Bejlaʼeʼ óoliʼ tuláakal tuʼux yaan pornografía: * tiʼ letreroʼob, nookʼoʼob, paaxoʼob, revistaʼob, cine, televisión, videojuegoʼob, celularoʼob, computadoraʼob, Internet, yéetel yaʼab uláakʼ tuʼuxoʼob. Tiʼ tuláakal yóokʼol kaabeʼ mix juntéen ilaʼak u sen yaʼabtal yéetel u sen chaʼantaʼal pornografía jeʼex bejlaʼeʼ (ilawil le cuadro « Datos yoʼolal le pornografíaoʼ»).

Le pornografíaoʼ tsʼoʼok xan u jelpajal. Le j-kaʼansaj Gail Dinesoʼ ku yaʼalik: «Le pornografíaoʼ tsʼoʼok u maas kʼastal; le baʼax ku yilaʼal jach táaj kʼaas kaʼachoʼ tsʼoʼok u pʼáatal maʼ kʼaas u yilaʼaliʼ».

Techeʼ ¿baʼax ka tuklik yoʼolal le pornografíaoʼ? ¿Jaaj wa maʼ tu beetik kʼaas? ¿Bey venenoeʼ, wa bix a tuklik? Jesuseʼ tu yaʼalaj: «Tuláakal [...] maʼalob cheʼeʼ ku tsʼáaik maʼalob ich, chéen baʼaleʼ tuláakal cheʼ maʼ pataleʼ maʼ patal xan le ich ku tsʼáaikoʼ» (Mateo 7:17). ¿Bix le «ich» ku tsʼáaik le pornografíaoʼ? Utiaʼal k-ojéeltikeʼ koʼox ilik jujunpʼéel kʼáatchiʼob yaan yil yéetel leloʼ.

BAʼAX TSʼOʼOK U YILAʼAL: Le pornografíaoʼ ku suut vicioil. Ku yaʼalik le investigadoroʼob yéetel terapeutaʼoboʼ bey jeʼex le cocaína de tuunichoʼ.

Brianeʼ * suuk u chaʼantik kaʼach pornografía teʼ Internetoʼ. Letiʼeʼ ku yaʼalik: «Maʼ tu páajtal in pʼatik kaʼachi. Ku controlartiken, ku tíitken yéetel ku beetik u kʼiʼinam in pool. Kex máan yaʼab jaʼaboʼob táan in wilik in pʼatkeʼ, láayliʼ enviciadoen kaʼacheʼ».

Máaxoʼob enviciadoʼob tiʼ pornografíaeʼ ku taʼakikubaʼob yéetel ku tuusoʼob utiaʼal maʼ u chuʼukloʼob. Le oʼolal yaʼabeʼ ku yuʼubikubaʼob tu juunaloʼob, suʼlakoʼob, chiʼichnakoʼob, luubul u yóoloʼob wa séeb u tsʼíikiloʼob. Yaneʼ hasta ku tuklik u kíimskubaʼob. Sergio, juntúul máak óoliʼ sáamsamal ku yéemsik pornografía tu celulareʼ, tu yaʼalaj: «Pʼáat chéen tin woʼolal kin tuukul yéetel chiʼichnaken. Kin wuʼuyik mix baʼal in biilal, kʼasaʼanen, yéetel mix máak áantken púutsʼul tiʼ le vicioaʼ. Suʼlaken yéetel saajken in kʼáat áantaj».

Kex chéen junsúutuk ka téek ilaʼakeʼ le pornografíaoʼ jeʼel u beetik kʼaas tiʼ máakeʼ. Le doctora Judith Reisman, juntúul investigadoraeʼ, tu yaʼalaj tu táan u autoridadil Estados Unidos: «Le pornografía utiaʼal chaʼantbiloʼ jach ku tʼíilil tu tuukul máak yéetel ku jelbesik bix u meyaj le tsʼoʼomeloʼ. Kex maʼ u kʼáat máakeʼ séeb u yajsik tuukuloʼob yéetel tsʼíibolaloʼob istikyaj u jáawaloʼob wa junpuliʼ maʼ tu páajtal u tuʼubsaʼaloʼob». Susan, juntúul x-chʼúupal yaan 19 jaʼaboʼob tiʼeʼ, ku yaʼalik: «Le pornografía tin wilaj [teʼ Internetoʼ] pʼáat tin tuukul. Chéen ken téek kʼaʼajakten. Míin mix bikʼin ken in tuʼubse».

U JAAJIL: Le pornografíaoʼ ku palitsiltik yéetel ku kʼaskúuntik máak (2 Pedro 2:19).

BAʼAX TSʼOʼOK U YILAʼAL: «Le pornografíaoʼ ku jatsik le familiaʼoboʼ.» (The Porn Trap, tsʼíibtaʼan tumen Wendy yéetel Larry Maltz.)

Le pornografíaoʼ ku beetik kʼaas tiʼ le familiaʼoboʼ:

• Ku beetik u xuʼulul le confianza yéetel le yaabilajoʼ yéetel ku taasik talamiloʼob yaan yil yéetel le núupchitaloʼ (Proverbios 2:12-17).

• Ku beetik u tuukul máak chéen tu yoʼolal, u náachtal tiʼ u maasil yéetel u pʼáatal maʼ kiʼimak u yóol yéetel u núupiʼ (Efesios 5:28, 29).

• Ku yoksik kʼaakʼas tsʼíibolaloʼob tu tuukul máak (2 Pedro 2:14).

• Ku túulchʼintik máak u obligart u núup ka u beet baʼaloʼob kʼaastak ken núupchilakoʼob (Efesios 5:3, 4).

• Ku péeksik máak núupkʼebantal tu contra u núup (Mateo 5:28).

Dioseʼ u pʼeek le máaxoʼob tsʼokaʼan u beel ku ‹traicionarkubaʼoboʼ› (Malaquías  2:16). Wa ku ‹traicionartik› máak yéetel ku tusik u núupeʼ jeʼel u beetik u pʼatkubaʼob yéetel u divorciarkubaʼobeʼ. Ken úuchuk beyaʼ tak u paalaloʼob ku muʼyajoʼob.

Baʼaleʼ le pornografíaoʼ jeʼel u beetik maas yaʼab kʼaas tiʼ le paalaloʼoboʼ. Brian, máax tsʼoʼok k-yáax aʼalikeʼ, ku yaʼalik: «Juntéenjeak le yaanten míin 10 jaʼaboʼobeʼ táan kaʼach in báaxal de taʼakumbail, ka tin kaxtaj junpʼéel revista porno, u tiaʼal in taata kaʼachi. U jaajileʼ maʼ in wojel baʼaxten uts tin wich kaʼachiʼ, baʼaleʼ joʼopʼ in taʼakkinba utiaʼal in chaʼantik. Bey káajik u kʼastal in kuxtal tak ka nojochchajenoʼ». Tsʼoʼok u yilaʼaleʼ le pornografíaoʼ jeʼel u túulchʼintik le paalal núupchital yéetel jeʼel máaxakoʼ, kex minaʼan u jaʼabil tiʼob, yéetel jeʼel u beetik u loobiltikoʼob u núupoʼob yéetel u kʼeʼekʼexpajal u modosoʼobeʼ.

U JAAJIL: Le pornografíaoʼ ku kʼaskúuntik bix u biskuba le máaxoʼob u yaabiltmubaʼoboʼ yéetel ku taasik muʼyajil (Proverbios 6:27).

DIOSEʼ KU YAʼALIK: «Kíimseʼex le tsʼíibolal yaan tiʼ u xéexetʼal a [...] wíinklileʼexoʼ, jeʼex núupkʼeban, éekʼ kuxtalil, u jíiltaʼal máak tumen u tsʼíibolalil u núupchital, kʼaakʼas tsʼíibolaloʼob bey xan u tsʼíiboltaʼal baʼax u tiaʼal yaanal; le jeʼelaʼ láayliʼ bey ka adorartaʼak imagenoʼobeʼ» (Colosenses 3:5).

Jéeobaeʼ * u pʼekmaj le pornografíaoʼ. Maʼ tumen wa kʼaas u yilik le núupchitaloʼ. U jaajileʼ letiʼ tsʼáa tiʼ xiib yéetel tiʼ koʼolel u páajtalil u núupchitaloʼob utiaʼal u paklan kiʼimakkúuntik u yóoloʼob, u paklan yaabiltikubaʼob yéetel u yantal u paalaloʼob (Santiago 1:17).

Jeʼex túun k-ilkoʼ, ¿jeʼel wa u páajtal k-aʼalik jach ku píitmáan Jéeoba ikil u pʼektik le pornografíaoʼ? Maʼ. Koʼox ilik baʼaxten.

• Jéeobaeʼ u yojleʼ le pornografíaoʼ jeʼel u kʼaskúuntik u kuxtal máakeʼ (Efesios 4:17-19).

• U yaabiltmoʼon yéetel maʼ u kʼáat ka úuchuktoʼon mix baʼal kʼaasiʼ (Isaías 48:17, 18).

• U kʼáat u kanáant le máaxoʼob tsʼokaʼan u beeloʼoboʼ bey xan u paalaloʼob (Mateo 19:4-6).

• U kʼáat ka k-bis junpʼéel kuxtal limpio yéetel ka k-eʼes tsiikil tiʼ u maasil (1 Tesalonicenses 4:3-6).

• U kʼáat ka eʼesaʼak tsiikil tiʼ le páajtalil u tsʼaamaj tiʼ máak utiaʼal u núupchitaloʼ (Hebreos 13:4).

• U yojleʼ le pornografíaoʼ ku kʼaskúuntik u tuukul máak, ku beetik u kaxtik chéen u yutsil yéetel u yilik le núupchital jeʼex u yilaʼal tumen le Kʼaasilbaʼaloʼ (Génesis 6:2; Judas 6, 7).

U JAAJIL: Le pornografíaoʼ ku náachkuntik máak tiʼ Dios (Romanos 1:24).

Jéeobaeʼ jach ku chʼaʼik óotsilil tiʼ máax u kʼáat púutsʼul tiʼ le pornografíaoʼ. Le Bibliaoʼ ku yaʼalik: «Jéeobaeʼ ku chʼaʼik óotsilil, jach ku yeʼesik u yutsil, maʼatech u jáan pʼuʼujul yéetel jach nojoch u yaabilaj. Letiʼeʼ u yojel bix u beetmiloʼon, ku kʼaʼajaltiʼ chéen luʼumoʼon» (Salmo 103:8, 14). Dioseʼ ku invitartik tuláakal máax kabal u yóol utiaʼal ka u natsʼuba tu yiknal; Dioseʼ yaan ‹u yeʼesik nojoch utsil jach teʼ kʼiin kʼaʼabéettiʼob áantajoʼ› (Hebreos 4:16; ilawil le jaats « U púutsʼul máak tiʼ le pornografíaoʼ»).

Yaʼab máakoʼobeʼ tsʼoʼok u chaʼik u yáantaʼaloʼob tumen Dios. ¿Tsʼoʼok wa u bin utsil tiʼob? Ilawil baʼax ku yaʼalik le Biblia tiʼ jujuntúul tiʼ letiʼoboʼ: «Teʼexeʼ [...] tsʼoʼok a pʼoʼobleʼex, tsʼoʼok a santificartaʼaleʼex, tsʼoʼok u yaʼalaʼal toj a kuxtaleʼex tu kʼaabaʼ k-Yuumtsil Jesucristo bey xan tu yoʼolal u espíritu santo k-Diosoʼ» (1 Corintios 6:11). Le máakoʼobaʼ páajchaj xan u yaʼalikoʼob jeʼex tu yaʼalil apóstol Pabloeʼ: «Yaanten u muukʼil utiaʼal in beetik tuláakal baʼal, tu yoʼolal le Máax tsʼáaikten u páajtalil in beetkoʼ» (Filipenses 4:13).

Susaneʼ páajchaj u pʼatik le pornografíaoʼ. Bejlaʼeʼ ku yaʼalik: «Chéen Jéeoba ku páajtal u yáantkech a tojkíint a beel tu kaʼatéen. Wa ka kʼáatik u yáantaj yéetel u nuʼuktajeʼ jeʼel u yáantkech pʼáatal limpioil tu táaneʼ. Jéeobaeʼ maʼ ken u pʼatech kʼaasil».