• Dios kun yéeyik. Le Bibliaoʼ ku yaʼalik: «Le rey in yéeymoʼ tsʼoʼok in tsʼáaik tu yóokʼol Sión [...]. Kʼáatten le nukuch kaajoʼoboʼ ka in tsʼáatech, bey túunoʼ yaan a tiaʼalintik tuláakal le luʼumoʼ» (Salmo 2:6, 8).

• Yaan u kutal tu trono David. Le Bibliaoʼ ku yaʼalik: «Tsʼoʼok u síijiltoʼon juntúul chan paal, tsʼoʼok u tsʼaʼabaltoʼon juntúul chan xiʼipal [...]. Mantatsʼ kun bin u maas yaʼabtal tuʼux ku gobernar yéetel mantatsʼ ken u beet u yantal jeetsʼelil. Letiʼeʼ yaan u kutal tu trono David yéetel yaan u tsʼaʼabaltiʼ u reino, yaan u beetik u pʼáatal jeetsʼel le reinooʼ» (Isaías 9:6, 7).

• Belén kun síijil. Le Bibliaoʼ ku yaʼalik: «Belén Efrata [...]. Tiʼ teech kun jóokʼol le máax ken u gobernart Israel jeʼex in kʼáatoʼ [...]. U páajtalileʼ yaan u kʼuchul tak tu xuul yóokʼol kaab» (Miqueas 5:2, 4).

• Yaan u pʼektaʼal yéetel yaan u kíimsaʼal. Le Bibliaoʼ ku yaʼalik: «Taasaʼab mix baʼalil yéetel pʼáat bey mix baʼal k-ilkeʼ [...]. Letiʼeʼ táatsʼmáansaʼab tu yoʼolal k-kʼebanoʼob. Sen beetaʼab u muʼyaj tu yoʼolal le baʼaxoʼob maʼ maʼalob k-beetmoʼ» (Isaías 53:3, 5).

• Yaan u kaʼa kuxkíintaʼal yéetel yaan u tsʼaʼabal páajtalil tiʼ tumen Dios. Le Bibliaoʼ ku yaʼalik: «Maʼ ken a pʼaten teʼ Muknaloʼ. Maʼ ken a chaʼa u pʼáatal tu tsʼuʼ luʼum le máax chúukaʼan u yóol u meyajtechoʼ [...]. Mantatsʼ kiʼimak u yóol le máax yaan ta x-noʼoj kʼaboʼ» (Salmo 16:10, 11).

Tiʼ Jesucristo láaj béeychaj le baʼaxoʼob tsʼoʼok k-aʼalikaʼ. Juntúul ángeleʼ tu yaʼalaj tiʼ María u maama: «Dioseʼ yaan u tsʼáaiktiʼ u trono David u taata [...]. U Reinoeʼ mix bikʼin kun xuʼulul» (Lucas 1:31-33).

Jesúseʼ mix juntéen tu gobernartaj wíinik le tiaʼan way Luʼumoʼ. Chéen baʼaleʼ kéen u beet u Reyil tiʼ u Reino Dioseʼ yaan u gobernartik wíinik desde teʼ kaʼanoʼ. ¿Baʼaxten jach maʼalob bix kun gobernar? Koʼox ilik baʼax tu beetaj le ka kuxlaj way Luʼumeʼ.

•   Jesúseʼ jach tu yáantaj u maasil. Letiʼeʼ tu yáantaj xiiboʼob, koʼoleloʼob, táankelmoʼob bey xan le máaxoʼob tsʼoʼok u chʼíijloʼoboʼ. Tu yeʼesaj u yutsil tiʼob kex óotsiloʼob wa kex ayikʼaloʼob (Mateo 9:36; Marcos 10:16). Juntéenjeakeʼ juntúul máak yaan lepra tiʼeʼ tu yaʼalajtiʼ: «Wa a kʼáateʼ jeʼel u páajtal a tsʼakikeneʼ». Jesús túuneʼ tu chʼaʼaj óotsilil tiʼeʼ ka tu tsʼakaj (Marcos 1:40-42).

• Jesúseʼ tu yeʼesaj bix jeʼel k-lúubul utsil tiʼ Dioseʼ. Letiʼe tu yaʼalaj: «Maʼ tu páajtal a meyajtikeʼex Dios wa táan a meyajtikeʼex le Ayikʼaliloʼ». Tu yaʼalaj xan unaj k-tratartik u maasil jeʼex k-kʼáat ka tratartaʼakoʼoneʼ. Tu kaʼansaj xaneʼ Dioseʼ maʼ chéen ku yilik baʼaxoʼob k-beetkiʼ, baʼaxeʼ u yojel xan baʼaxoʼob k-tuklik yéetel bix k-uʼuyikba. Le oʼolaleʼ utiaʼal k-lúubul utsil tiʼ Dioseʼ unaj k-kanáantik baʼax k-oksik ichil k-puksiʼikʼal (Mateo 5:28; 6:24; 7:12). Jesúseʼ tu yaʼalaj xaneʼ utiaʼal u yantaltoʼon kiʼimak óolaleʼ unaj k-beetik baʼax ku yaʼalik Dios (Lucas 11:28).

• Jesúseʼ tu yeʼesaj bix unaj k-yaabiltik u maasil. Le baʼaxoʼob tu yaʼalaj yéetel tu beetoʼ kʼuch tu puksiʼikʼal le máakoʼoboʼ. Le Bibliaoʼ ku yaʼalik: «Tuláakal le yaʼabkach máakoʼob chʼenxikintikoʼ pʼáat jaajap u chiʼob yoʼolal bix u kaʼansaj, tumen letiʼeʼ ku kaʼansaj jeʼex juntúul máak tsʼaʼan autoridad tiʼeʼ» (Mateo 7:28, 29). Letiʼeʼ tu yaʼalaj: «Maʼ u xuʼulul a yaabiltikeʼex a enemigoʼex». Tsʼoʼoleʼ orarnaj xan tu yoʼolal le máaxoʼob kíimsoʼ, tu yaʼalaj: «In Yuum, perdonartoʼob tumen maʼ u yojloʼob baʼax ku beetkoʼobiʼ» (Mateo 5:44; Lucas 23:34).

Jesúseʼ jach maʼalob kun gobernar tumen letiʼeʼ u yojel bix ken u beeteʼ, u yaabiltmoʼon yéetel taak u yáantkoʼon. Chéen baʼaleʼ, ¿baʼax kʼiin kéen káajak u gobernar?