Maʼatech, maʼ aʼalaʼan baʼax kʼiin ken kíimkoʼoniʼ. Le Bibliaoʼ maʼatech u kaʼansik wa destinartaʼan máak. Baʼaxeʼ ku yaʼalikeʼ tuláakal máak ku kíimil tumen «junsúutuk u jáan úuchul wa baʼax» (Eclesiastés 9:11).

¿Baʼaxten le Bibliaoʼ ku yaʼalikeʼ yaan «u súutukil kíimil»?

 Le Bibliaoʼ tiʼ Eclesiastés 3:2, ku yaʼalik: «Yaan u súutukil síijil bey xan u súutukil kíimil, yaan u súutukil paakʼal bey xan u súutukil u joʼokol le baʼax pakʼaʼanoʼ». Pero wa k-xokik tuláakal le capítulo 3 tiʼ Eclesiastésoʼ yaan k-ilkeʼ chéen táan u yaʼalik le baʼaxoʼob ku yúuchul ichil u kuxtal wíinikoʼ, ku síijil yéetel ku kíimil (Eclesiastés 3:1-8). Dioseʼ maʼ u tsʼaamaj u kʼiinil utiaʼal k-kíimiliʼ jeʼel bix maʼ tu obligartik juntúul j-kolnáal paakʼal tiʼ junpʼéeliliʼ kʼiineʼ. Le baʼax taak u kaʼansik le tekstoaʼ es ke wíinikeʼ maʼ unaj u sen chʼíikil u beet wa baʼax ka tak u tuʼubs Diosiʼ (Eclesiastés 3:11; 12:1, 13).

¿Jeʼel wa k-maas chowakkíintik k-kuxtaleʼ?

 Kex maʼ k-jach ojel baʼax kun úuchultoʼon tu kʼiinil sáamaleʼ pero wa k-beetik baʼax maʼalobeʼ jeʼel u maas xáantal kuxaʼanoʼoneʼ. Le Bibliaoʼ ku yaʼalikeʼ «u ley le máaxoʼob yaan u naʼatoʼoboʼ bey u sayabil kuxtaleʼ,lelaʼ ku náachkuntik máak utiaʼal maʼ u léechtaʼal tumen le kíimiloʼ» (Proverbios 13:14). Moisés xaneʼ tu yaʼalaj tiʼ le israelitaʼoboʼ wa ka u beetoʼob baʼax ku yaʼalik u ley Dioseʼ jeʼel u maas xáantal kaʼach u kuxtaloʼobeʼ (Deuteronomio 6:2). Chéen baʼaleʼ wa k-beetik baʼaloʼob kʼaastakeʼ jeʼel xan k-kóomkintik k-kuxtaleʼ (Eclesiastés 7:17).

 Teʼ kʼiinoʼobaʼ kex ka k-beet baʼax uts wa baʼax kʼaaseʼ maʼ tu páajtal k-púutsʼul tiʼ le kíimiloʼ (Romanos 5:12). Chéen baʼaleʼ le Bibliaoʼ ku yaʼalikeʼ yaan u xuʼulul u kíimil máak (Apocalipsis 21:4).