AGU aboro naida kuti gu yugopai nga ga Tirinita, i naya wẽ Mbori sa aboro kidu rogokoyo biata, nga Ba, Wiri, na Ziazia Toro. I naya agi aboro biata re dunduko rengbeyo arengba, i dunduko du na tandu apai dũ, na i dunduko naadunga na tonatona yo ti ni ya. I naya wẽ Ba nga Mbori, Wiri nga Mbori, na Ziazia Toro nga Mbori, ono Mbori ho gbua kina sa.

Dungu agu aboro idi kuti gu yugopai nga ga Tirinita ima ida gupai nga i arengbanga ka sakarogoyo te. Ono tie, i naberãha nga Ziazia Kekeapai nagumbapai agumba wa gure. Ono si naida mo ini gupai nga, gu fugo nga “Tirinita,” si rogo Ziazia Kekeapai te. Ono ya mo Ziazia Kekeapai nagumba gupai nawira pai wa gure? Tipa ka karagapai kuti gu sanahe re, ani bingo gu veresi aboro naayugoho nga aguyo idi kuti gupai nga ga Tirinita.

Yoane 1:1 naya: “Mbata rago nikaenga Pai adu kina ho, aPai adu na Mbori, Pai adu ni Mbori.” Rogo kina gu bangisa kapita re, Yoane agumba gupai ziazia nga “Pai” nga Yesu. (Yoane 1:14) Wa duhe nga i ya tipa ko wẽ ko adu ni Mbori, si du kura aboro aya ti ni wẽ Wiri na Ba nga bangisa Mbori sa.

Ono wa vura duhe nga Ziazia Kekeapai pe gupai nga “Pai adu ni Mbori,” anga rogoyo nga ko angia kina gu Mbori i adu na ko te. Ko adu ni Mbori rogo gu gene nga, ko adu na tandu apai tiko susi kura awiri Mbori dunduko nga aguyo nga atoro. Si du kura abasafugo Ziazia Kekeapai asa gu veresi du kuari re ti ni nga: “Pai adu na Mbori na kidu wakina ko.”—The Translator’s New Testament.

Dungu aboro ainongo gu pa-Giriki i ake Ziazia Kekeapai rogoho te. Wa duhe tie wo, wai rengbe ani ka ino gupai nzunzu naadu berã Yoane yo ho ko akepai ni tipa padu Yesu na Mbori. Mo bingo gi kpiapai re: Bayugupai sakirogopai yo fu agude-sukuru. Fuo gure, agude girogo gupai yo ko nayuguhe ni bakiakia. Wai rengbe agu agude re kada kuti rengo? I rengbe ka sana kina gu bayugupai re ko sakirogoyo berewe. Pa wirikayo kura apai tipa gupai re rengbe ka undoyo i girogoyo wenengai. Wakina gure a, tipa ka giarogo gupai yo wenengai Yoane 1:1 agumbaha, si naida mo gedi kura apai Yoane akehe berewe rogo gako Kitabu Wene Pangbanga. Pa wirika mo kura apai rengbe ka undoro mo girogo gupai yo wenengai ko apehe.

Ni kpiapai, mo bingo gupai Yoane akehe berewe rogo kapita 1, veresi 18, nga gu naya: “Anga boro sa nabi Mbori wa sa te.” Ono tie, aboro aima bi Yesu, nga Wiri Mbori, mbiko Yoane aya: “Pai asa tiko asa ni boro, ki niraki dagba rani, Ko ahi be undahe na rengo. Ani angana gako taarimo.” (Yoane 1:14) Sidu tie, ka Wiri awiripa du wai ni papara Mbori Du na Tanduapai Dũ wa duhe nga ko tigako aboro aima biko? Yoane aya a wẽ Pai ‘adu na Mbori.’ Wai rengbe boro kadu na kurani ka si du nga ní nga kina gu boro re? Kurigure berewe, a wa duhe ni kekehe rogo Yoane 17:3, Yesu ayugu gu kparakparapai du tiko na Bako ziazia. Ko aya ti Bako wẽ Ko nga “bangisa ndikidi mbori.” Na nimbedi kuti digido ga Yoane kitabu, ko aya tipa agu apai ko akehe wẽ: “Gi du ni keke he re, oni idi pa Yesu ya Kristo nga ko, nga Wiri Mbori.” (Yoane 20:31) Mo bi gupai nga, i yambu Yesu nga Wiri Mbori angianga Mbori ya. Gi kura averesi ani nabihe rogo Yoane re nayugo rogo gupai yo furani du  rogo Yoane 1:1. Yesu, nga Pai, ko nga “Mbori” rogo gu gene nga pako ima kio ono angianga wa ga Bako nga gu Mbori Du na Tanduapai Dũ ya.

Mo berẽnga berewe tipa gu kpiapai du tipa bayugupai na agude-sukuru. Ka si du nga bayugupai vura sakarogopai yo berewe kura boro kidu na kapa kindi, ginipai ka i mangihe? Gupai ka si idihe nga ka sana kura bayugupai tipa gupai re. Ka si du nga gu ue bayugupai re gumba kina gu bangisapai gu bambata ko nigumbaha, badungu agude ka idi kuti gupai re. Wakina gure a, ka si du nga mo agianga rogo gupai yo Yoane agumbaha tipa Yesu na Bako te, si naida mo bi gupai kura bake Ziazia Kekeapai agumbaha. Mo bingo gupai Matayo akehe. Ko adi fugo Yesu ki gumbaha nibipa digida zegino ki ya: “Boro aina nga gu uru na gu saa wa sa te re, amaraika ngbangbaturũ a te, Wiri a te, ono kina Ba.” (Matayo 24:36) Wai gi fugo Yesu re ayugo gupai nga Yesu nga gu Mbori Du na Tanduapai Dũ te?

Yesu aya wẽ Ba ini apai kisusi Wiri. Ka Yesu angia papara gu Mbori Du na Tanduapai Dũ, ka ko aima ino agu apai dunduko Bako nainihe. Sidu tie, Wiri arengbanga kadu sa na Ba te. Ono kura aboro naya wẽ: ‘Yesu adu rogo angbatunga ko ue, kini ya wẽ ko afura ane ni boro.’ Ono ka si avura duwo, na ziazia toro tigaha? Ka si du nga ziazia toro nga kina Mbori a, tipagine Yesu aayanga ti ni wẽ si ima ino agu apai Ba nainihe ya?

Wa mo nikaa wirika apai kindi rogo Ziazia Kekeapai, mo nika ino kura dungu apai aino Ziazia Kekeapai agumbaha tipa gipai re. Si nayugo gu rengo furani du tipa Ba, Wiri, na ziazia toro.—Atambuahe 90:2; Amokedi 7:55; AKorosaio 1:15.