Kómu Tistimunhas di Jeová, nu ta sforsa pa sigi kel manera di adorason ki Jizus inxina i ki se apóstlus faze. Kel artigu li ta faze un rezumu di nos krénsas prinsipal.

1.   Deus. Nu ta adora úniku Deus verdaderu i Tudu-Poderozu, kel ki é Kriador, ki txoma Jeová. (Salmo 83:18; Apocalipse 4:11) El é Deus di Abraon, di Muizes i di Jizus. — Êxodo 3:6; 32:11; João 20:17.

2.   Bíblia. Nu ta rekonhise ma Bíblia ten mensaji ki ben di Deus pa umanus. (João 17:17; 2 Timóteo 3:16) Nos krénsas ten bazi na tudu kes 66 livru di Bíblia, ki ta inklui “Antigu Testamentu” i “Novu Testamentu”. Profesor Jason D. BeDuhn fla ku razon kantu el skrebe ma Tistimunhas di Jeová kria “ses própi sistéma di krénsas i manera di konporta di akordu ku kel ki Bíblia ta fla, sen pensa na kuzê ki Bíblia debe flaba.” a

    Nu ta kridita na Bíblia interu. Má óras ki nu ta tenta ntende Bíblia, nu ta rekonhise ma alguns párti di el ta pâpia di kuzas ki dja kontise ô ki ta ben kontise. I ma na alguns párti, Bíblia ta uza konparasons ô poezia pa reprizenta algun kuza. — Apocalipse 1:1.

3.   Jizus. Nu ta sigi izénplu di Jizus Kristu i kuzas ki el inxina i nu ta da-l ónra pamodi el é nos Salvador i el é Fidju di Deus. (Mateus 20:28; Atos 5:31) Pur isu, nos é kristons. (Atos 11:26) Má, nu prende na Bíblia ma Jizus é ka Deus Tudu-Poderozu i ma dotrina di Trindadi ka sta na Bíblia. — João 14:28.

4.   Reinu di Deus. É ka un kuza ki sta na korason di kristons, má é un govérnu ki ta izisti na Séu. El ta ben fika na lugar di kes govérnu di ómi i el ta ben poi vontadi di Deus ta fazedu na Téra. (Daniel 2:44; Mateus 6:9, 10) Ka ta dura, el ta ben faze kes kuza li pamodi profesias di Bíblia ta mostra ma nu sta ta vive na ‘ténpu di fin’. — 2 Timóteo 3:1-5; Mateus 24:3-14.

    Jizus é Rei di Reinu di Deus na Séu. El kumesa ta governa na anu di 1914. — Apocalipse 11:15.

5.   Salvason. Nu pode salvadu di pekadu ku mórti pamodi di resgati di Jizus. (Mateus 20:28; Atos 4:12) Pa tra pruvetu di resgati, pesoas meste ka sô mostra fé na Jizus má tanbê muda ses manera di vive i batiza. (Mateus 28:19, 20; João 3:16; Atos 3:19, 20) Manera ki un algen ta vive ta prova si se fé sta bibu. (Tiago 2:24, 26) Má, salvason é ka un kuza ki nu ta ganha. Nu ta dadu el pamodi ‘bondadi di Deus ki ka meresedu’. — Gálatas 2:16, 21.

6.   Séu. Jeová Deus, Jizus Kristu i kes anju fiel ta mora na Séu. b (Salmo 103:19-21; Atos 7:55) Un grupu pikinoti di 144 mil algen ta ben resusitadu pa bai vive na Séu, pa governa ku Jizus na Reinu di Deus. — Daniel 7:27; 2 Timóteo 2:12; Apocalipse 5:9, 10; 14:1, 3.

7.   Téra. Deus kria Téra pa ser kaza di umanus pa tudu ténpu. (Salmo 104:5; 115:16; Eclesiastes 1:4) Deus ta ben abênsua kes algen ki ta obi ku el ku saúdi perfetu i vida pa tudu ténpu na paraízu na Téra. — Salmo 37:11, 34.

8.   Maldadi ku sufrimentu. Maldadi ku sufrimentu kumesa kantu un anju di Deus rabela kóntra el. (João 8:44) Dipôs ki el rabela el fika ta txomadu di “Satanás” i “Diabu”. El konvense primeru ómi ku mudjer pa rabela djuntu ku el i kel-la traze txeu prubléma gravi pa ses fidjus. (Génesis 3:1-6; Romanos 5:12) Pa rezolve kes dúvida ki Satanás labanta, Deus sta ta dexa maldadi ku sufrimentu kontise, má El ka ta dexa-s kontinua pa tudu ténpu.

9.   Mórti. Óras ki un algen móre el ta dexa di izisti. (Salmo 146:4; Eclesiastes 9:5, 10) El ka ta fika ta sufri na inférnu.

    Deus ta ben resusita bilhons di algen. (Atos 24:15) Má dipôs di resureison, kes algen ki nega prende sobri Deus ta distruídu pa tudu ténpu i sen speransa di torna resusita. — Apocalipse 20:14, 15.

10.   Família. Nu ta sigi kel prinsípiu ki Deus da kantu el faze kel primeru kazamentu. Ma kazamentu debe ser entri un ómi ku un mudjer i ma konportamentu seksual mariadu debe ser úniku motivu pa divórsiu. (Mateus 19:4-9) Nu ten sertéza ma sabedoria ki sta na Bíblia ta djuda famílias ten bons rezultadu. — Efésios 5:22–6:1.

11.   Nos adorason. Nu ka ta adora krus i nen kalker otu imaji. (Deuteronómio 4:15-19; 1 João 5:21) Kuzas prinsipal ki ta faze párti di nos adorason é kes-li:

    •   Faze orason pa Deus. — Filipenses 4:6.

    •   Lé i studa Bíblia. — Salmo 1:1-3.

    •   Midita na kel ki nu ta prende na Bíblia. — Salmo 77:12.

    •   Sta djuntu na runion pa faze orason, pa studa Bíblia, pa kanta, pa pâpia di asuntus spritual i pa nkoraja nos kunpanherus ki é Tistimunhas di Jeová i otus algen. — Colossenses 3:16; Hebreus 10:23-25.

    •   Prega ‘notísias sábi di Reinu’. — Mateus 24:14.

    •   Djuda kes ki meste. — Tiago 2:14-17.

    •   Faze i konpo Salons di Reinu i otus lugar ki ta uzadu pa nos trabadju di inxina Bíblia na mundu interu. — Salmo 127:1.

    •   Djuda óras ki ta kontise dizastris na naturéza. — Atos 11:27-30.

12.   Nos organizason. Nu sta organizadu na kongregasons. I na kada kongregason ten un grupu di ansions pa toma kónta di el. Má kes ansion ka ta faze párti di ninhun grupu di saserdótis nen es ka ta pagadu. (Mateus 10:8; 23:8) Nu ka ta paga dízimu i ka ta pididu dinheru na nos runions. (2 Coríntios 9:7) Tudu nos trabadju ta fazedu ku kontribuisons ki ta fazedu.

     Grupu Enkaregadu di Óbra, ki é un grupu pikinoti di kristons maduru ki ta sirbi na Sédi Mundial, ta toma kónta di Tistimunhas di Jeová na mundu interu. — Mateus 24:45.

13.   Nos union. Na mundu interu nu ta kridita na mésmu kuzas. (1 Coríntios 1:10) Tanbê nu ta sforsa txeu pa nu ka faze skodjénsa di pesoas pamodi ses puzison na sosiadadi, ses rasa ô ses grupu. (Atos 10:34, 35; Tiago 2:4) Nbóra nos é unidu, kada un di nos é livri pa toma nos disizons. Kada Tistimunha di Jeová ta toma se disizon ku bazi na se konsénsia ki é trenadu pa Bíblia. — Romanos 14:1-4; Hebreus 5:14.

14.   Nos manera di konporta. Nu ta sforsa pa nu mostra amor di verdadi na tudu kuza ki nu ta faze. (João 13:34, 35) Nu ta ivita faze kes kuza ki Deus ka gosta, sima faze transfuzon di sangi ki é un manera mariadu di uza sangi. (Atos 15:28, 29; Gálatas 5:19-21) Nu ta sforsa pa mante pas i nu ka ta partisipa na géra. (Mateus 5:9; Isaías 2:4) Nu ta ruspeta govérnu di undi ki nu ta mora i nu ta obi ku ses leis óras ki é ka kóntra leis di Deus. — Mateus 22:21; Atos 5:29.

15.   Modi ki nu ta trata otus. Jizus manda: ‘ Ama bu prósimu sima bu kabésa.’ Tanbê el fla ma kristons ‘ka ta faze párti di mundu’. (Mateus 22:39; João 17:16) Nton, nu ta sforsa pa ‘faze ben pa tudu algen’. (Gálatas 6:10) Má nu ka ta partisipa na ninhun asuntu di pulítika i nu ta ivita faze párti di otus relijion. (2 Coríntios 6:14) Má nu ta ruspeta disizons di otus algen na kes asuntu li. — Romanos 14:12.

 Si bu tene más perguntas sobri kuzê ki Tistimunhas di Jeová ta kridita na el, bu pode lé más sobri nos na nos site, pâpia ku algun algen na un di nos skritóriu, sisti un runion na un Salon di Reinu ki ta fika pértu di bo ô pâpia ku un Tistimunha di Jeová na undi ki bu ta mora.