Le fe wa «oksaj óolaloʼ» u kʼáat u yaʼal u jach creertaʼal junpʼéel baʼal tsʼoʼok u yilaʼal jach jaaj. Máax yaan u fejeʼ ku creertikeʼ Dioseʼ jach tu jaajil yaan u beetik tuláakal baʼax u yaʼalmaj.

Moiseseʼ jach tu creertaj yaan u béeykuntik Dios le baʼax u yaʼalmoʼ (Génesis 22:15-18). Letiʼeʼ páajchaj u kuxtal ich ayikʼalil tu luʼumil Egipto, baʼaleʼ «tu yóoltaj muʼyaj yéetel u kaajal Jajal Dioseʼ maʼ ka u kiʼimakkúuns u yóol tu yoʼolal tsʼeʼetsʼek kʼiinoʼob tiʼ u kiʼimak óolaliloʼob le kʼebanoʼ» (Hebreob 11:25). ¿Chéen wa ka tu jáan tuklaj u beetik Moisés leloʼ? ¿Yaachaj wa u yóol ka tsʼoʼoki? Maʼatech. Le Bibliaoʼ ku yaʼalikeʼ «pʼáat jeetsʼel tiʼ u tuukul bey táan u yilik le Jajal Dios maʼ táan u yilaʼaloʼ» (Hebreob 11:27). Mix juntéen yaachaj u yóol yoʼolal le baʼax tu beetoʼ.

Moiseseʼ tu yáantaj u maasil utiaʼal ka muʼukʼaʼanchajak u fejoʼob. Jeʼex le ka baʼpachtaʼab le israelitaʼob tumen Faraón yéetel u soldadoʼob aktáan tiʼ le Chak Kʼáaʼnáaboʼ. Tumen sajakchajaʼanoʼobeʼ tu kʼáat óoltoʼob áantaj tiʼ Jéeoba yéetel tiʼ Moisés. ¿Baʼax túun tu beetaj Moisés?

Moiseseʼ míin mix tu tuukul kaʼach ku máan wa Dioseʼ yaan u jatsik u jaʼil le Chak Kʼáaʼnáab utiaʼal u máan le israelitaʼoboʼ. Baʼaleʼ u yojel yaan baʼax ken u beet Jéeoba utiaʼal u kanáantik u kaajal, yéetel u kʼáat ka yanak tiʼ u yéet israelitailoʼob le tuukul beyaʼ. Moiseseʼ tu yaʼalajtiʼob: «Pʼáatkeʼex jejetsʼkil ka wileʼex baʼax bíin u beet Yuumtsil utiaʼal u tokikeʼex bejlaʼeʼ, tumen mix bikʼin bíin a wileʼex tu kaʼatéen le egipcioʼob ka wilkeʼex bejlaʼaʼ» (Éxodo 14:13). ¿Béeychaj wa u muʼukʼaʼankúuntik u fe u yéet israelitailoʼob? Béeychaji. «Tu yoʼolal le oksaj óolaloʼ le israelitaʼoboʼ máanoʼob chúumuk le Chak Kʼáaʼnáaboʼ, jeʼel bix u máan máak tiʼ tikin luʼumeʼ.» (Hebreob 11:29.) Le fe tu yeʼesaj Moisesoʼ maʼ chéen tiʼ letiʼ tu taasaj utsiliʼ, baʼaxeʼ tak tiʼ le máaxoʼob kaanbalnajoʼob tiʼ letiʼoʼ.

Jeʼex Moiseseʼ jeʼel u páajtal k-eʼesik k-creertik yaan u beetik Dios le baʼax u yaʼalmoʼ. Koʼox tuklik lelaʼ: Dioseʼ ku yaʼalikeʼ wa k-tsʼáaik u Reino táanileʼ yaan u tsʼáaiktoʼon le baʼaxoʼob kʼaʼabéettoʼonoʼ (Mateo 6:33). U jaajileʼ chéen chʼaʼabil jeʼel u bin máak tu paach le baʼaxoʼob ku tsʼáaik le yóokʼol kaaboʼ tumen óoliʼ tuláakal bey u beetkoʼ. Baʼaleʼ k-ojel wa k-tsʼáaik Dios táanileʼ, letiʼeʼ yaan u tsʼáaiktoʼon tuláakal le baʼax kʼaʼabéettoʼonoʼ. Jéeobaeʼ ku yaʼalik: «Mix bikʼin kin in pʼatech mix kin in xúumpʼattech» (Hebreob 13:5).

Toʼoneʼ jeʼel u páajtal xan k-áantik u maasil utiaʼal ka muʼukʼaʼanchajak u fejoʼobeʼ. Le taatatsiloʼoboʼ yaʼab baʼax jeʼel u páajtal u beetkoʼob yoʼolal u paalaloʼobeʼ. Unaj u kaʼanskoʼobtiʼob desde tu chichniloʼobeʼ yaan juntúul Dios ku yaʼalik baʼax uts yéetel baʼax kʼaas. Unaj u yeʼeskoʼob xan tiʼobeʼ le bix u yaʼalik Dios ka kuxlakoʼonoʼ letiʼe u maas maʼalobiloʼ (Isaías 48:17, 18). Wa le taatatsiloʼob ku yáantik u paalal u creertoʼob jach tu jaajil «yaan Jajal Dios yéetel letiʼeʼ ku boʼotik le máaxoʼob kaxtikoʼ» táan u tsʼáaikoʼob junpʼéel jatsʼuts siibal tiʼob (Hebreob 11:6).