Ginatormento nga Hunahuna

MAY mga panahon nga napung-awan gid si Nicole sugod pa sang 14 anyos sia. Apang, sa edad nga 16, may bag-o sia nga nabatyagan—di-kinaandan nga sobra nga kakunyag kag tumalagsahon nga kapagsik. Kon ano-ano ang iya ginapamensar, wala nagasinanto ang iya ginahambal, kag kulang sia sing tulog lakip ang wala-rason nga pagsuspetsa nga ginahingalitan sia sang iya mga abyan. Dason, nagsiling si Nicole nga mahimo niya islan ang duag sang mga butang suno sa luyag niya. Bangod sini, nahisayran sang iloy ni Nicole nga kinahanglan na sia ipabulong, gani gindala niya si Nicole sa ospital. Sa tapos maobserbahan sing maayo ang nagabulubag-o nga emosyon ni Nicole, nasayasat sang mga doktor ang iya balatian: si Nicole may yara bipolar disorder (problema sa hunahuna nga may nagabulubag-o nga emosyon, nagaabot-abot nga sobra nga kakunyag ukon mania kag sobra nga kapung-aw ukon depresyon). *

Kaangay ni Nicole, minilyon ka tawo sa bug-os nga kalibutan ang may problema sa emosyon—bipolar disorder man ini ukon pila ka porma sang klinikal depresyon (balatian nga nagakinahanglan sang bulig sang mga propesyonal ukon doktor). Mahimo nga makahalalit gid ang mga epekto sini nga mga balatian. “Sa sulod sang madamo nga tinuig nag-antos ako sing emosyonal nga kasakit,” siling sang may bipolar nga si Steven. “Naeksperiensiahan ko ang grabe nga kapung-aw kag dayon sobra nga kakunyag. Ang terapiya kag bulong nakabulig, apang ginapakigbatuan ko gihapon ini.”

Ano ang ginatunaan sang mga problema sa emosyon? Ano ang kahimtangan kon nagabalatian ka sing depresyon ukon bipolar disorder? Paano ang mga nagabalatian—kag ang mga nagaatipan sa ila—mahatagan sing suportar nga ginakinahanglan nila?

[Nota]