U j-jaajkunajoʼob Jéeobaeʼ suuk u kʼaʼaytajoʼob joonaj joonajil, baʼaleʼ beoraaʼ tsʼoʼok u suuktal xan u kʼaʼaytajoʼob yéetel carritoʼob; le nuʼukuloʼobaʼ ku meyaj utiaʼal u yeʼesaʼal publicacionoʼob tiʼ le máakoʼoboʼ.

Maʼ sen úucheʼ káaj u maas tsʼáaik u yóol u kʼaʼaytajoʼob beyaʼ. Tu mesil noviembre tiʼ 2011, junmúuchʼ j-Jaajkunajoʼob tu noj kaajil Nueva Yorkeʼ káaj u meyajtiʼob carritoʼob, mesaʼob yéetel uláakʼ nuʼukuloʼob utiaʼal u yeʼeskoʼob tiʼ le máakoʼob le publicacionoʼob ku tʼaanoʼob tiʼ le Bibliaoʼ. Como ilaʼab ku taasik yaʼab utsileʼ chʼaʼtuklaʼab u beetaʼal tiʼ uláakʼ kaajoʼob.

Tu mesil marzo tiʼ 2015, tsʼokaʼaniliʼ u kʼuʼubul 165,390 carritoʼob tiʼ le múuchʼuliloʼob yaan tiʼ u j-jaajkunajoʼob Jéeoba tiʼ tuláakal yóokʼol kaaboʼ. Tsʼoʼoleʼ yaan uláakʼ nuʼukuloʼob táan u meyaj utiaʼal u yeʼesaʼal le publicacionoʼoboʼ, jeʼex mesaʼob, quioscoʼob yéetel uláakʼ baʼaloʼob beyaʼ.

Tak bejlaʼeʼ u j-jaajkunajoʼob Jéeobaeʼ maases joonaj joonajil ku tsikbaltikoʼob le baʼax ku yaʼalik le Bibliaoʼ. Kex beyoʼ le nuʼukuloʼob ku meyaj utiaʼal u yeʼesaʼal le publicacionoʼoboʼ yaʼab utsiloʼob tsʼoʼok u taasik. Koʼox ilik.

Tu luʼumil Perueʼ juntúul máak u kʼaabaʼ Rauleʼ náatsʼ yiknal le j-Jaajkunajoʼob táan u kʼaʼaytajoʼoboʼ ka tu yaʼalajtiʼob: «¿Tuʼux tsʼokaʼaneʼex kaʼachi? Tres años tin máan in kaxteʼex. Ka tin wilaj a carritoʼexeʼ tin tsʼáaj gracias tiʼ Dios».

Kex suuk u máan le j-Jaajkunajoʼob tu jool u yotochoʼ, Rauleʼ maʼ kulaʼan de kʼiin mix tu jóokʼbal le semanaoʼ. Tu yaʼalajeʼ kaʼacheʼ ku xook yéetel le j-Jaajkunajoʼoboʼ, yéetel beoraaʼ u kʼáat u seguerte. Ka túun ilaʼab u kaʼa tsʼaʼabal xook tiʼ.

Teʼ Bulgariaoʼ juntúul táankelem máak yéetel u yataneʼ, jáan jeʼeloʼob tiʼ junpʼéel u carritoil le publicacionoʼoboʼ ka tu chʼaʼajoʼob le libro Le baʼax jeʼel u beetik u yantal kiʼimak óolal ichil le familiaoʼ. Suunajoʼob tuláakʼ semanaeʼ ka tu chʼaʼajoʼob uláakʼ kaʼapʼéeliʼ: U libroi tsikbaliloʼob tiʼ le Bibliaoʼ yéetel Kaanbalnakoʼon tiʼ le Maʼalob j-Kaʼansajoʼ. Le j-Jaajkunaj waʼalakbal tu tséel le carritooʼ tu kʼáataj u yuʼub tiʼob jaytúul u paalaloʼob yaan. Letiʼobeʼ tu núukoʼob: «Tak beoraaʼ mix juntúul, baʼaleʼ wa ku yantaleʼ k-kʼáat ka u kʼaj óoltoʼob Dios. Le libroʼobaʼ jach jeʼel u yáantkoʼonoʼobeʼ».

Teʼ Ucranianoʼ juntúul máak yaan u nookʼil soldado tiʼeʼ náatsʼ yiknal jujuntúul x-Jaajkunajoʼob táan u kʼaʼaytajoʼob yéetel junpʼéel carritoeʼ ka tu yaʼalajtiʼob: «X-chʼúupalaleʼex, aʼaleʼexten baʼax kʼiin u taal le Armagedonoʼ». Le máakaʼ maʼ sen úuch suunak tiʼ le baʼateltáambal anchaj Ucraniaoʼ. Yoʼolal le baʼaxoʼob ku yúuchul way yóokʼol kaaboʼ tu tsʼáaj cuenta jach taʼaytak u taal le Armagedonoʼ, le oʼolal táan u tuklik kaʼach baʼaxten maʼ u beet Dios mix baʼaliʼ. Le x-chʼúupalaloʼob j-Jaajkunajoʼoboʼ tu yeʼesoʼobtiʼ yéetel le Bibliaoʼ Dioseʼ yaan baʼax oʼolal maʼ u taas le Armagedonoʼ, pero maʼ tun xáantaleʼ yaan u xuʼulsik tuláakal le baʼaloʼob kʼaastakoʼ. Tu tsʼookeʼ le máakoʼ tu bisaj le revistaʼob U Pʼíich Tulumil Kanan yéetel ¡Despertad!, bey xan le libro ¿Existe un Creador que se interese por nosotros?

Teʼ Macedoniaoʼ náatsʼ juntúul xiʼipal yiknal le j-Jaajkunajoʼob ku kʼaʼaytajoʼob yéetel u carritoʼoboʼ ka tu yaʼalajtiʼob tsʼoʼok u xokik le revistaʼoboʼ yéetel beoraaʼ u kʼáat u xok le libro ¿Baʼax jach tu jaajil ku kaʼansik le Bibliaoʼ? Ka tsʼaʼabtiʼeʼ tu yaʼaleʼ jach táan u bin u xok teʼ bibliotecaoʼ.

Ka máan kaʼapʼéel horaeʼ tsʼoʼokiliʼ u xokik le yáax 79 táan juʼunoʼoboʼ. Suunajeʼ ka tu yaʼalaj: «Le libroaʼ ku kʼexik u kuxtal máak. Tin tsʼáaj cuentaeʼ yaʼab baʼaloʼob maʼ jeʼex in tukultmaj kaʼachoʼ. Chíikaʼan jach jaaj baʼax ku yaʼalik le libroaʼ. Beoraaʼ yaanal bix in wilik le kuxtaloʼ».