Cada jaʼabeʼ, toʼon u j-jaajkunajoʼon Jéeobaeʼ k-beetik yéetel k-tʼoxik u millonesil bibliaʼob yéetel jejeláas jóoʼsaʼaniloʼob x-maʼ boʼolil tiʼ le máakoʼoboʼ; k-beetik xan u najiloʼob Reino yéetel u najiloʼob Betel yéetel k-ilik ka pʼáatkoʼob maʼalobil mantatsʼ; k-tsʼáaik junpʼéel áantaj tiʼ u milesil betelitaʼob yéetel misioneroʼob, tsʼoʼoleʼ k-túuxtik áantaj teʼ tuʼuxoʼob ku yúuchul junpʼéel nojoch looboʼ. ¿Tuʼux ku chʼaʼabal u taakʼinil utiaʼal u beetaʼal tuláakal lelaʼ?

Maʼatech k-kʼáatik diezmo yéetel maʼatech k-máan kʼáat taakʼin. Kex yaʼab u xuupil le kʼaʼaytaj k-beetkoʼ, baʼaleʼ maʼatech k-kʼáatik taakʼin tiʼ le máakoʼoboʼ. U kaʼapʼéel numeroil U Pʼíich Tulumil Kananeʼ, tsʼoʼok maas tiʼ cien jaʼaboʼob u yaʼaleʼ Jéeobaeʼ letiʼe máax áantkoʼonoʼ. Le oʼolal tu yaʼalaj: «[U organización Jéeobaeʼ] maʼ ken u kʼáat taakʼin, mix ken u kʼáat áantaj tiʼ le máakoʼoboʼ». Mix juntéen yanak k-beetik leloʼ (Mateo 10:8).

Le meyajoʼoboʼ ku beetaʼal yéetel taakʼin siibil u beetaʼal. Yaʼab máakeʼ jach maʼalob u yilik le baʼaxoʼob k-beetik utiaʼal k-kaʼansik le baʼax ku yaʼalik le Bibliaoʼ, le oʼolal ku yáantajoʼob yéetel wa bajux. Toʼoneʼ k-tsʼáaik tiempo, k-muukʼ yéetel uláakʼ baʼaxoʼob yaantoʼon utiaʼal u beetaʼal baʼax u kʼáat Dios tiʼ tuláakal le Luʼumaʼ (1 Crónicas 29:9). Teʼ Najiloʼob Reinooʼ bey xan teʼ kúuchiloʼob tuʼux ku beetaʼal asambleaʼoboʼ yaan mejen cajaʼob utiaʼal u tsʼáaik máak le bajux ku síijil tu puksiʼikʼaloʼ. Lelaʼ jeʼel xan u páajtal u beetaʼal teʼ sitio jw.org. Le siibaloʼobaʼ maases ku tsʼaʼabal tumen le máaxoʼob maʼ jach yaantiʼob taakʼinoʼ, letiʼobeʼ beyoʼob jeʼex le koʼolel óotsil yéetel kimen u yíicham tu yaʼalaj Jesús tu tsʼáaj kaʼapʼéel mejen taakʼinoʼob teʼ tu nuʼukulil le taakʼin ku siʼibil teʼ templooʼ (Lucas 21:1-4). Cada juntúuleʼ jeʼel u páajtal u junpáaykuntik wa bajux utiaʼal ka u tsʼáa «jeʼex tsʼoʼok u chʼaʼtuklik ichil u puksiʼikʼaleʼ» (1 Corintoiloʼob 16:2; 2 Corintoiloʼob 9:7).

Toʼoneʼ k-ojel Jéeobaeʼ yaan u seguer u péeksik u puksiʼikʼal le máaxoʼob taak u yeʼeskoʼob tsiikil tiʼ yéetel le baʼaxoʼob yaantiʼoboʼ, lelaʼ yaan u yáantaj utiaʼal maʼ u xuʼulul u kʼaʼaytaʼal le Reino tak le ken béeychajak baʼax u kʼáat Diosoʼ (Proverbios 3:9).

• ¿Baʼax u jelaʼanil u organización Jéeoba tiʼ le u maasil religionoʼoboʼ?

• ¿Bix u meyaj le siibaloʼob k-tsʼáaikoʼ?