ANTES magsulod ang mga Israelinhon sa Canaan, ginsaad ni Jehova ini nga duta sa mga kaliwatan ni Abraham. Sa sini nga tion, sa pagpanguna ni Josue, handa na nga panag-iyahan sang mga Israelinhon ang Ginsaad nga Duta.

Ginhukman sang Dios ang mga Canaanhon sing kalaglagan. Ginpuno nila ang duta sing tuman ka makahuluya nga buhat sa sekso, kag wala sing kaluoy nga pagpamatay. Gani, dapat nga laglagon sing bug-os sang mga Israelinhon ang mga siudad sang Canaan.

Pero antes magsulod sa Canaan, nagpadala si Josue sing duha ka espiya, nga nagdayon kanday Rahab sa siudad sang Jerico. Ginbaton niya ang mga espiya sa iya puluy-an kag gintago sila, bisan pa nahibaluan niya nga mga Israelinhon sila. Nagatuo si Rahab sa Dios sang mga Israelinhon, bangod nabatian niya ang mga pagluwas ni Jehova sa iya katawhan. Ginpasumpa niya ang mga espiya nga sia kag ang iya pamilya indi pagpatyon.

Sang ulihi, sang nagsulod ang nga Israelinhon sa Canaan kag nakig-away sa Jerico, milagruso nga ginrumpag ni Jehova ang pader sang Jerico. Ginsalakay sang mga soldado ni Josue ang siudad, pero wala nila ginpatay si Rahab kag ang iya pamilya. Nian sa sulod sang anom ka tuig nga pagpangdaug, halos naagaw ni Josue ang daku nga bahin sang Ginsaad nga Duta. Pagkatapos sini, ginpanagtag ang duta sa mga tribo sang Israel.

Sang tigulang na gid si Josue, gintipon niya ang katawhan. Ginpahanumdom niya sa ila ang mga pagpakig-angot ni Jehova sa ila mga katigulangan kag nangabay nga alagaron nila si Jehova. Pero, sang napatay si Josue kag ang iya suod nga mga kaupdanan, gintalikdan sang mga Israelinhon si Jehova kag nagsimba sa butig nga mga dios. Sa sulod sang mga 300 ka tuig, pirme ginasupak sang pungsod ang mga kasuguan ni Jehova. Sa sina nga tion, gintugutan ni Jehova ang mga kaaway sang Israel, kaangay sang mga Filistinhon, nga piguson sila. Pero, sang nangayo sing bulig ang mga Israelinhon kay Jehova, nagtangdo sia sing 12 ka hukom sa pagluwas sa ila.

Ang panahon sang mga Hukom nga ginasaysay sa tulun-an sang Hukom, nagsugod kay Otniel asta kay Samson nga amo ang pinakamakusog nga tawo nga nagkabuhi. Ang makawiwili nga kasaysayan sa tulun-an sang Hukom sa Biblia sulitsulit nga nagapakita sining importante nga kamatuoran: Ang pagkamatinumanon kay Jehova magaresulta sa pagpakamaayo kag ang pagsupak magaresulta sa pag-antos.

—Base sa Josue; Hukom; Levitico 18:24, 25.