«Le oʼolaleʼ tsʼáabaʼex yáanal u páajtalil u kʼab Dios, utiaʼal ka u nojbaʼalkúunteʼex kéen kʼuchuk u kʼiinil. Mientras u yúuchul leloʼ pʼateʼex tu kʼab Dios tuláakal le kuuch chiʼichnakkúuntikeʼexoʼ, tumen letiʼeʼ jach taak u yáantkeʼex» (1 Pedro 5:6, 7, Túumben Luʼum).

 «Kabalchajak túun a wóoleʼex yáanal u páajtalil u kʼab [Dios], utiaʼal ka líiʼsaʼakeʼex tumen letiʼ le ken kʼuchuk u kʼiinil. Pʼateʼex tuláakal a yaayam óolaleʼex tu kʼab [Dios], tumen letiʼeʼ u tsʼaamaj u yóol u kanáanteʼex» (1 Pedro 5:6, 7, Quiliʼich Biblia ich Maya).

 Yéetel le baʼax tu yaʼalaj Pedrooʼ tu yeʼesaj tiʼ le yáax cristianoʼoboʼ jeʼel u páajtal u jeʼekʼabtik u puksiʼikʼaloʼob tiʼ Dioseʼ yéetel u yaʼalikoʼobtiʼ jach baʼax preocuparkoʼob. Dioseʼ ku bendecirtik le máaxoʼob ku tsʼáaikubaʼob yáanal u páajtaliloʼ wa le máaxoʼob kabal u yóoloʼoboʼ.

 «Tsʼáabaʼex yáanal u páajtalil u kʼab Dios». U páajtalil u kʼab Dioseʼ ku kʼaʼajsiktoʼon le poder yaantiʼ utiaʼal u kanáantik le máaxoʼob meyajtikoʼ (Éxodo 3:19; Deuteronomio 26:8; Esdras 8:22). Juntúul máax meyajtik Dios kabal u yóoleʼ u yojel yaan problemas maʼ kun béeytal u yutskíintik chéen tu juunal, le oʼolal ku kʼáat óoltik u yáantaj Dios (Proverbios 3:5, 6; Filipenses 4:13). U yojleʼ jeʼel u yáantaʼal tumen Dios jach teʼ súutukil kʼaʼabéettiʼoʼ (Isaías 41:10).

 «Utiaʼal ka u nojbaʼalkúunteʼex kéen kʼuchuk u kʼiinil». Le máaxoʼob ku chúukpajal u yóoloʼob tiʼ Jéeobaeʼ u yojloʼobeʼ yaan u kʼuchul u kʼiinil u nojbaʼalkúuntaʼaloʼob wa u yeʼesaʼal utsil tiʼob tumen letiʼ. Jéeobaeʼ maʼ ken u chaʼa u muʼyaj mantatsʼ le máaxoʼob meyajtikoʼ (1 Corintios 10:13). Baʼaxeʼ yaan u yáantkoʼob «jach tu kʼiinil» (Gálatas 6:9).

 «Mientras u yúuchul leloʼ pʼateʼex tu kʼab Dios tuláakal le kuuch chiʼichnakkúuntikeʼexoʼ, tumen letiʼeʼ jach taak u yáantkeʼex». Le máaxoʼob meyajtik Diosoʼ u yojloʼobeʼ ku páajtal u pʼatkoʼob u kuuchoʼob tu kʼab Dios le kéen orarnakoʼob tiʼ letiʼ. Junpʼéel libroeʼ ku tsolikeʼ le baʼax ku yaʼalik le tekstoaʼ u kʼáat u yaʼaleʼ bey kʼaʼabéet u pulik máak u kuuch tu yóokʼol Dioseʼ. Wa ku beetik máak beyoʼ ku pʼáatal sáal u kuuch tumen ku yantaltiʼ le jeetsʼelil «ku tsʼáaik Diosoʼ» (Filipenses 4:6, 7). Toʼoneʼ k-ojleʼ Dioseʼ yaan u yáantkoʼon yéetel le poder yaantiʼoʼ (Salmo 37:5; 55:22).

 Teʼ capítulo 5 ku tsʼoʼokol le yáax carta tu tsʼíibtaj Pedro tiʼ le yáax cristianoʼoboʼ (1 Pedro 1:1). Jeʼex úuchik tiʼ le yáax cristianoʼoboʼ toʼon xaneʼ k-aktáantik jejeláas problemas tumen táan k-meyajtik Jéeoba (1 Pedro 1:6, 7). Como Pedro u yojel baʼax táan u aktáantkoʼobeʼ tu tsʼíibtajtiʼob junpʼéel carta kex tu añoil 62 tak 64 utiaʼal u líiʼsik u yóoloʼob (1 Pedro 5:12).

 Le u tsʼook baʼaxoʼob tu tsʼíibtoʼ meyajnajtiʼ utiaʼal u líiʼsik u yóol le yáax cristianoʼoboʼ. Wa letiʼob ku seguer u yeʼeskoʼob kabal óolal kaʼacheʼ Dioseʼ yaan u tsʼáaiktiʼob u muukʼil utiaʼal u seguer u chúukpajal u yóoloʼob (1 Pedro 5:5-10). Le carta tu tsʼíibtaj Pedrooʼ jach jeʼel u yáantik le máaxoʼob táan u chʼaʼpachtaʼaloʼob teʼ kʼiinoʼobaʼ.

 Utiaʼal a wilik tiʼ uláakʼ baʼaxoʼob ku tʼaan u Yáax Tsʼíib Pedroeʼ chaʼant le videoaʼ.