de Cristo yaan Estados Unidosoʼ). Le oʼolal teʼ Bibliaaʼ luʼsaʼab u kʼaabaʼ Dioseʼ ka tsʼaʼab Yuumtsil. Maʼ sen úucheʼ le Vaticanooʼ tu yaʼalaj tiʼ le obispoʼoboʼ: «Tiʼ le baʼaxoʼob ku beetaʼal teʼ Iglesiaoʼ maʼ unaj u chʼaʼchiʼitaʼal u kʼaabaʼ Diosiʼ mix le letraʼob YHWH * yaan tiʼ le Tetragrámatonoʼ».

¿Yaan wa máaxoʼob ku meyajtiʼob u kaabaʼ Dios yéetel ku kaʼanskoʼob tiʼ uláakʼ máakoʼob? Yaan. Bey úuchik u yilik juntúul xiʼipal ku kʼaabaʼtik Sergeyoʼ, tu paalileʼ kajaʼan kaʼach Kirguistán. Teʼeloʼ tu chaʼantaj junpʼéel película tuʼux aʼalaʼabeʼ u kʼaabaʼ Dioseʼ Jéeoba. Chéen baʼaleʼ máan 10 años utiaʼal u kaʼa uʼuyik le kʼaabaʼoʼ. Letiʼeʼ bin kajtal Estados Unidos, teʼeloʼ xíimbaltaʼab tumen kaʼatúul u testigoʼob Jéeoba. Letiʼobeʼ tu yeʼesoʼob tiʼ u kʼaabaʼ Dios teʼ Bibliaoʼ. Sergeyeʼ jach kiʼimakchaj u yóol úuchik u kaxtik le religión chʼaʼchiʼitik u kʼaabaʼ Diosoʼ. Junpʼéel diccionario ku taasik le jaats «Jéeoba Dios», ku yaʼalik: «Letiʼe juntúuliliʼ Dios yaan tuláakal poder tiʼoʼ yéetel ku adorartaʼal tumen u testigoʼob Jéeoba» (Webster’s Third New International Dictionary).

[Nota]