BIBLIA kelomba Bakristu na kusala Lusungiminu ya lufwa ya Kristu. Bo kebingaka mpi nkinsi yai nde ‘Madia ya nkokila ya Mfumu.’ (1 Korinto 11:20) Inki kima kele mfunu mpenza sambu na yo? Inki ntangu mpi nki mutindu beto fwete sala yo?

Yezu Kristu kuyantikisaka nkinsi yai na mpimpa ya Paki ya Bayuda na mvu 33 ya T.B. Bo vandaka kuta nkinsi ya Paki kaka mbala mosi konso mvula, na kilumbu ya 14 ya ngonda Nisani ya Bayuda. Sambu na kuzaba dati yina, yo kemonana nde Bayuda vandaka kuvingila kilumbu mosi (équinoxe) na printemps yina mwini kezingaka bangunga 12 mpi mpimpa bangunga 12. Ngonda ya ntete ya mpa ya bo kemonaka na penepene ya équinoxe ya printemps kemonisaka luyantiku ya Nisani. Paki vandaka kubwa bilumbu 14 na nima, na nima ya kudinda ya ntangu.

Yezu kutaka nkinsi ya Paki ti bantumwa na yandi, yandi kulaka Yuda Muyekudi, mpi na nima yandi yantikisaka Madya ya Nkokila ya Mfumu. Madya yai kubakaka kisika ya Paki ya Bayuda, yo yina beto fwete sala yo kaka mbala mosi na mvula.

Evanzile ya Matayo ketuba nde: “Yesu bakaka mampa; yandi pesa Nzambi mersi, yandi zenga yo bitini-bitini, yandi pesa na balonguki na yandi, ebuna yandi tuba nde: ‘Beno baka mampa yai, beno dia yo; yo [ketendula, NW] nitu na mono.’ Ebuna yandi bakaka dikopa ya vinu; yandi pesa mersi na  Nzambi, ebuna yandi pesa bo nde: ‘Beno nwa yo, beno yonso, sambu yai [ketendula, NW] menga na mono yina ke songa kuwakana ya Nzambi me wakana ti bantu. Menga yai ke losana sambu na bantu mingi ya masumu, sambu Nzambi kulolula bo.’”—Matayo 26:26-28.

Bantu yankaka kekwikilaka nde Yezu kukitulaka mpenza mampa nitu na yandi ya kinsuni mpi vinu menga na yandi. Kansi, nitu ya Yezu ya kinsuni kuvandaka kaka ya mvimba ntangu yandi pesaka mampa yai. Keti balongoki ya Yezu kudyaka mpenza nitu na yandi ya kinsuni mpi kunwaka menga na yandi? Ve, sambu kusala mutindu yina zolaka kutendula kudya muntu mpi kufwa nsiku ya Nzambi. (Kuyantika 9:3, 4; Levi 17:10) Na kutadila Luka 22:20 (NW), Yezu tubaka nde: “Dikopa yai ketendula kuwakana ya mpa na nsadisa ya menga na mono, yina tatyamuka sambu na beno.” Keti dikopa yina kukumaka mpenza “kuwakana ya mpa”? Yo lenda salama ve, sambu kuwakana kele lusilu, kansi yo kele ve kima mosi ya muntu lenda simba.

Yo yina, menga ti vinu kele kaka bidimbu. Dimpa kele kidimbu ya nitu ya kukuka ya Kristu. Yezu kusadilaka dimpa yina kubikalaka na madya ya Paki. Bo salaka dimpa yango kukonda levire. (Kubasika 12:8) Mbala mingi Biblia kesadilaka levire bonso kidimbu ya masumu. Yo yina, mampa kemonisa nitu ya kukuka yina Yezu kutambikaka. Yo vandaka ya kukonda masumu.—Matayo 16:11, 12; 1 Korinto 5:6, 7; 1 Piere 2:22; 1 Yoane 2:1, 2.

Vinu ya mbwaki kemonisa menga ya Yezu. Menga yina kusalaka nde kuwakana ya mpa kuyantika kusala. Yezu kutubaka nde menga na yandi kutyamukaka sambu na ‘kulolula masumu.’ Na mutindu yina, bantu lenda kuma bunkete na meso ya Nzambi mpi kukota na kuwakana ya mpa ti Yehowa. (Baebreo 9:14; 10:16, 17) Kuwakana yai mepesaka Bakristu ya kwikama 144 000 dikabu ya kukwenda na zulu. Kuna bo tasala bonso bantotila mpi banganga-Nzambi sambu na kusakumuna bantu yonso.—Kuyantika 22:18; Yeremia 31:31-33; 1 Piere 2:9; Kusonga 5:9, 10; 14:1-3.

Nani fwete dya mpi kunwa bidimbu yai ya Lusungiminu? Na kutuba ya mbote, kaka bantu yina kele na kuwakana ya mpa, disongidila bantu yina kele ti kivuvu ya kukwenda na zulu, bantu fwete dya mampa mpi kunwa vinu. Mpeve santu ya Nzambi kendimisaka bantu ya mutindu yai nde bo meponaka bo sambu na kuvanda bantotila na zulu. (Roma 8:16) Bo kele mpi na kuwakana ya Kimfumu ti Yezu.—Luka 22:29.

 Inki beto lenda tuba sambu na bantu yina kele ti kivuvu ya kuzinga kimakulu na Paladisu na ntoto? Bo kelemfukaka na ntuma ya Yezu mpi bo kekwendaka na Madya ya Nkokila ya Mfumu, yo yina bo kekwendaka ve sambu na kudya bidimbu kansi sambu na kutala na luzitu yonso. Mbala mosi na mvula na nima ya kudinda ya ntangu na Nisani 14, Bambangi ya Yehowa kesungiminaka Madya ya Nkokila ya Mfumu. Ata na inza ya mvimba kaka mafunda fyoti mpamba ya bantu ketubaka nde bo kele ti kivuvu ya kukwenda na zulu, lusungiminu yai kele mfunu sambu na Bakristu yonso. Yo kele dibaku yina bantu yonso lenda sadila sambu na kuyindula zola ya kuluta nene ya Yehowa Nzambi mpi ya Yezu Kristu.—Yoane 3:16.