Ngaa Usisaon Naton ang Biblia?
Pamilyar ka bala sa Biblia? Amo ini ang labing lapnag nga napanagtag nga libro sa kasaysayan. Nasapwan sang mga tawo sa halos tanan nga kultura nga ang mensahe sini makahatag sing lugpay kag paglaum kag ang laygay sini praktikal sa matag-adlaw nga pagkabuhi. Apang, madamo subong ang halos wala sing nahibaluan parte sa Biblia. Relihioso ka man ukon indi, ayhan luyag mo nga usisaon ini. Gindesinyo ini nga brosyur agod mahibaluan mo ang panguna nga ginatudlo sang Biblia.
ANTES mo basahon ang Biblia, makabulig sa imo kon mahibaluan mo kon paano gin-areglar ang Biblia. Ang Biblia ginatawag man nga Balaan nga Kasulatan. Koleksion ini sang 66 ka tulun-an ukon mga seksion. Nagasugod ini sa Genesis asta sa Bugna, ukon Apokalipsis.
Sin-o ang awtor sang Biblia? Maayo gid ini nga pamangkot. Ang matuod, ginsulat sang mga 40 ka lalaki ang Kasulatan sa sulod sang kapin sa 1,600 ka tuig. Talalupangdon nga ini nga mga lalaki wala nangangkon nga sila ang mga awtor sang Biblia. Ang isa ka manunulat sini nagsulat: “Ang pagsulat sa bug-os nga Kasulatan gintuytuyan sang Dios.” (2 Timoteo 3:16) Nagsiling pa gid ang isa: “Ang Espiritu sang GINOO nagpamolong paagi sa akon, ang iya polong yari sa akon dila.” (2 Samuel 23:2) Gani ginasiling sang mga manunulat nga si Jehova nga Dios, ang Labing Gamhanan sa bug-os nga uniberso, amo ang Awtor sang Biblia. Suno sa mga manunulat, luyag sang Dios nga mangin suod sa mga tawo.
May isa pa ka butang nga importante agod mahangpan naton ang Biblia. May isa ka kabug-usan nga tema ang Kasulatan: ang pagbindikar sa kinamatarong sang Dios sa paggahom sa katawhan paagi sa iya langitnon nga Ginharian. Sa masunod nga mga pahina, mahibaluan mo kon paano ini nga tema masapwan sa tagsa ka tulun-an sang Biblia sugod sa Genesis asta sa Bugna.
Samtang ginahunahuna ini, binagbinagon naton ang mensahe nga masapwan sa labing bantog nga libro, ang Biblia.
^ par. 9 Nagkalainlain ang paagi sa pagsulat sing mga petsa. Sa sini nga brosyur ang C.E. nagakahulugan sing “Common Era” kag ang B.C.E. “Before the Common Era.” Makita mo ini nga petsa sa ubos sang mga pahina.
Basi Manamian Ka Man
PARTE SA AMON
Ngaa Dapat Tun-an ang Biblia?
Minilyon karon sa bilog nga kalibutan ang nakakita sang sabat sa importante nga mga pamangkot sa kabuhi sa bulig sang Biblia. Gusto mo man bala?
