Izingqondo Ezihlukumezekile

UNICOLE ubelokhu eba nemizwelo yosizi ngezikhathi ezithile kusukela eseneminyaka engu-14 ubudala. Nokho, lapho eseneminyaka engu-16, waqala ukwehlelwa okuthile okusha—umuzwa wokwesasa ongavamile kanye nomdlandla ongalawuleki. Ukuyaluza komqondo, inkulumo engahlangani, nokuqwasha kwakuhambisana nezinsolo ezingenasisekelo zokuthi abangane bakhe babemxhaphaza. Ngokulandelayo, uNicole wathi wayengashintsha imibala yezinto ngokuthanda kwakhe. Kuleli qophelo, unina kaNicole waqaphela ukuthi kwakudingeka usizo lwezokwelapha, ngakho wayisa uNicole esibhedlela. Ngemva kokubhekisisa imizwelo kaNicole eguquguqukayo, odokotela bagcina befinyelele kulesi siphetho: UNicole wayenesifo sokuphazamiseka kwengqondo. *

NjengoNicole, izigidi zabantu emhlabeni wonke zinokuphazamiseka kwemizwelo—kungaba ukuphazamiseka kwengqondo okuguquguqukayo noma olunye uhlobo lwesifo sokucindezeleka. Imiphumela yalezi zifo ingaba mibi kakhulu. USteven, onesifo sokuphazamiseka kwengqondo okuguquguqukayo, uthi: “Kwaphela iminyaka eminingi ngisezinhlungwini. Ngangizizwa ngicindezeleke kakhulu, kuthi kusenjalo ngizithole sengeneme ngokweqile. Ukuthola ukwelashwa kwakusiza, kodwa kwakuseyimpi enzima.”

Kubangelwa yini ukuphazamiseka kwemizwelo? Kunjani ukuba nesifo sokucindezeleka noma sokuphazamiseka kwengqondo okuguquguqukayo? Abagulayo—kanye nabanakekeli babo—bangakuthola kanjani ukusekelwa abakudingayo?

[Umbhalo waphansi]