Mbivilia nĩyonanĩtye kana ve mavinda alaĩka masũvĩie athaithi ma w’o ma Ngai nĩ kana meanĩsye kwenda kwake. (Savuli 34:7) Kwa ngelekany’o:

• Ĩla Yeova waanangie ndũa nthũku sya Sotomo na Ngomola, alaĩka nĩmatetheeisye mũndũũme waĩ mũlũngalu weetawa Loto vamwe na mũsyĩ wake maume ndũanĩ isu.—Mwambĩlĩlyo 19:1, 15-26.

• Ĩla Aevelania atatũ ma mũika ala maĩ Mbaviloni masilĩlwe kwĩkw’a ikonĩ ya mwaki mũnene makw’ĩĩe vo, Ngai nĩwatũmie “mũlaĩka wake, na atangĩĩa athũkũmi make.”—Ndanieli 3:19-28.

• Ĩla mũndũũme waĩ mũlũngalu Ndanieli wekiw’e ngunganĩ ya mĩnyambũ na ekala vo ũtukũ mũima, aisye kana ‘Ngai nũtũmie mũlaĩka wake, na atumya makanyw’a ma mĩnyambũ.’—Ndanieli 6:16, 22.

Mavindanĩ amwe, alaĩka ma Ngai nĩmatetheeasya kĩkundi kya Kĩklĩsto kya ĩvinda ya atũmwa ĩla ve vata nĩ kana kĩeleelo kya Yeova kĩanĩe. Kwa ngelekany’o:

• Ve mũlaĩka wavingũie mĩomo ya kolokolo na atongoesya atũmwa ala maĩ ove mathi makaendeesye wĩa wa kũtavany’a ĩkalũnĩ.—Meko ma Atũmwa 5:17-21.

• Ve mũlaĩka weeyĩaĩie mũtavany’a weetawa Vilivu esĩle nzĩanĩ ya weũ ĩla yaumĩte Yelusaleme kũvika Ngasa akatavye ũvoo mũseo Mũethiovia waendete Yelusaleme kũthaitha.—Meko ma Atũmwa 8:26-33.

• Ĩla ĩvinda ya Ngai yavikie nĩ kana andũ ala mataĩ Ayuti matw’ĩke Aklĩsto, mũlaĩka nĩwaumĩlĩĩile mũnene wa ita sya Alomi weetawa Kolinelio woninĩ na amwĩa atũmane mũtũmwa Vetelo oke kwake.—Meko ma Atũmwa 10:3-5.

• Ĩla mũtũmwa Vetelo waĩ mwove, mũlaĩka nĩwamumĩlĩĩile na amumya kolokolonĩ.—Meko ma Atũmwa 12:1-11.

Ĩvindanĩ ya ũmũnthĩ, vai kĩndũ kĩtũĩkĩĩthasya kana Ngai nũtũmĩaa alaĩka matetheesye andũ kwa nzĩa ya kyama tondũ Mbivilia yonanĩtye meekaa tene. Ĩndĩ o na ũu wĩ o vo, Yesũ aisye ũũ ĩũlũ wa ĩvinda yitũ: “Ũvoo ũũ mũseo wa ũsumbĩ ũkatavanw’a nthĩ yonthe wĩthĩwe ũkũsĩ kwa mbaĩ syonthe; na ĩndĩ mũminũkĩlyo ũkyũka.” (Mathayo 24:14) We nĩwĩsĩ kana amanyĩw’a ma Klĩsto nĩmaendeee na kũtethya wĩa ũsu matongoew’e nĩ alaĩka?

Ĩvuku ya Ũvuany’o yonanĩtye kana alaĩka nĩmekĩaa kĩthito kũtetheesya andũ ĩũlũ wa nthĩ yonthe memanyĩsye ĩũlũ wa Yeova Ngai na kĩeleelo kyake kwondũ wa andũ. Mũtũmwa Yoana aandĩkie atĩĩ: “Na noona mũlaĩka ũngĩ akĩũlũka ĩtunĩ katĩ, e na ũvoo mũseo wa tene na tene wa ũtavan’ya kwa ala matwĩe nthĩ, na kwa kĩla mũthemba na mbaĩ na kĩthyomo na ũko wa andũ; na aneena na wasya mũnene, Kĩai Ngai, na mũtaĩei; nũndũ saa wa kũsilĩla kwake nĩ mũku: na mũthaithei ũla wombie ĩtu na nthĩ na ũkanga na nthongo sya manzĩ.” (Ũvuan’yo 14:6, 7) Maũndũ maingĩ ala mekĩkĩte ĩvindanĩ yĩĩ nĩmaĩkĩĩthasya kana alaĩka nĩmatetheeasya wĩanĩ wa kũtavany’a ũvoo mũseo wa Ũsumbĩ ĩũlũ wa nthĩ yonthe. O na ĩla mwĩki ũmwe wa naĩ weelila na amũsyokea Yeova, nĩvethĩawa “ũtanu kwa alaĩka ma Ngai.”—Luka 15:10.

Kũkeethĩwa ata wĩa wa kũtavany’a wathela? Mbivilia yonanĩtye kana “ita ila syĩ ĩtunĩ” sya alaĩka ikatetheesya Yesũ Klĩsto, Mũsumbĩ wa asumbĩ, kũkita “kaũnĩ wa mũthenya mũnene wa Ngai, Mwene Vinya W’onthe” ũla wĩtawa Ali–Maketoni. (Ũvuan’yo 16:14-16; 19:14-16) Alaĩka me vinya makatũmĩwa kũsilĩla andũ ĩla Mwĩaĩi Yesũ ‘ũkaĩvanĩsya kwa ala matawĩw’aa ũvoo mũseo wa Mwĩaĩi waitũ Yesũ.’—2 Athesalonika 1:7, 8.

Kwoou ndũkethĩwe na nzika kana alaĩka nĩmendeeaw’a nue mũno. O na nĩmendete mũno kwona andũ ala mendete kũmũthũkũma Ngai maendeee nesa, na ve mavinda maingĩ Yeova ũmatũmĩĩte kwĩkĩa vinya na kũsũvĩa athũkũmi make aĩkĩĩku.—Aevelania 1:14.

Kwoou kĩla ũmwe witũ e na ũtwi wa vata vyũ waĩle kwĩka. Ĩkũlyo nĩ, Tũkeethukĩĩsya na kwĩw’a ũvoo mũseo ũla ũendeee kũtavanw’a nthĩ yonthe? Ngũsĩ sya Yeova kĩsionĩ kyenyu no syende ũkũtetheesya ũunĩke nĩ ũtethyo wa alaĩka me vinya ma Ngai.