Yav tas los Vajtswv nrog tibneeg sib txuas lus. Nws pub nws lub hwj huam dawb huv tshoov kom tibneeg sau phau Vajlugkub. (2 Petus 1:20, 21) Yog peb nyeem phau Vajlugkub peb yuav paub qhov tseeb txog Vajtswv.—Nyeem Yauhas 17:17; 2 Timaute 3:16.

Hauv phau Vajlugkub, peb kawm tau ntau yam txog Vajtswv. Nws qhia peb txog lub ntsiab rau noob neej, txog tej yam uas nws yuav ua los cawm noob neej, thiab nws cob qhia peb ua neej raws li nws lub siab nyiam. (Tubtxib Tes Haujlwm 17:24-27) Vajtswv Yehauvas yeej xav kom peb paub qhov tseeb txog nws.—Nyeem 1 Timaute 2:3, 4.

Yehauvas yog tus Vajtswv uas qhia qhov tseeb. Nws txib nws tus Tub Yexus los qhia qhov tseeb rau noob neej. Yog li ntawd, cov uas nyiam qhov tseeb, yeej xav paub ntxiv txog Yexus. (Yauhas 18:37) Vajtswv xav kom cov uas nyiam qhov tseeb los pe hawm nws.—Nyeem Yauhas 4:23, 24.

Xatas Ntxwg Nyoog dag ntau yam txog Vajtswv kom tibneeg thiaj tsis paub qhov tseeb txog Vajtswv. (2 Khaulee 4:3, 4) Cov neeg uas tsis xav ua zoo thiaj nyiam mloog Xatas tej lus dag. (Loos 1:25) Tiamsis muaj ntau plhom leej uas muaj lub siab dawb siab zoo, lawv thiaj kawm Vajlugkub kom paub qhov tseeb txog Vajtswv.—Nyeem Tubtxib Tes Haujlwm 17:11.