Seza Ogis, anperè women an, pase yon dekrè kote chak moun dwe al anrejistre. Kidonk, Jozèf ak Mari dwe vwayaje al nan vil kote Jozèf te fèt la anpalan de Betleyèm ki nan sid Jerizalèm.

Anpil moun rive nan vil Betleyèm pou y al anrejistre. Sèl kote Jozèf ak Mari jwenn pou yo rete se yon kote yo konn met bourik ak lòt bèt. E se la Jezi fèt. Mari vlope l ak twal, e li mete l yon kote yo konn bay bèt manje.

Sanble se Bondye ki te pouse Seza Ogis pase yon dekrè pou tout moun al anrejistre. Sa k fè sa? Se paske sa te fè l vin posib pou Jezi fèt Betleyèm ki se vil wa David ki se zansèt li. Ekriti yo te gentan anonse byen lontan vil sa a se vil kote wa Bondye te pwomèt la t ap fèt. — Miche 5:2.

Se pa ti enpòtan nuit sa a enpòtan! Gen yon limyè ki klere toutotou yon gwoup bèje k ap pase nuit lan deyò nan savann nan. Se glwa Jewova! E gen yon zanj Bondye ki di yo: “Nou pa bezwen pè, paske m ap anonse nou yon bon nouvèl ki pral pote kè kontan pou tout moun. Paske jodi a, nan vil David la, gen yon sovè ki fèt pou nou. Li se Kris, Seyè a. Men sa k ap ede nou rekonèt li: N ap jwenn yon tibebe ki vlope ak moso twal e ki kouche yon kote yo konn bay bèt manje.” Menm kote a, gen anpil lòt zanj ki vin parèt epi yo di: “Glwa pou Bondye anwo nan syèl la, e lapè sou tè a pami moun ki gen favè l yo.” — Lik 2:10-14.

Apre zanj yo kite bèje yo, bèje yo di youn lòt: “Ann al Betleyèm dwat pou nou ka wè sa k pase a, bagay Jewova fè n konnen an.” ​(Lik 2:15). Yo kouri ale epi yo jwenn Jezi ki te fèk fèt kote zanj lan te di y ap jwenn li an. Lè bèje yo rakonte sa zanj lan di yo, tout moun ki tande sa bèje yo di yo sezi. Mari te konsève tout pawòl sa yo nan kè l e li te ba yo anpil valè.

Jodi a, anpil moun kwè Jezi fèt 25 desanm. Men, nan Betleyèm, mwa desanm se yon mwa kote lapli ap tonbe e li fè frèt. Gendelè nèj menm konn tonbe. Li pa t ap posib pou bèje yo pase nuit lan deyò ansanm ak twoupo yo nan epòk sa a nan ane a. Anplis de sa, anperè women an pa t ap mande pèp la, ki te deja anvi revòlte kont li, pou yo fè yon vwayaj nan mitan sezon fredi a pou y al anrejistre. Li posib pou Jezi te fèt nan zòn mwa oktòb yo.