BULIGAN ayhan ni Jehova ang mga tawo nga makilala ang ginsaad nga Mesias? Huo. Binagbinaga kon ano ang ginhimo sang Dios. Natabo ini mga apat ka gatos ka tuig pagkatapos nga nakompleto ang bug-os nga Hebreong Kasulatan. Sa siudad sang Nazaret, sa naaminhan sang Galilea, ginduaw sang isa ka anghel ang dalaga nga si Maria. Ang ngalan sang anghel amo si Gabriel kag ginsugiran niya si Maria nga gamiton sang Dios ang iya aktibo nga puersa, ang iya balaan nga espiritu, agod magbun-ag sia sing isa ka bata nga lalaki bisan ulay pa sia. Amo ini ang madugay na nga ginsaad nga Hari nga magagahom sing dayon! Ini nga bata Anak sang Dios, nga ginsaylo niya halin sa langit pakadto sa taguangkan ni Maria.

Mapainubuson nga ginbaton ni Maria ining dungganon nga asaynment. Ginpakaslan sia sang iya nobyo nga panday nga si Jose, pagkatapos nga ginsilingan sia sang anghel sang Dios kon ngaa nagbusong si Maria. Pero, kamusta ang tagna nga sa Betlehem matawo ang Mesias? (Miqueas 5:2) Inang gamay nga banwa, mga 140 kilometros pa halin sa Nazaret!

Nagpatuman sing sensus ang isa ka Romano nga gumalahom. Ginsugo ang mga tawo nga magparehistro sa ila dutang natawhan. Si Jose kag si Maria lunsay taga-Betlehem, gani gindala ni Jose ang iya nagabusong nga asawa didto. (Lucas 2:3) Nagbata si Maria sa isa ka kuadra kag ginbutang niya ang bata sa pasungan. Nagpadala ang Dios sing madamo nga anghel agod sugiran ang grupo sang mga manugbantay sing karnero nga yara sa kabakuluran nga ang bag-o nabun-ag nga lapsag amo ang ginsaad nga Mesias, ukon Cristo.

Sang ulihi, ginpamatud-an man sang iban nga si Jesus amo ang ginsaad nga Mesias. Gintagna ni Isaias nga may isa ka tawo nga magahanda sang importante nga buluhaton sang Mesias. (Isaias 40:3) Ini nga tawo amo si Juan Bautista. Sang nakita niya si Jesus, nagsiling sia: “Tan-awa, ang Kordero sang Dios nga nagakuha sang sala sang kalibutan!” Gilayon nga nagsunod sa iya ang pila sa mga disipulo ni Juan. Ang isa sa ila nagsiling: “Nakita namon ang Mesias.”—Juan 1:29, 36, 41.

May dugang pa gid nga pamatuod. Sang ginbawtismuhan ni Juan si Jesus, si Jehova mismo nagpamulong halin sa langit. Paagi sa balaan nga espiritu, gintangdo niya si Jesus subong ang Mesias kag nagsiling: “Ini ang akon Anak, ang hinigugma, nga ginakahamut-an ko.” (Mateo 3:16, 17) Nag-abot gid man ang madugay na nga ginsaad nga Mesias!

San-o ini natabo? Sang tuig 29 C.E., sang natapos ang 483 ka tuig nga gintagna ni Daniel. Pila lamang ini sa madamo nga pamatuod nga si Jesus amo ang Mesias, ukon Cristo. Pero, ano ang iya ginbantala sang yari sia sa duta?

—Base sa Mateo kapitulo 1 asta 3; Marcos kapitulo 1; Lucas kapitulo 2; Juan kapitulo 1.