“Isu a kunak kadakayo nga amin nga ikararag ken dawatenyo, patienyo a naawatyon dagita, ket sigurado a maaddanto kadakayo.”—Marcos 11:24, Baro a Lubong a Patarus.

 “Gapu iti daytoy, ibagak kadakayo: Tunggal agkararagkayo ket adda dawatenyo, patienyo a naawatyon, ket maitedto ti aniaman a dawatenyo.”—Marcos 11:24, Ti Baro a Naimbag a Damag Biblia.

 Dagitoy a sasao ni Jesus ipakitana kadagiti pasurotna a nagpateg a mamatida iti bileg ti kararag. Impasiguradona a saan laeng a dengdenggen ti Dios dagiti kararagda no di ket sungbatanna pay dagita. Isu a no ti ikarkararag ti maysa ket maitunos iti pagayatan ti Dios, masiguradona a matungpalto ti ikarkararagna a kasla nasungbatanen dayta.

 Impaganetget ni Jesus ti kinapateg ti pammati iti panagkararag. Kunana a ti tao nga agkarkararag ket masapul a “saan a pulos nga agduadua no di ket mamati a pumayso ti imbagana.” (Marcos 11:23) Apay? Gapu ta saan a manamnama dagiti agduadua nga “umawatda iti aniaman manipud ken Jehova.” a—Santiago 1:5-8.

 Ti tao nga addaan pammati ket kanayon nga agkararag iti aniaman a situasion. (Lucas 11:9, 10; Roma 12:12) Iti daytoy a pamay-an, ipakpakitana a talaga a kasapulanna ti dawdawatenna ken talaga a patienna a masungbatan ti Dios ti kararagna. Siempre, patienna met a posible a sungbatan ti Dios ti kararagna iti pamay-an wenno iti tiempo a dina ekspektaren.—Efeso 3:20; Hebreo 11:6.

 Ngem saan a kayat a sawen ti imbaga ni Jesus a maawat ti asinoman a tao ti aniaman nga inkararagna iti Dios. Ti kasarsarita idi ni Jesus ket dagiti pasurotna, tattao nga addaan pammati ken mangar-aramid iti amin a kabaelanda nga agdaydayaw iti pamay-an nga akseptaren ni Jehova a Dios. Ibagbaga ti Biblia a denggen laeng ni Jehova dagiti kararag a maitunos iti pagayatanna. (1 Juan 5:14) Saanna a denggen dagiti kararag dagidiay di mangikankano iti estandartena ken agar-aramid iti dakes a saan nga agbabbabawi. (Isaias 1:15; Mikias 3:4; Juan 9:31) Tapno maammuam ti ad-adu pay maipapan kadagiti kararag a denggen ti Dios, buyaem daytoy ababa a video.

 Iti maudi nga al-aldaw ti ministerio ni Jesus ditoy daga, inlawlawagna kadagiti adalanna a napateg ti panangipakita iti nabileg a pammati iti Dios. Impaganetgetna daytoy a leksion babaen ti maysa nga ilustrasion. Bayat a mapmapanda iti Jerusalem, nakitana ti maysa a kayo a higos a nasapa a nagbulong. Ngem awan ti bunga dayta a kayo isu nga inlunod ni Jesus. (Marcos 11:12-14) Ti makaallilaw a langa dayta a kayo iladawanna ti nagkauna a nasion ti Israel, nga agparang nga agdaydayawda iti Dios ngem awan met gayam ti pammatida. (Mateo 21:43) Di nagbayag, nagango ti kayo a higos a mangipakita iti asidegen a mapasamak iti awanan pammati nga Israel.—Marcos 11:19-21.

 Iti sabali a bangir, kombinsido ni Jesus a kabaelan dagiti pasurotna ti maaddaan iti pammati a kasapulanda tapno makapagballigida kadagiti pakarigatan ken makaaramidda kadagiti nakaskasdaaw a bambanag. (Marcos 11:22, 23) Naintiempuan unay ti balakad ni Jesus maipapan iti kararag ta asideg idin a masubok ti pammati dagiti pasurotna. Masapul a sanguenda ti ipapatay ni Jesus ken ti kumaro pay nga ibubusor iti panangasabada. (Lucas 24:17-20; Aramid 5:17, 18, 40) Mapagballigian met dagiti pasurot ni Jesus ita dagiti narigat a kasasaad no ipakitada ti pammati iti Dios ken iti bileg ti kararag.—Santiago 2:26.

 Buyaem daytoy ababa a video tapno makitam ti pakabuklan ti libro a Marcos.