Kukhona imithandazo uNkulunkulu angayiphenduli. Cabangela izizathu ezimbili ezingenza uNkulunkulu angawulaleli umthandazo.

1. Umthandazo ungqubuzana nentando kaNkulunkulu

UNkulunkulu akaziphenduli izicelo ezingqubuzana nentando yakhe, noma izimfuneko zakhe, eziseBhayibhelini. (1 Johane 5:14) Ngokwesibonelo, iBhayibheli lithi kufanele sigweme ukuhaha. Ukugembula kuwukuhaha. (1 Korinte 6:9, 10) Ngakho, uNkulunkulu ngeke akuphendule uma uthandazela ukuba uwine i-lottery. UNkulunkulu akayena umenzi wemilingo ongambiza bese ekwenzela okufunayo. Empeleni, kufanele ujabule ngalokho. Ukube bekunjalo, cabanga nje ukuthi abanye babengase bamceleni uNkulunkulu.—Jakobe 4:3.

2. Umuntu othandazayo akalaleli

UNkulunkulu akabalaleli labo abenza izinto angazifuni. Ngokwesibonelo, uNkulunkulu wathi kulabo ababethi bayamkhonza kodwa bengamlaleli: “Ngisho noma nenza imithandazo eminingi, angilalele; zona kanye izandla zenu zigcwele igazi.” (Isaya 1:15) Ukube bazishintsha izindlela zabo futhi ‘balungisa izindaba’ noNkulunkulu, wayeyobalalela lapho bethandaza kuye.—Isaya 1:18.