ОЛА БИЛСИН, сиз мәјуслуг, гәзәб вә ја инҹиклик кими ҝүҹлү һиссләрин әсирисиниз. Белә һалда, јәгин, сизин ваҹиб олан шејләр үчүн, демәк олар ки, вахтыныз вә ҝүҹүнүз галмыр. Бәс бу проблеми неҹә һәлл едә биләрсиниз? *

Давуд пејғәмбәр нараһатчылыг вә мәјуслуг кими гарышыг һиссләр кечирирди. Бунун өһдәсиндән ҝәлмәјә она нә көмәк едирди? О, вәзијјәти Аллаһын өһдәсинә бурахырды (1 Ишмуил 24:12, 15). Һәмчинин о, һиссләрини гәләмә алырды. Бундан әлавә, иман саһиби олан Давуд пејғәмбәр тез-тез дуа едирди *.

Ҝириш мәгаләдә дејилдији кими, Грегори тәшвиш позунтусу хәстәлијиндән әзијјәт чәкир. О дејир: «Мән һәддиндән артыг нараһатчылыг кечирирдим вә һеч ҹүр өзүмү әлә ала билмирдим». Бәс Грегори бунун өһдәсиндән неҹә ҝәлди? О бөлүшүр: «Таразылығы горумаг үчүн һәјат јолдашымын вә достларымын ҝөстәрдикләри көмәји гәбул етдим. Һәмчинин һәкимлә мәсләһәтләшиб вәзијјәтимлә бағлы чохлу мәлумат өјрәндим. Һәјат тәрзимдә бәзи дәјишикликләр едәндән сонра анладым ки, мән вәзијјәти јох, вәзијјәт мәни идарә едирмиш. Дүздүр, һәлә дә вахташыры нараһатчылыг кечирирәм, амма нәләрин буна сәбәб олдуғуну инди даһа јахшы баша дүшүрәм вә белә вәзијјәт өзүмү неҹә әлә алаҹағымы билирәм».

Әҝәр мәнфи һиссләрин әсирисинизсә, нөвбәти аддымлары атын:

• Һиссләринизи кағыза јазын.

• Һиссләринизи аилә үзвләринизлә вә ја достларынызла бөлүшүн.

• Һиссләринизлә мүбаризә апарын. Мәсәлән, өзүнүздән сорушун: «Нәјә ҝөрә өзүм барәдә јанлыш фикирдәјәм? Буна әсаслы сәбәбим вар?»

• Тәшвишин, гәзәбин вә ја инҹиклијин тәсири алтында галмајын. Әксинә, ҝүҹүнүзү сәмәрәли шејләрә сәрф един *.

Хүласә. Адәтән, мәнфи һиссләрин јаранмасына сәбәб вәзијјәтимиз јох, она олан мүнасибәтимиздир.