XOOKIL 8
Yaan máaxoʼob maas yaan u páajtaliloʼob tiʼ toʼon
IN WAʼALIKEʼ techeʼ a wojel yaan máaxoʼob maas yaan u páajtaliloʼob tiʼ toʼon. ¿Bey máaxoʼobeʼ?... Juntúul tiʼ letiʼobeʼ Jéeoba Dios. ¿Kux túun Jesús, le Maʼalob j-Kaʼansajoʼ? ¿Maas wa yaan u páajtalil tiʼ toʼon?... Maas.
2 Jesuseʼ kuxlaj yéetel Dios teʼ kaʼanoʼ. Letiʼeʼ juntúul ángel kaʼachi. ¿Tu beetaj wa Dios uláakʼ angeloʼob?... Tu beetaj, u millonesil. Le angeloʼoboʼ maas yaan xan u páajtaliloʼob tiʼ toʼon (Hebreoʼob 1:7; Daniel 7:10).
3 ¿Kʼajaʼan wa tech u kʼaabaʼ le ángel tʼaanaj yéetel Maríaeʼ?... U kʼaabaʼeʼ Gabriel. Letiʼeʼ tu yaʼalaj tiʼ Maríaeʼ le chaambal kun antaltiʼoʼ u Hijo Dios. Jéeobaeʼ tu máansaj u kuxtal u Hijo ichil u nakʼ María utiaʼal u páajtal u síijil way Luʼumeʼ (Lucas 1:26, 27).
Maʼ xaaneʼ, ¿baʼax tu tsikbaltaj María yéetel José tiʼ Jesús?
4 ¿Ka creertik wa le milagro jeʼelaʼ? ¿Ka creertik wa Jesuseʼ kuxlaj yéetel Dios teʼ kaʼanoʼ?... Jesuseʼ tu yaʼaleʼ kuxlaji. ¿Bix úuchik u yojéeltik? Maʼ xaaneʼ tu chichnileʼ tsikbaltaʼabtiʼ tumen María le baʼax tu yaʼalaj Gabrieloʼ. Tsʼoʼoleʼ maʼ xaaneʼ Joseeʼ tu tsikbaltajtiʼeʼ u jach u taataeʼ Dios.
5 Le ka okjaʼanaj Jesuseʼ, tʼaanaj Dios desde teʼ kaʼanoʼ ka tu yaʼalaj: «Lelaʼ in Paal» (Mateo 3:17). Yéetel teʼ áakʼab táanil tiʼ u kíimiloʼ, Jesuseʼ tu yaʼalaj tiʼ u Taata ichil junpʼéel oración: «In Yuum, nojbeʼenkúunten ta tséel yéetel le nojbeʼenil yaanten kaʼach ta tséel táanil tiʼ u yantal yóokʼol kaaboʼ» (Juan 17:5). Jesuseʼ tu kʼáataj ka tsʼaʼabak u páajtalil u kaʼa bin kuxtal teʼ kaʼan yéetel Diosoʼ. ¿Bix jeʼel u béeytal lelaʼ?... Chéen jeʼel u béeytal wa ku kaʼa suʼutul angelil tumen Jéeoba Dioseʼ.
6 Beoraaʼ taak in kʼáatiktech junpʼéel baʼal. ¿Láaj uts wa le angeloʼoboʼ? ¿Techeʼ bix a tuklik?... Maas úuchjeakileʼ láaj utsoʼob. Jéeoba beetoʼob, yéetel tuláakal baʼaxoʼob ku beetkeʼ láaj maʼalob. Baʼaleʼ junpʼéel kʼiineʼ juntúul tiʼ le angeloʼoboʼ kʼaschaj u tuukul. ¿Bix úuchik lelaʼ?
7 Utiaʼal k-ojéeltik bixeʼ, tuukulnakoʼon tiʼ le ka beetaʼab Adán yéetel Eva tumen Diosoʼ. Yaan máakeʼ ku yaʼalikeʼ lelaʼ chéen junpʼéel tsikbal, baʼaleʼ Jesús, le Maʼalob j-Kaʼansajoʼ u yojel jach jaaj.
8 Le ka beetaʼab Adán yéetel Eva tumen Diosoʼ, tu tsʼáaʼob tiʼ junpʼéel paraíso, yaan kaʼach tiʼ junxóotʼ luʼum ku kʼaabaʼtik Edén. Letiʼobeʼ jeʼel kaʼach u páajtal u yantal yaʼab u paalaloʼobeʼ, bey xan u kuxtaloʼob utiaʼal minaʼan u xuul teʼ Paraísooʼ. Baʼaleʼ unaj u beetkoʼob le baʼax tsʼoʼok k-yáax ilkoʼ. Koʼox kʼaʼajsik baʼaxiʼ.
¿Baʼax unaj u beetik kaʼach Adán yéetel Eva utiaʼal ka kuxlakoʼob utiaʼal minaʼan u xuul teʼ Paraísooʼ?
9 Jéeobaeʼ u yaʼalmaj tiʼ Adán yéetel Eva jeʼel u páajtal kaʼach u jaantkoʼob u yich le cheʼob yaan teʼ jardinoʼ, baʼaleʼ maʼ unaj u jaantkoʼob u yich junkúuliʼ. Wa ku jaantkoʼobeʼ , Dioseʼ tu yaʼalajtiʼobeʼ yaan u kíimloʼob (Génesis 2:17; 3:3). ¿Baʼax túun unaj u beetik kaʼach Adán yéetel Eva?...
10 Unaj u yuʼubikoʼob tʼaan. U jaajileʼ utiaʼal ka kuxlak máakeʼ kʼaʼabéet u beetik baʼax ku yaʼalik Jéeoba Dios. Maʼ chúukaʼan chéen ka u yaʼal Adán yéetel Eva yaan u yuʼubikoʼob tʼaaniʼ. Unaj u yeʼeskoʼob yéetel baʼax ku beetkoʼob. Wa ka u yuʼuboʼob u tʼaan kaʼach Dioseʼ, ku yeʼeskoʼob u yaabiltmoʼob yéetel u kʼáat u tsʼáaubaʼob yáanal u gobernación. Beyoʼ jeʼel kaʼach u páajtal u kuxtaloʼob utiaʼal minaʼan u xuul teʼ Paraísooʼ. Baʼaleʼ ¿baʼax jeʼel u yeʼeskoʼob wa ku jaantkoʼob kaʼacheʼ?...
11 Jeʼel u yeʼeskoʼob maʼ kiʼimak u yóoloʼob yoʼolal le baʼaxoʼob tsʼaʼantiʼob kaʼach tumen Diosoʼ. ¿Jeʼel wa a wuʼuyik u tʼaan Dios wa tiaʼanech kaʼacheʼ?... Tu káajbaleʼ Adán yéetel Evaeʼ tu yuʼuboʼob tʼaan. Baʼaleʼ Evaeʼ tuʼus tumen juntúul máax maas yaan u páajtalil tiʼ, ka tu beetaj maʼ u yuʼubaʼal u tʼaan Jéeoba. ¿Máax tuse?...
¿Máax beet u tʼaʼanal Eva tumen le kaanoʼ?
12 Le Bibliaoʼ ku yaʼalikeʼ Evaeʼ tʼaʼan tumen juntúul kaan. ¿Bix úuchik u béeytal wa maʼ tu páajtal u tʼaan le kaanoʼoboʼ?... Juntúul angeleʼ tu beetaj u yilik bey táan u tʼaan le kaanoʼ. Baʼaleʼ u jaajileʼ letiʼe ángel tʼaanajoʼ. Le angelaʼ tsʼoʼok u joʼopʼol u kʼastal u tuukul. U kʼáat kaʼach ka adorartaʼak tumen Adán yéetel Eva, yéetel ka beetaʼak baʼax ku yaʼalik. U kʼáat kaʼach ka ilaʼak jeʼex Dioseʼ.
13 Bey túunoʼ le kʼasaʼan angelaʼ tu yoksaj baʼaloʼob kʼaastak tu tuukul Eva. Tu beetaj u yaʼalaʼaltiʼ tumen le kaanoʼ: ‹Dioseʼ maʼ tu yaʼalaj u jaajil teʼexiʼ. Maʼ kan kíimleʼex wa ka a jaanteʼex u yich le cheʼoʼ. Yaan u yantal a naʼateʼex jeʼex Dioseʼ›. ¿Jeʼel wa a creertik kaʼach le baʼax aʼalaʼabtiʼoʼ?...
14 Evaeʼ joʼopʼ u tsʼíiboltik le baʼax maʼ tsʼaʼan kaʼach tiʼob tumen Diosoʼ. Tu jaantaj u yich le cheʼoʼ, ka tsʼoʼokeʼ tu tsʼáaj xan tiʼ Adaniʼ. Letiʼeʼ maʼ tu creertaj le baʼax tu yaʼalaj le kaanoʼ, baʼaleʼ tu yeʼesaj maas u yaabiltmaj Eva ke Dios. Le oʼolal tu jaantaj xan u yich le cheʼoʼ (Génesis 3:1-6; 1 Timoteo 2:14).
15 ¿Bix binik túun tiʼob?... Adán yéetel Evaeʼ kʼebanchajoʼob, chʼíijoʼob yéetel kíimoʼob. Tumen kʼebanchajoʼobeʼ, tuláakal u paalaloʼobeʼ j-kʼebanoʼob xan, yéetel ka máan kʼiineʼ chʼíijoʼob yéetel kíimoʼob. Dioseʼ maʼ tuusnajiʼ. Utiaʼal k-kuxtaleʼ kʼaʼabéet k-uʼuyik u tʼaan (Romailoʼob 5:12). Le Bibliaoʼ ku yaʼalikeʼ u kʼaabaʼ le ángel tus Evaoʼ Satanás, le Kʼaasilbaʼaloʼ, yéetel le angeloʼob kʼaschaj u tuukuloʼoboʼ demonioʼob (Santiago 2:19; Apocalipsis 12:9).
¿Baʼax úuch tiʼ Adán yéetel Eva le ka xuʼul u yuʼubikoʼob u tʼaan Diosoʼ?
16 ¿Ka naʼatik wa baʼaxten kʼaschaj le ángel uts kaʼachoʼ?... Tumen káaj u tuklik baʼaloʼob kʼaastak. U kʼáat kaʼach u beetuba maas nojchil. Tumen u yojel tsʼoʼok u yaʼalik Dios tiʼ Adán yéetel Eva ka yanak u paalaloʼobeʼ, tu tsʼíiboltaj ka adorartaʼak tumen tuláakal u paalaloʼob Adán. Le Kʼaasilbaʼaloʼ maʼ u kʼáat ka uʼuyaʼak u tʼaan Jéeoba tumen mix juntúul tiʼ toʼoniʼ. Le oʼolal ku yilik u yoksik baʼaloʼob kʼaastak t-tuukul (Santiago 1:13-15).
17 Le Kʼaasilbaʼaloʼ ku yaʼalikeʼ mix máak yaabiltmil tu jaajil Jéeoba. Ku yaʼalikeʼ mix teech, mix teen yaabiltmil Dios, yéetel maʼ k-kʼáat k-beet le baʼax ku yaʼalikoʼ. Ku yaʼalikeʼ chéen k-beetik baʼax ku yaʼalik Jéeoba wa maʼalob yaniloʼon. ¿Jaaj wa le baʼax ku yaʼalik le Kʼaasilbaʼaloʼ? ¿Bey wa k-tuukul xanoʼ?
18 Jesús, le Maʼalob j-Kaʼansajoʼ, tu yaʼaleʼ le Kʼaasilbaʼaloʼ chéen tuus ku beetik. Jesuseʼ tu yeʼesaj jach tu jaajil u yaabiltmaj Jéeoba, tumen tu yuʼubaj u tʼaan. Letiʼeʼ tu yuʼubaj u tʼaan Dios tuláakal súutukil, tak le ka beetaʼab u muʼyaj tumen u maasiloʼ. Tu yeʼesaj chúukaʼan u yóol u meyajt Jéeoba tak ka kíimi. Le oʼolal kaʼa kuxkíintaʼab tumen Dios, tsʼoʼoleʼ mix bikʼin kun kaʼa kíimil.
19 Bey túunoʼ, ¿máax a tuklik le maas nojoch enemigo yaantoʼonoʼ?... Beyoʼ, Satanás, le Kʼaasilbaʼaloʼ. ¿Jeʼel wa u páajtal k-ilkeʼ?... ¡Maʼatan! Baʼaleʼ k-ojel jach tu jaajil yaan yéetel maas yaan u páajtalil tiʼ toʼon. Baʼaleʼ ¿máax maas yaan u páajtalil tiʼ le Kʼaasilbaʼaloʼ?... Jéeoba Dios. Le oʼolal k-ojel jeʼel u páajtal u kanáantkoʼoneʼ.
Koʼox xokik u maasil yoʼolal Máax unaj k-adorartik: Deuteronomio 30:19, 20; Josué 24:14, 15; Proverbios 27:11, yéetel Mateo 4:10.
Maʼ xaaneʼ jeʼel u yutstal xan ta wicheʼ
U libroi tsikbaliloʼob tiʼ le Bibliaoʼ
Yáax xiib yéetel yáax koʼolel
U libroi tsikbaliloʼob tiʼ le Bibliaoʼ
