Kon Paano Makabulig ang Iban

AYHAN may kilala ka nga nagabalatian sing depresyon ukon bipolar disorder. Kon amo, paano ka makabulig? Si D. J. Jaffe sang National Alliance for the Mentally Ill nagahatag sining maayo nga laygay: “Indi pagtamda sing pareho ang balatian kag ang indibiduwal; sa baylo, kaugti ang balatian apang higugmaa ang tawo.”

Ang isa ka babayi nga si Susanna mapailubon kag mahigugmaon nga naghimo sini. May amiga sia nga nagabalatian sing bipolar. “May mga tion nga indi niya maagwanta nga magpakig-upod sa akon,” siling ni Susanna. Sa baylo nga talikdan ang iya amiga, nagpanalawsaw si Susanna agod mahibaluan ang tuhoy sa bipolar disorder. “Sa karon,” siling niya, “nahisayran ko kon daw ano ka daku ang epekto sang balatian sa panimuot sang akon abyan.” Nagapati si Susanna nga ang pagpanikasog nga mahangpan ang nagabalatian mapuslanon gid. “Makabulig ini sa imo nga higugmaon kag pakabahandion ang mabuot nga tawo walay sapayan sang iya balatian,” siling niya.

Kon ang nagabalatian isa ka katapo sang pamilya, ang bug-os tagipusuon nga bulig importante gid. Si Mario, nga ginsambit kaina sa sining serye, nakatuon sini gikan sa eksperiensia sing temprano. Ang iya asawa nga si Lucia, nga ginsambit man kaina, nagabalatian sing bipolar. “Primero,” siling ni Mario, “nabuligan ako paagi sa pag-upod sa akon asawa sa iya doktor kag paagi sa pagbasa tuhoy sa sining makatilingala nga balatian agod mangin pamilyar ako sa amon ginapakigbatuan. Pirme man kami nagahambalanay ni Lucia kag nagatinguha nga malandas ang bisan ano nga kahimtangan nga mag-utwas sa pagligad sang panahon.”

Suportar Gikan sa Cristianong Kongregasyon

Ang Biblia nagalaygay sa tanan nga Cristiano nga “palig-unon ang mga mahuyang sing tagipusuon,” kag ‘magmabinatason ayon sa tanan.’ (1 Tesalonica 5:​14) Paano mo ini mahimo? Una, importante nga mahangpan mo ang kinatuhayan sa ulot sang balatian sa hunahuna kag balatian sa espirituwal. Halimbawa, ginpakita sang manunulat sang Biblia nga si Santiago nga ang pangamuyo makapaayo sa nagamasakit sa espirituwal. (Santiago 5:14, 15) Apang, ginbaton ni Jesus nga ang mga nagamasakit sa pisikal nagakinahanglan sang manugbulong. (Mateo 9:12) Sa pagkamatuod, nagakaigo pirme kag mabuligon ang pagpangamuyo kay Jehova tuhoy sa bisan ano nga ginakabalak-an, pati na ang aton kapagros. (Salmo 55:22; Filipos 4:​6, 7) Apang wala ginasiling sang Biblia nga ang dugang  nga hilikuton sa espirituwal magalubad mismo sa mga balatian karon.

Busa, ginalikawan sang mahinantupon nga mga Cristiano nga ipahangop nga ang ginapung-awan nga mga tawo amo ang salaon sa ila ginaantos. Ini nga mga pulong indi gid makabulig kaangay sa ginhimo sang butig nga mga manuglugpay ni Job. (Job 8:​1-6) Ang katunayan amo nga sa madamo nga kaso ang depresyon indi mag-ayo luwas kon bulngon ini. Ilabi na nga matuod ini kon ang isa ka tawo ginapung-awan sing tuman gid, ayhan nagahunahuna pa gani nga maghikog. Sa sini nga mga kaso, kinahanglanon gid ang bulig sang mga propesyonal.

Apang, may daku nga mahimo ang mga masigka-Cristiano agod makabulig. Sa pagkamatuod, nagakinahanglan ini sang pagpailob. Halimbawa, ang pila ka aspekto sang Cristianong hilikuton mahimo nga makapaluya gid sing buot sa mga may problema sa emosyon. Ang isa ka nagabalatian sing bipolar nga si Diane nagsiling: “Para sa akon, isa ka paghimakas ang pagpakigbahin sa ministeryo. Isa ka hangkat ang pagpaambit sa iban sing maayo kag makalilipay nga balita gikan sa Biblia samtang indi maayo ang akon pamatyag kag indi ako malipayon.”

Agod makabulig sa mga nagabalatian, tinguhai nga mangin mahinuklugon. (1 Corinto 10:24; Filipos 2:4) Tinguhai nga tamdon ang mga butang gikan sa pagtamod sang nagabalatian sa baylo nga sa imo pagtamod. Indi pagpabug-ati ang indibiduwal sing di-makatarunganon nga mga pagpaabot. “Sang ginbaton ako bangod sa kon ano ako karon,” siling ni Carl, nga nagapakigbato sa depresyon, “nabatyagan ko nga ang akon suod nga mga kaangtanan amat-amat nga nagapasag-uli. Paagi sa mapailubon nga bulig sang pila ka mas may edad nga mga abyan, nakapalambo ako sing suod pa nga kaangtanan sa Dios kag nagkalipay sing daku sa pagbulig sa iban nga himuon man ini.”

Paagi sa bulig, ang mga nagabalatian makasapo sing daku nga kaumpawan gikan sa ila kalisdanan. Binagbinaga ang isa ka Cristianong babayi nga si Brenda, nga nagabalatian man sing bipolar. “Ang akon mga abyan sa kongregasyon nangin mabinuligon gid kag mahinangpanon sa tion sang akon kapung-aw, kag wala gid nila ako ginhusgahan nga maluya sa espirituwal,” siling niya. “May mga tion nga ginapaupod nila ako sa ministeryo kag ginapapamati lang ako ukon ginatigan-an nila ako sing pulungkuan sa Kingdom Hall agod makasulod ako sa tapos nga ang tanan nakalingkod na.”

Ang bulig sang mahigugmaon kag mahinuklugon nga mga gulang sa kongregasyon nakabulig sing daku kay Cherie, nga ginsambit sa nagligad nga artikulo, nga nagabalatian sing depresyon. Sia nagsiling: “Sa tion nga ang mga gulang nagapasalig sa akon sing gugma ni Jehova, nagabasa sa akon sing mga teksto gikan sa Pulong sang Dios, ang Biblia, kag nagahambal tuhoy sa mga katuyuan ni Jehova nga paraiso nga mahidaiton kag maayo sing kahimtangan kag sa tion nga nagapangamuyo sila upod sa akon—bisan sa telepono lang—nagakahaw-asan ako sing kabug-atan. Nahibaluan ko nga wala ako ginpabay-an ni Jehova ukon sang akon mga kauturan, kag nagapabakod gid ini sa akon.”

Wala sing duhaduha nga paagi sa paghatag sing mapuslanon nga bulig, ang mga katapo sang pamilya kag mga abyan makatungod sing importante nga papel sa kaayuhan sang nagabalatian. “Sa banta ko mas kontrolado ko karon ang akon kabuhi,” siling ni Lucia. “Magkaupod nga nagpanikasog kami sang akon bana agod malandas ini, kag nangin mas maayo ang amon kahimtangan.”

Nahisayran sang madamo nga nagapakigbato sa nanuhaytuhay nga sahi sang balatian sa hunahuna nga ang pagpakig-away sa sining makahalanusbo nga mga balatian madugay. Apang, ang Biblia nagasaad nga sa bag-ong kalibutan sang Dios, “ang pumuluyo indi magsiling, ‘Nagamasakit ako.’” (Isaias 33:24) Madula ang nagapalisod nga mga balatian kag mga problema nga nagasalot sa madamo karon. Makalilipay gid nga pamalandungan ang saad sang Dios nga bag-ong kalibutan diin ang tanan nga balatian—pati na ang mga problema sa emosyon—madula sing dayon. Sa amo nga tion, siling sang Biblia, wala na sing “kalisod ukon paghibi ukon kasakit pa.”—Bugna 21:4.

[Blurb sa pahina 12]

Ginbaton ni Jesus nga ang mga nagamasakit nagakinahanglan sang manugbulong.—MATEO 9:12

[Blurb sa pahina 13]

Ang Biblia nagasaad nga sa bag-ong kalibutan sang Dios, “ang pumuluyo indi magsiling, ‘Nagamasakit ako.’”—ISAIAS 33:24