Mari—aksepte e imit Legzanp Lotorite Kris
Mari—aksepte e imit Legzanp Lotorite Kris
“Kris i sef tou zonm.”—1 KORENTYEN 11:3.
1, 2. (a) Ki mannyer nou konnen si en msye marye pe reisi dan son fanmiy? (b) Akoz i neseser pour aksepte ki maryaz i sorti kot Bondye?
KI MANNYER ou konnen si en msye marye pe reisi dan son fanmiy? Eski i son abilite fizik oubyen entelektyel ki konte? Eski se kantite larzan ki i gannyen ki enportan? Ouswa sa ki pli enportan se si i tret son madanm ek zanfan avek bokou lanmour ek labonte. Dan sa dernyen domenn, bokou mari pa tro byen reisi akoz zot les zot ganny dirize par lespri lemonn ek bann standar imen. Akoz? Prensipalman akoz zot pa aksepte e met an pratik gidans ki sorti kot sa Enn ki’n konmans maryaz, sa Enn ki ti fer sa premye fanm apartir en kot ki i ti’n pran avek premye zonm e ki i ti anmenn li kot sa zonm.—Zenez 2:21-24.
2 Zezi ti konfirm sa resi dan Labib kot Bondye ti konmans laranzman maryaz, ler i ti dir bann ki ti kritik li: “Zot pa’n lir, ki depi okonmansman kreater ti fer zot mal ek femel, e ti dir: ‘Pour sa rezon, en zonm pou kit son papa ek son manman pour ini avek son madanm, e toulede zot vin en sel laser.’ Zot nepli de me en sel. Alor sa ki Bondye in ini ansanm zonm pa devre separe.” (Matye 19:4-6) Alors, pour reisi en maryaz fodre aksepte ki maryaz i sorti kot Bondye e ki i neseser pour met an pratik bann lenstriksyon ki sorti dan Parol Bondye, Labib.
Lakle pour vin en bon Mari
3, 4. (a) Akoz Zezi i konn bokou lo maryaz? (b) Dan en sans senbolik, lekel ki madanm Zezi, e ki mannyer bann mari i devret tret zot madanm?
3 En keksoz ki pou ed en mari reisi i ler i etidye sa ki Zezi ti dir e imit sa ki Zezi ti fer. Zezi i konn en kantite lo maryaz akoz i ti la ler sa premye koup ti ganny kree e ler zot ti marye. Zeova ti dir Zezi: “Annou fer zonm parey nou, dan nou resanblans.” (Zenez 1:26) Wi, Zeova ti pe koz avek sa Enn ki I ti kree avan tou lezot keksoz, sa enn ki ti vin “en zouvriye abil akote li.” (Proverb 8:22-30) Li ki “premye-ne tou kreasyon” e “konmansman kreasyon Bondye,” ki ti egziste menm avan ki liniver ti ganny kree.—Kolosyen 1:15; Revelasyon 3:14.
4 Zezi i ganny apele “Lanyo Bondye,” e dan en sans senbolik i ganny reprezante konman en mari. En zour en lanz ti dir: “Vini, mon a montre ou Nouvel-Marye, madanm Lanyo.” (Zan 1:29; Revelasyon 21:9) Lekel sa nouvel marye oubyen madanm Zezi? “Madanm Lanyo” i sa group Kretyen fidel ki’n ganny swazir par lespri sen ki pou rennyen dan lesyel avek Kris. (Revelasyon 14:1, 3) Pour sa rezon, lafason ki Zezi ti tret son bann disip ler i ti lo later, i vin en model pour bann mari Kretyen lo konman pour tret zot madanm.
5. Zezi i en model pour lekel?
5 I vre ki dan Labib Zezi i ganny prezante konman en legzanp pour tou son bann disip, par egzanp nou lir: “Kris limenm in soufer pour zot, an lesan pour zot en legzanp pour zot swiv.” (1 Pyer 2:21) Me selman i en model spesyalman pour bann zonm. Labib i dir: “Kris i sef tou zonm, ki en mari i sef son madanm e Bondye i sef Kris.” (1 Korentyen 11:3) Vi ki Kris i sef zonm, bann mari i bezwen imit son legzanp. Pour ki en fanmiy i reisi e i ere, zot bezwen rekonnet lekel ki annan lotorite lo lekel e bann mari i bezwen tret zot madanm avek menm lanmour ki Zezi ti tret son madanm senbolik setadir son bann disip swazir.
Ki mannyer pour fer fas avek bann Problenm dan Maryaz
6. Ki mannyer bann mari i devret tret zot madanm?
6 Dan sa lemonn trouble, bann mari i sirtou bezwen swiv legzanp Zezi pour demontre pasyans, lanmour, e ki zot serye avek bann prensip drwat Bondye. (2 Timote 3:1-5) Konsernan legzanp Zezi, nou kapab lir dan Labib: “Zot osi bann msye, zot devre viv dan larmoni [dapre konnesans] sakenn avek son madanm.” (1 Pyer 3:7) Wi, bann mari i bezwen fer fas avek bann difikilte dan maryaz avek en bon konnesans parey Zezi ti fer ler i ti rankontre difikilte. I ti pas atraver plis leprev ki okenn lezot imen, me i ti konpran ki Satan, son bann demon ek sa lemonn mesan ki par deryer tousala. (Zan 14:30; Efezyen 6:12) Zezi pa ti zanmen sirprann ki i ti pe pas dan bann leprev, alor i devret menm zafer ler bann ki’n marye i ‘ganny problenm dan zot lavi.’ Labib i averti ki bann ki marye i kapab ekspekte serten difikilte.—1 Korentyen 7:28.
7, 8. (a) Konman bann mari i kapab tret son madanm dapre konnesans? (b) Akoz bann madanm i merite resevwar loner delapar zot mari?
7 Dapre Labib, bann mari i devret “viv dan larmoni [dapre konnesans] sakenn avek son madanm e rekonnet ki bann madanm i annan en natir pli feb.” (1 Pyer 3:7) En mari pa pou dominer e dir avek son madanm parey Labib ti predir bokou zonm pou ete. Okontrer en mari ki rod laprouvasyon Bondye pou onor son madanm. (Zenez 3:16) I pou anvi tret li parey en keksoz ki annan bokou valer e i pa pou zanmen maltret li akoz i pli for ki li. Plito, i pou pran an konsiderasyon son santiman e i pou touzour tret li avek respe ek dinite.
8 Akoz bann mari i devret onor zot madanm? Labib i donn larepons: “Parski bann madanm, zot osi partaz ansanm avek zot, sa kado lavi ki Bondye [i] donnen. Dan sa fason zot lapriyer pa pou ganny okenn lobstak.” (1 Pyer 3:7) Bann mari i bezwen konpran ki Zeova pa zanmen konsider en zonm ki pe ador li pli siperyer ki en madanm ki pe fer menm parey. Bann madanm ki ganny aprouve par Bondye pou resevwar menm rekonpans ki bann zonm, setadir lavi eternel. Bokou madanm pou menm al viv dan lesyel kot i ‘nepli annan zonm ek fanm.’ (Galat 3:28) Alor bann mari i bezwen rapel ki se fidelite en dimoun ki fer li annan valer dan lizye Bondye, pa si i en zonm ouswa en fanm, en msye oubyen en madanm ouswa menm en zanfan.—1 Korentyen 4:2.
9. (a) Dapre zapot Pyer, pour ki rezon bann mari i devret onor zot madanm? (b) Ki mannyer Zezi ti demontre loner pour bann madanm?
9 Bann dernyen parol zapot Pyer i met lanfaz lo lenportans pour bann mari onor zot madanm ler i dir avek bann mari pour ki zot “lapriyer pa pou ganny okenn lobstak.” Pa i ti pou vreman danzere si sa ti ariv avek en msye! I ti menm kapab anpes konpletman lapriyer sa msye ariv kot Zeova parey i ti arive avek serten serviter Bondye ki ti neglizan dan letan lontan. (Lamantasyon 3:43, 44) Alor bann zonm marye oubyen ki anvi marye pou demontre lasazes par etidye sa bon fason ki Zezi ti tret bann madanm avek dinite. I ti akeyir zot dan sa group ki ti al avek li partou dan son minister, e i ti tret zot avek respe ek labonte. En zour Zezi ti menm donn en nouvel vreman eksitan avek bann madanm premye, epi i ti demann zot pour al dir bann zonm!—Matye 28:1, 8-10; Lik 8:1-3.
En Legzanp sirtou pour bann Mari
10, 11. (a) Akoz bann mari i byen bezwen etidye legzanp Zezi? (b) Ki mannyer bann mari i demontre zot lanmour pour zot madanm?
10 Parey nou ti dir pli boner, Labib i konpar relasyon en msye ek son madanm avek relasyon Kris ek son madanm, setadir kongregasyon bann Kretyen swazir. Labib i dir: “En mari i sef son madanm parey Kris i sef [kongregasyon].” (Efezyen 5:23) Sa parol i devret ankouraz bann mari pour egzamin lafason ki Zezi ti egzers son lotorite oubyen diriz son bann disip. Si zot fer sa, alor zot pou kapab byen swiv legzanp Zezi e pran swen, kontan e donn en bon gidans avek zot madanm parey Zezi ti fer avek kongregasyon.
11 Labib i demann bann Kretyen: “Zot, bann mari, [kontinyen] kontan zot madanm parey Kris in kontan [kongregasyon] e in donn son lavi pour li.” (Efezyen 5:25) Dan sapit 4 sa menm liv, ‘kongregasyon’ i ganny apele “lekor Kris.” Dan sa lekor oubyen group senbolik, i annan bokou dimoun, tou le de zonm ek fanm, e zot tou zot kontribye pour ki sa lekor i mars byen. Byensir Zezi ki sef oubyen “latet sa lekor” ouswa kongregasyon.—Efezyen 4:12; Kolosyen 1:18; 1 Korentyen 12:12, 13, 27.
12. Konman Zezi ti demontre lanmour pour son lekor senbolik?
12 Zezi ti demontre lanmour pour son lekor senbolik setadir ‘kongregasyon,’ spesyalman par lafason ki i ti pran swen avek zentere bann ki ti konmans fer parti kongregasyon. Par egzanp ler son bann disip ti fatige, i ti dir zot: “Vin avek mwan dan en landrwa trankil kot zot a kapab repoze an-pe.” (Mark 6:31) Zis detrwa er-d-tan avan Zezi ti ganny egzekite, la sa ki Zezi ti dir parey enn son zapot ti rakonte: “I ti’n touzour kontan bann dimoun ki ti pour li . . . , e i’n kontan zot ziska lafen.” (Zan 13:1) Pa sa i en zoli legzanp pour bann msye swiv dan lafason ki zot tret zot madanm!
13. Konman bann mari i ganny demande pour kontan zot madanm?
13 Zapot Pol osi ti servi legzanp Zezi ler i ti donn sa konsey avek bann mari: “Bann zonm devre alor, kontan zot madanm parey zot kontan zot prop lekor. Sa ki kontan son madanm, i kontan son prop lekor. Annefe napa personn ki’n deza ay son prop lekor, okontrer, i nouri li e pran byen swen avek li, parey Kris i fer pour [kongregasyon].” I ti osi dir: “Fodre ki sak mari i kontan son madanm parey son prop lekor.”—Efezyen 5:28, 29, 33.
14. Ki mannyer en mari i tret son lekor enparfe, e ki mannyer sa i kapab ed li pour konnen konman i devret tret son madanm?
14 Annou mazin parol Pol, lekel sa mari ki ti pou fer son lekor ditor par ekspre? Si en zonm i tap son lipye, eski i pou bat son lipye akoz i ti pros pour fer li tonbe? Ditou! Eski en mari pou abes son lekor devan son bann zanmi ouswa dir son bann fot devan tou dimoun? Non! Alors akoz i devret tap son madanm avek parol oubyen pli pir ankor bat li si i’n fer en fot? Bann mari pa devret zis rod sa ki dan zot lavantaz me sa ki bon pour zot madanm.—1 Korentyen 10:24; 13:5.
15. (a) Ki Zezi ti fer ler son bann disip ti demontre en serten febles? (b) Ki leson nou kapab tire avek son legzanp?
15 Annou gete konman Zezi ti demontre konsern pour son bann disip ler zot ti montre en serten febles sa zour swar avan son lanmor. Menm si i ti demann zot plizyer fwa pour priye, trwa fwa zot ti tonm dormi dan zarden Zetsemane. En sel kou, bann zonm arme ti antour zot. Zezi ti demann zot: “Lekel ki zot pe rode?” Ler zot ti reponn: “Zezi-de-Nazaret,” i ti dir: “Mwanmenm mwan.” Vi ki i ti konnen ki son ler ti’n vini pour li mor, i ti dir: “Alor si se mwan ki zot pe rode, les lezot sa bann zonm ale.” Zezi ti toultan vey lo byennet son bann disip, andotmo lo son madanm senbolik. Alor, i ti fer fason pour zot kapab sove. Bann mari ki etidye ki mannyer Zezi ti tret son bann disip, pou vwar bann prensip ki zot kapab aplike lo konman pour tret zot madanm.—Zan 18:1-9; Mark 14:34-37, 41.
Lanmour Zezi pa ti santimantal
16. Ki santiman Zezi ti annan anver Mart, e pourtan ki mannyer Zezi ti koriz Mart?
16 Labib i dir: “Zezi ti kontan Mart, son ser Mari, ek son frer Lazar,” ki souvan-d-fwa ti envit Zezi kot zot. (Zan 11:5) Pourtan Zezi pa ti ezite pour donn konsey avek Mart ler i ti tro preokipe avek kwi manze. Akoz finalman sa ti anpes li benefisye an plen avek lansennyman Zezi. I ti dir: “Mart, Mart, ou pe trakas ou e trouble ou avek bokou keksoz. En sel keksoz i neseser.” (Lik 10:41, 42) San okenn dout, lafeksyon ki Zezi ti annan pour Mart ti evidan e sa ti fer li fasil pour li aksepte son konsey. I osi parey pour bann mari ki devret tret zot madanm avek labonte, en lapros ranpli avek lanmour, ek bann parol byen adapte. Parkont ler en azisteman i neseser, napa nanryen mal pour koz dan en fason fran parey Zezi ti fer.
17, 18. (a) Ki mannyer Pyer ti repros Zezi, e akoz Pyer ti bezwen ganny korize? (b) Ki responsabilite en mari i annan?
17 En lot fwa, Zezi ti dir son bann zapot ki i ti bezwen al Zerizalenm kot i ti pou ‘soufer en kantite par bann ansyen, sef pret ek bann profeser lalwa. I ti pou ganny met amor, me apre trwa zour i ti pou resisite.’ Pyer ti anmenn Zezi akote e konmans repros li: “Zanmen Senyer! Sa pa pou zanmen ariv ou.” I evidan ki reaksyon Pyer ti ganny enfliyanse par son santiman. I ti apropriye pour Pyer ganny korize. Alors Zezi ti dir li: “Ale! Sorti la Satan! Ou en ros dan mon semen, ou pa mazin parey Bondye me konman zonm.”—Matye 16:21-23.
18 Zezi ti fek mansyonn avek son bann zapot ki i ti lavolonte Bondye pour li soufer e ganny met amor. (Psonm 16:10; Izai 53:12) Alor pour sa rezon, Pyer ti mal pour repros Zezi lo sa size. Pyer ti bezwen ganny korize, parey nou tou nou bezwen parler. En mari i sef son lakour e i annan lotorite ek responsabilite pour koriz bann manm son fanmiy, sa i enkli son madanm. Menm si i bezwen ferm, i devret toultan koz avek lezot dan en bon fason avek douser ek lanmour. Alors zis parey Zezi ti ed Pyer pour annan en bon pwennvi, bann mari osi i kapab parler fer parey avek zot madanm. Par egzanp, kekfwa avek ladouser sa msye pou bezwen montre son madanm akoz i bezwen fer bann pti azisteman kot i neseser dan domenn labiyman, bizou oubyen makiyaz pour swiv bann konsey lo laparans ki dan Labib.—1 Pyer 3:3-5.
I bon pour bann Mari demontre Pasyans
19, 20. (a) Ki problenm ki ti leve avek bann zapot Zezi, e ki Zezi ti fer? (b) Ki bon rezilta Zezi ti gannyen?
19 Si i annan en fot ki bezwen ganny korize, bann mari pa devret ekspekte ki zot zefor senser pour aziste sa sitiasyon pou neseserman ganny rekonpanse deswit. I ti demann bokou zefor pour en serten peryod letan pour Zezi arive sanz latitid son bann zapot. Par egzanp, zot pa ti touzour tonm dakor antre zot e sa problenm ti lev ankor ver lafen minister Zezi. Zot ti pe dispit akoz zot ti oule konnen lekel ki pli enportan antre zot. (Mark 9:33-37; 10:35-45) Pa tro lontan apre sa bann dispit, Zezi ti fer laranzman pour selebre son dernyen Lapak avek son bann zapot. Sa zour swar, ni menm enn ant zot pa ti pran linisyativ pour lav lipye sal son kanmarad. Sa ti louvraz en serviter e i ti en koutim dan sa letan. Zezi ti fer li epi i ti dir: “Mon’n donn zot en legzanp.”—Zan 13:2-15.
20 Bann mari ki annan menm limilite ki Zezi ti manifeste, pou sirman annan en madanm ki kontan korpere e siport zot. Me en msye i bezwen pasyan. Sa zour swar, zour Lapak, bann zapot ti rekonmans lev en dispit pour konnen lekel ki pli enportan. (Lik 22:24) Pour en dimoun sanz son latitid i pran letan e i en keksoz ki vin ptit-a-pti. Me pa i gou ler nou vwar rezilta pozitif parey dan ka bann zapot!
21. Avek kantite problenm ki annan dan maryaz ozordi, ki en mari i ganny demande pour rapel e fer?
21 Ozordi zour, bann problenm ankor pli gro i afekte maryaz. Bokou ki’n marye pa ni pran serye bann ve ki zot in fer. Alor i enportan ki bann mari i mazin byen kot maryaz i sorti, i sorti kot Bondye, Zeova, en Bondye lanmour. I’n donn nou son garson konman en Ranson, en Sover, me osi konman en model pour bann mari swiv.—Matye 20:28; Zan 3:29; 1 Pyer 2:21.
Ki ou pou reponn?
• Akoz i enportan pour aksepte ki maryaz i sorti kot Bondye?
• Dan ki fason bann mari i ganny ankouraze pour kontan zot madanm?
• Ki legzanp Zezi in kite dan lafason ki bann mari i devret egzers zot lotorite?
[Kestyon]
[Portre lo paz 11]
Ler son bann disip ti fatige, Zezi ti demontre konsiderasyon
[Portre lo paz 12]
Bann mari i devret konsey zot madanm avek bann parol apropriye e avek ladouser