Yaʼab máaxoʼob minaʼan baʼal u jaantoʼob yéetel tuʼux u kajtaloʼob. Yaan horaeʼ le máakoʼobaʼ chéen kʼaʼabéet u líiʼsaʼal u yóoloʼob. Wa toʼon k-áantik u maasileʼ Dioseʼ yaan u bendecirkoʼon.

«Le máax ku yeʼesik u yutsil tiʼ juntúul óotsileʼ bey yaan baʼax ku tsʼáaik tiʼ Jéeoba u majáanteʼ, letiʼ túuneʼ yaan u boʼotiktiʼ le baʼax ku beetkoʼ» (PROVERBIOS 19:17).

Jesúseʼ tʼaanaj tiʼ juntúul máak lúub tu kʼab j-ookoloʼobeʼ ka tu pʼatoʼob sat kimen (Lucas 10:29-37). Chéen baʼaleʼ juntúul máak yaanal luʼumil u taaleʼ tu chʼaʼaj óotsilil tiʼeʼ ka jeʼel u yáante.

Le máakaʼ tu tsʼakaj le máax beetaʼab loob tiʼoʼ, tu bisaj u kanáante, ka tu pʼataj xan taakʼin utiaʼal ka kanáantaʼak.

¿Baʼax ku kaʼansiktoʼon lelaʼ? Teʼelaʼ Jesúseʼ táan kaʼach u kaʼansik unaj k-beetik tuláakal le ku páajtal utiaʼal k-áantik u maasiloʼ (Proverbios 14:31). U Tʼaan Dioseʼ ku yaʼalikeʼ yaan u xuʼulul le óotsililoʼ yéetel le muʼyajiloʼ. ¿Baʼax kʼiin kéen u beet Dios lelaʼ? ¿Bix ken u beetil? Teʼ tuláakʼ xookoʼ yaan u tsoʼolol tuláakal le jatsʼuts baʼaloʼob ken u beet Dios maʼ tun xáantaloʼ.