Wa lubaʼan a wóol yoʼolal baʼax ku yúuchul ichil junpʼéel religioneʼ maʼ xaaneʼ talam a wilik a kʼubik a wóol tiʼ uláakʼ religionoʼob. Baʼaleʼ yaan junpʼéel religión jeʼel u páajtal a kʼubik a wóol tiʼeʼ. Ka taal Jesús way Luʼumeʼ tu muchʼaj máakoʼob chúukaʼan u yóoloʼobeʼ ka tu kaʼansoʼob kuxtal jeʼex u yaʼalik Diosoʼ. Tak bejlaʼeʼ yaan máaxoʼob beetik baʼax tu kaʼansaj Cristo. ¿Máaxoʼobiʼ?

Estelle, máax t-aʼalaj tiʼ le yáax xookoʼoboʼ, ku yaʼalik: «Káaj in kaanbal tiʼ le Biblia le ka joʼopʼ in xook yéetel u j-jaajkunajoʼob Jéeobaoʼ. Maʼ xáanchaj ka tin naʼataj baʼax ku yaʼalik Juan 8:32: ‹Yaan a kʼaj óoltikeʼex le jaajoʼ, le jaaj túunoʼ yaan u jáalkʼabtikeʼex›».

Ray, máax tsʼoʼok k-yáax aʼalik xanoʼ, ku yaʼalik: «Úuchik in xokik le Biblia yéetel u j-jaajkunajoʼob Jéeobaoʼ tin kaneʼ maʼ Dios beetik u muʼyaj wíinikiʼ. Tin kanaj xaneʼ kex yaan baʼax oʼolal ku chaʼik Dios u yantal muʼyajileʼ maʼ kun xáantal ken u luʼse. Leloʼ jach tu líiʼsaj in wóol».

U jaajileʼ talam u beetaʼal baʼax maʼalob tuʼux óoliʼ tuláakal máak beetik baʼax kʼaas. Baʼaleʼ jeʼel u páajtaleʼ. Yaʼab máakoʼobeʼ u kʼáat ka áantaʼakoʼob u tsʼáaʼob ichil u kuxtaloʼob le baʼax ku yaʼalik le Bibliaoʼ. Le oʼolal u j-jaajkunajoʼob Jéeobaeʼ táan u tsʼáaikoʼob xook yéetel le Biblia tiʼ u millonesil máakoʼob tuláakal yóokʼol kaaboʼ. Yéetel le xookoʼobaʼ yaʼab máakoʼob táan u natsʼkubaʼob tiʼ Dios yéetel táan u maas yantal kiʼimak óolal ichil u kuxtaloʼob. *

Tuláakʼ ken a wil u j-jaajkunajoʼob Jéeobaeʼ, ¿kux túun ka a kʼáattiʼob baʼaxten u kʼubmaj u yóoloʼob tiʼ u religionoʼob? Ojéelt baʼax ku kaʼanskoʼob yéetel bix káajikoʼob. Beyoʼ yaan a wilik wa yaan junpʼéel religión jeʼel u páajtal a kʼubik a wóol tiʼeʼ.