Antonio: Luis, ¿bix yanikech? Kiʼimak in wóol in kaʼa ilkech.

Luis: Bey xan teen.

Antonio: Tin taasajtech u maas túumbenil U Pʼíich Tulumil Kanan yéetel ¡Despertad! In tuklikeʼ jach yaan u yutstal ta wich.

Luis: Diosboʼotik. U jaajileʼ kiʼimak in wóol úuchik a taal a xíimbalten bejlaʼeʼ tumen yaan baʼax taak in kʼáatiktech.

Antonio: ¿Baʼax túuniʼ?

Luis: Juntéenjeakeʼ tin tsikbaltaj tiʼ in wéet meyajeʼ le revistaʼob ka tsʼáaiktenoʼ jach jatsʼutstakoʼob. Baʼaleʼ tu yaʼalajteneʼ maʼ unaj u seguer in xokikiʼ tumen u j-jaajkunajoʼob Jéeoba bineʼ maʼatech u creertikoʼob Jesús. ¿Jaaj wa leloʼ? Teneʼ tin waʼalajtiʼeʼ yaan in kʼáatiktech ken kaʼa suunakech.

Antonio: Jach maʼalob ikil a kʼáatik tiʼ juntúul u j-jaajkunaj Jéeoba. Tumen utiaʼal a wojéeltik baʼax ku creertik wa máaxeʼ tiʼ letiʼ unaj a kʼáatik.

Luis: Bey in tuklikoʼ.

Antonio: U jaajileʼ u j-jaajkunajoʼob Jéeobaeʼ ku creertikoʼob Jesús. Tsʼoʼoleʼ k-creertikeʼ utiaʼal ka páajchajak u salvarkuba máakeʼ unaj u tsʼáaik u fe tiʼ letiʼ.

Luis: Tin waʼaliliʼeʼ, baʼaleʼ le ka tu yaʼalajten in wéet meyaj maʼ ta creertikeʼex Jesuseʼ tu beetaj in tuukul. Tsʼoʼoleʼ míin mix juntéen tsikbalnakoʼon yoʼolal leloʼ.

Antonio: ¿Jeʼel wa u páajtal in weʼesiktech jujunpʼéel tekstoʼob teʼ Biblia ku yeʼesik unaj k-tsʼáaik fe tiʼ Jesusoʼ? Le tekstoʼobaʼ suuk u meyaj tiʼ u j-jaajkunajoʼob Jéeoba ken tsikbalnakoʼob yéetel le máakoʼoboʼ.

Luis: Maʼalob.

Antonio: Táanileʼ koʼox xokik baʼax tu yaʼalaj Jesús tiʼ juntúul u apóstol teʼ Juan 14:6. Ku yaʼalik: «Jesuseʼ tu yaʼalajtiʼ: ‹Teen le bejoʼ, teen le jaajoʼ yéetel teen le kuxtaloʼ. Mix máak ku náatsʼal tu yiknal le Taata wa maʼ tin woʼolaloʼ›». Jeʼex u yaʼalik le tekstoaʼ, ¿chéen bix jeʼel k-náatsʼal tu yiknal le Taataoʼ?

Luis: Chéen yoʼolal Jesús.

Antonio: Jach beyoʼ. U j-jaajkunajoʼob Jéeobaeʼ bey u creertikoʼoboʼ. Baʼaleʼ taak in kʼáatiktech junpʼéel baʼal. Ken orarnak máakeʼ, ¿tu kʼaabaʼ máax unaj u beetik le oracionoʼ?

Luis: Tu kʼaabaʼ Jesús.

Antonio: Beyoʼ. Le oʼolal ken orarnakeneʼ kin beetik tu kʼaabaʼ Jesús. Bey xan u beetik tuláakal u j-jaajkunajoʼob Jéeobaoʼ.

Luis: Leloʼ jach maʼalob.

Antonio: Uláakʼ teksto maʼalob ka k-xakʼalteʼ Juan 3:16. Le tekstooʼ jach kʼaʼanaʼan, ku yaʼalaʼaleʼ tiʼ ku tsoʼolol tuláakal le Evangeliooʼ. Lelaʼ u kʼáat u yaʼaleʼ wa ka nuʼupuk tiʼ junpʼéeliliʼ teksto tuláakal le baʼax tsʼíibtaʼan yoʼolal u kuxtal Jesús ka anchaj way Luʼumeʼ, láayliʼ yaan u yaʼalik jeʼex Juan 3:16. ¿Jeʼel wa a much xokik le tekstooʼ?

 Luis: Jeʼeleʼ. Ku yaʼalik: «Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul».

Antonio: Diosboʼotik. ¿A wuʼuymaj wa kaʼach le tekstoaʼ?

Luis: Jaaj. Jach suuk u yaʼalaʼal teʼ religión tuʼux kin binoʼ.

Antonio: Jach kʼaj óolaʼan le tekstoaʼ. Wa ka k-jach ileʼ, le baʼax tu yóotaj u yaʼal Jesusoʼ letiʼ lelaʼ: yoʼolal u yaabilaj Dioseʼ jeʼel u páajtal u yantaltoʼon kuxtal minaʼan u xuuleʼ. Baʼaleʼ ¿baʼax kʼaʼabéettoʼon utiaʼal leloʼ?

Luis: Kʼaʼabéettoʼon fe.

Antonio: Beyoʼ. Kʼaʼabéet k-tsʼáaik k-fe tiʼ Jesucristo, u juntúuliliʼ Paal Dios. Lelaʼ ku tsʼáaiktoʼon u páajtalil u yantaltoʼon kuxtal minaʼan u xuul, jeʼex u yaʼalik le táan juʼun 2 tiʼ le revista kin taasiktechaʼ. Teʼ jaats tuʼux ku tsoʼolol baʼax u biilal U Pʼíich Tulumil Kananoʼ, ku yaʼalik: «Ku yáantik máak u tsʼáa u fe tiʼ Jesucristo, le máax kíim utiaʼal ka tsʼaʼabaktoʼon kuxtal minaʼan u xuuloʼ, le máax xan tsʼoʼok u káajal u gobernar tu Reino Diosoʼ».

Luis: ¡Si tak bakáan ta revistaʼex ka waʼalikeʼex ka creertikeʼex Jesús!

Antonio: Jaaj.

Luis: Baʼaleʼ ¿baʼaxten túun le máakoʼoboʼ ku yaʼalikoʼobeʼ maʼatech a creertikeʼex?

Antonio: Yaan baʼaxoʼob beetik u tuukuloʼob beyoʼ. Yaan kʼiineʼ chéen ku yaʼalikoʼob le baʼax ku yuʼubik u yaʼalik u maasiloʼ. Maʼ xaan xaneʼ bey u kaʼansaʼaltiʼob tumen u nuuktakil u religionoʼoboʼ.

Luis: Chéen táan in tuklik lelaʼ: maʼ xaaneʼ yaan máax aʼalikeʼ maʼ ta creertikeʼex Jesús tumen ka waʼalikeʼexeʼ u j-jaajkunajeʼex Jéeoba, maʼ u j-jaajkunajeʼex Jesusiʼ.

Antonio: Maʼ xaaneʼ le oʼolal xan.

Luis: ¿Baʼaxten ka sen tʼaaneʼex yoʼolal Jéeoba?

Antonio: Aan, tumen toʼoneʼ k-creertikeʼ kʼaʼanaʼan k-chʼaʼchiʼitik u kʼaabaʼ Dios, Jéeoba. Jesús, u Paal Dioseʼ, bey xan tu tukliloʼ. Ilawil baʼax tu yaʼalaj Jesús tiʼ u Taata. Koʼox ilik Juan 17:26. ¿Jeʼel wa a much xokik le tekstoaʼ?

Luis: Jeʼeleʼ. «Tsʼoʼok in tsʼáaik u kʼaj óoltoʼob a kʼaabaʼ, yéetel yaan u seguer in tsʼáaik kʼaj óoltbil, utiaʼal ka u yeʼesoʼob yaabilaj jeʼex le yaabilaj ta weʼesajtenoʼ bey xan utiaʼal ka yanaken junmúuchʼ tu yéeteloʼob».

Antonio: Diosboʼotik. Jeʼex a wilkoʼ Jesuseʼ tu tsʼáaj kʼaj óoltbil u kʼaabaʼ u Dios. ¿Baʼaxten ta tʼaan?

Luis: Mmm. Maʼ jach in wojliʼ.

Antonio: Koʼox ilik uláakʼ teksto ku yáantkoʼon k-maas naʼat lelaʼ: Baʼaxoʼob 2:21. Ku yaʼalik: «Tuláakal máax túun ku chʼaʼchiʼitik u kʼaabaʼ Jéeobaeʼ yaan u salvartaʼal». ¿Ka wilik? Utiaʼal k-salvartikbaeʼ kʼaʼabéet k-chʼaʼchiʼitik u kʼaabaʼ Jéeoba. Jesuseʼ jach u yojel xan le jeʼeloʼ, ¿máasaʼ?

Luis: Jaaj, beyoʼ.

Antonio: Le oʼolal Jesuseʼ tu yilaj jach kʼaʼanaʼan ka kʼaj óoltaʼak yéetel ka chʼaʼchiʼitaʼak u kʼaabaʼ Dios tumen u disipuloʼob. Le oʼolal xan k-sen tʼaan tiʼ Jéeoba. K-tuklikeʼ jach kʼaʼanaʼan k-tsʼáaik k-kʼaj óoltbil u kʼaabaʼ Dios yéetel k-áantik u maasil utiaʼal ka u chʼaʼchiʼitoʼob u kʼaabaʼ Dios.

Luis: Baʼaleʼ kex le máakoʼob maʼ u yojloʼob bix u kʼaabaʼ Dios yéetel maʼatech u chʼaʼchiʼitkoʼobeʼ, u yojloʼob máax ku tʼankoʼob.

Antonio: Maʼ xaaneʼ jaaj. Baʼaleʼ ikil u yaʼaliktoʼon Dios bix u kʼaabaʼeʼ, ku yáantkoʼon utiaʼal maʼ u talamtal k-natsʼikba tiʼ letiʼ.

Luis: ¿Baʼax a kʼáat a waʼale?

 Antonio: Tukult lelaʼ: toʼoneʼ maʼ kʼaʼabéet k-ojéeltik u kʼaabaʼ Moisesiʼ. Maʼ xaaneʼ chéen ka aʼalaʼaktoʼon kaʼach letiʼe máax jats le Chak Kʼáaʼnáaboʼ wa letiʼe máax tu kʼamaj le Diez Mandamientosoʼ. Bey xan Noé, ¿baʼaxten k-ojel u kʼaabaʼ? Maʼ xaaneʼ chéen ka k-ojéelt kaʼach letiʼe máax beet le arcaoʼ, wa le máax áant u láakʼtsilil yéetel le baʼalcheʼob utiaʼal u salvarkubaʼoboʼ. Yoʼolal Jesús xaneʼ chéen ka aʼalaʼak kaʼach letiʼe máax lukʼ teʼ kaʼan ka taal kíimil yoʼolal k-kʼebanoʼoboʼ, ¿máasaʼ?

Luis: Bey waloʼ.

Antonio: Baʼaleʼ Dioseʼ tu yilaj ka k-ojéelt u kʼaabaʼ le máaxoʼob tsʼoʼok k-aʼalikoʼ. K-ojéeltik u kʼaabaʼobeʼ ku beetik k-maas kʼaʼajsikoʼob. Kex mix juntéen k-il Moisés, Noé yéetel Jesuseʼ yoʼolal u kʼaabaʼobeʼ k-ojel jach tu jaajil anchajoʼob.

Luis: Mix juntéen in tukult leloʼ, baʼaleʼ míin jaaj baʼax ka waʼalik.

Antonio: Leloʼ uláakʼ baʼax oʼolal u j-jaajkunajoʼob Jéeobaeʼ yaʼab u chʼaʼchiʼitkoʼob u kʼaabaʼ Dios. K-kʼáat k-áant le máakoʼob utiaʼal ka u creertoʼobeʼ Jéeobaeʼ jach tu jaajil juntúul Dios kuxaʼan yéetel jeʼel u páajtal u natsʼkubaʼob tiʼ letiʼeʼ. Baʼaleʼ láayliʼ jach kʼaʼanaʼan k-ilik le meyaj ku beetik Jesús utiaʼal u salvartikoʼonoʼ. Míin maʼalob ka k-xok uláakʼ teksto jeʼel u yáantkoʼon k-naʼat lelaʼ.

Luis: Maʼalob.

Antonio: Maʼ sáamjeakeʼ t-xokaj Juan 14:6. Kʼaʼajaktecheʼ Jesuseʼ tu yaʼalaj: «Teen le bejoʼ, teen le jaajoʼ yéetel teen le kuxtaloʼ». Beoraaʼ koʼox xokik Juan 14:1. ¿Jeʼel wa a much xokik le u tsʼook jaatsoʼ?

Luis: Ajá. Ku yaʼalik: «Tsʼáa a fejeʼex tiʼ Dios yéetel tsʼáa a fejeʼex xan tiʼ teen».

Antonio: Diosboʼotik. A tuklikeʼ ¿unaj wa k-tsʼáaik k-fe tiʼ tu kaʼatúuliloʼob, wa chéen tiʼ juntúuliʼ?

Luis: Jesuseʼ tu yaʼaleʼ tiʼ tu kaʼatúuliloʼob.

Antonio: Beyoʼ. Tsʼoʼoleʼ ¿máasaʼ maʼ chéen yaan yéetel u yaʼalik máak yaan u fe tiʼ Dios yéetel tiʼ Jesusiʼ? U jaajileʼ kʼaʼabéet u yeʼesik máak yéetel u kuxtal jach tu jaajil yaan u fe.

Luis: Jach bey in waʼalik xanoʼ.

Antonio: Baʼaleʼ ¿bix u yeʼesik máak jach tu jaajil yaan u fe tiʼ Dios yéetel tiʼ Jesús? ¿Bix a wilik wa k-ilik u núukil tuláakʼ kʼiin? *

Luis: Maʼalob.