ITHOMO RĨA 18
Ũrĩa Tũngĩkũũrana Akristiano a Ma
Nĩ kũrĩ andũ bilioni nyingĩ moigaga atĩ nĩ Akristiano, no makoragwo na mawĩtĩkio matiganĩte, na marũmagĩrĩra ithimi itiganĩte ũtũũro-inĩ wao. Gũkĩrĩ ũguo-rĩ, tũngĩkũũrana Akristiano a ma atĩa?
1. Mũkristiano nũũ?
Akristiano nĩ arutwo kana arũmĩrĩri a Jesu Kristo. (Thoma Atũmwo 11:26.) Monanagia atĩa atĩ o nĩ arutwo a Jesu? Jesu ooigire: “Mũngĩtũũra kiugo-inĩ gĩakwa, mũgũkorũo mũrĩ arutwo akwa kũna.” (Johana 8:31) Ũguo nĩ kuuga atĩ, Akristiano a ma no mũhaka mathĩkagĩre morutani ma Jesu. Na o ta ũrĩa Jesu aahũthagĩra Maandĩko gwĩkĩra hinya maũndũ marĩa aarutanaga, no taguo maũndũ marĩa Akristiano a ma metĩkĩtie magĩrĩirũo gũkorũo moimanĩte na Bibilia.—Thoma Luka 24:27.
2. Akristiano a ma monanagia wendo atĩa?
Jesu eerire arũmĩrĩri ake ũũ: “Mwendanage inyuĩ ene o ta ũrĩa niĩ ndĩmwendete.” (Johana 15:12) Jesu oonanirie atĩa atĩ nĩ eendete arutwo ake? Nĩ aahũthagĩra mahinda hamwe nao, akamekĩra ngoro, na akamateithia. O na nĩ aarutire muoyo wake nĩ ũndũ wao. (1 Johana 3:16) O na Akristiano a ma, makĩria ma kwaria ũhoro wĩgiĩ wendo, nĩ monanagia kũgerera ciugo ciao na ciĩko ciao atĩ nĩ mendaine.
3. Nĩ wĩra ũrĩkũ Akristiano a ma marutaga?
Jesu nĩ aaheire arutwo ake wĩra. “[Aamatũmire] makahunjie ũhoro wĩgiĩ Ũthamaki wa Ngai.” (Luka 9:2) Akristiano a karine ya mbere matiahunjagia o kũrĩa maathathayagĩria, no maahunjagia nginya kũndũ kũngĩ kwa mũingĩ, na mĩciĩ-inĩ ya andũ. (Thoma Atũmwo 5:42; 17:17.) O na ũmũthĩ, Akristiano a ma mahunjagia ũhoro wa ma ũrĩa ũkoragwo Bibilia-inĩ kũrĩa guothe andũ mangĩkorũo. Tondũ nĩ mendete andũ arĩa angĩ, nĩ mahũthagĩra mahinda mao na hinya wao meyendeire kũhunjia ndũmĩrĩri ya Bibilia ĩrĩa ĩheaga andũ kĩĩrĩgĩrĩro na ĩkamomĩrĩria.—Mariko 12:31.
THUTHURIA MAKĨRIA
Reke tũthuthurie tuone ngũrani ya Akristiano a ma na andũ arĩa matarũmagĩrĩra morutani ma Jesu na kĩonereria gĩake.
4. Nĩ mathuthuragia ũhoro wa ma ũrĩa ũrĩ thĩinĩ wa Bibilia
Akristiano a karine ya mbere nĩ maarumagĩrĩra Kiugo kĩa Ngai
Ti andũ othe arĩa moigaga atĩ nĩ Akristiano mathuthuragia o na kana makarũmĩrĩra ũhoro wa ma ũrĩa ũrĩ thĩinĩ wa Bibilia. Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
-
Nĩ maũndũ marĩkũ kanitha iria ciĩĩtaga cia Gĩkristiano cianeka ikagirĩrĩria andũ kwĩruta maũndũ marĩa Jesu aarutanire?
Jesu aarutanaga ũhoro wa ma kuuma Kiugo-inĩ kĩa Ngai. Thomai Johana 18:37, mũcoke mwarĩrĩrie kĩũria gĩkĩ:
-
Kũringana na Jesu-rĩ, tũngĩkũũrana atĩa Akristiano arĩa makoragwo “mwena wa ũhoro ũrĩa wa ma”?
5. Nĩ mahunjagia ũhoro wa ma ũrĩa ũrĩ thĩinĩ wa Bibilia
Akristiano a karine ya mbere nĩ maahunjagĩrĩa andũ arĩa angĩ
Jesu atanambata igũrũ, nĩ aaheire arũmĩrĩri ake wĩra ũrĩa ũthiaga na mbere nginya ũmũthĩ. Thomai Mathayo 28:19, 20 na Atũmwo 1:8, mũcoke mwarĩrĩrie kĩũria gĩkĩ:
-
Wĩra wa kũhunjia ũngĩkaarutwo na gĩkĩro kĩrĩkũ?
6. Nĩ marũmagĩrĩra maũndũ marĩa mahunjagia
Nĩ kĩĩ gĩateithirie Tom gũkorũo na ma atĩ nĩ ona Akristiano a ma? Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
-
Kũringana na video ĩyo-rĩ, nĩ kĩĩ gĩatũmĩte Tom atigane na maũndũ ma ndini?
-
Nĩ kĩĩ gĩtũmaga akorũo na ma atĩ nĩ onete ũhoro wa ma?
Ciĩko nĩ iguũragia maũndũ maingĩ gũkĩra ciugo. Thomai Mathayo 7:21, mũcoke mwarĩrĩrie kĩũria gĩkĩ:
-
Nĩ kĩĩ gĩkoragwo kĩrĩ kĩa bata makĩria harĩ Jesu, hihi nĩ maũndũ marĩa tuugaga atĩ nĩ twĩtĩkĩtie kana nĩ marĩa tuonanagia na ciĩko citũ?
7. Nĩ mendanĩte
Akristiano a karine ya mbere nĩ meendanĩte
Hihi Akristiano manaingĩria mĩoyo yao ũgwati-inĩ nĩ ũndũ wa Akristiano arĩa angĩ? Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
-
Kũringana na video ĩyo-rĩ, nĩ kĩĩ gĩatindĩkire Lloyd kũingĩria muoyo wake ũgwati-inĩ nĩ ũndũ wa Mũrũ wa Ithe Witũ Johansson?
-
Hihi nĩ ũkuona ta eekire ũrĩa Mũkristiano wa ma agĩrĩirũo nĩ gwĩka?
Thomai Johana 13:34, 35, mũcoke mwarĩrĩrie ciũria ici:
-
Arutwo a Jesu (kana Akristiano a ma) magĩrĩirũo kũrũmbũyania atĩa na andũ a rũrĩrĩ rũngĩ kana bũrũri ũngĩ?
-
Mangĩka ũguo atĩa kũngĩgĩa mbaara?
ANDŨ AMWE MOIGAGA: “Gũtiramakania mũndũ nĩ wa ndini ĩrĩkũ. Ũndũ ũrĩa wa bata nĩ gwĩtĩkia Jesu Kristo.”
-
Ũngĩthomera mũndũ rĩandĩko rĩrĩkũ rĩa kuonania ũrĩa tũngĩkũũrana Akristiano a ma?
ŨRĨA TWERUTA
Akristiano a ma marũmagĩrĩra morutani ma Bibilia, makonania wendo wa kwĩima, na makahunjia ũhoro wa ma ũrĩa ũrĩ thĩinĩ wa Bibilia.
Ciũria cia gũcokera
-
Maũndũ marĩa Akristiano a ma metĩkĩtie makoragwo moimanĩte na kĩĩ?
-
Nĩ kĩĩ kĩngĩtũteithia gũkũũrana Akristiano a ma?
-
Nĩ wĩra ũrĩkũ Akristiano a ma marutaga?
RIKĨRA
Wĩrute makĩria ũhoro wa gĩkundi kĩa andũ arĩa merutanagĩria biũ kũrũmĩrĩra kĩonereria kĩa Jesu Kristo na morutani make.
Thoma wone kĩrĩa gĩateithirie mũtumia ũmwe warĩ mathĩa wa kanitha wa Gatoreki kũgĩa na famĩlĩ ya ma ya kĩĩroho.
“Maahũthĩrire Bibilia gũcokia ciũria ciakwa ciothe!” (Mũrangĩri, Ĩpuro 1, 2014)
Rora wone ũrĩa Akristiano a ma monanagia wendo kwerekera Akristiano arĩa marabatara ũteithio.
Gũteithĩrĩria Aarĩ na Ariũ a Ithe Witũ Rĩrĩa Kuoimĩra Gĩcanjama—Gacunjĩ ka Video (3:57)
Thuthuria wone ũrĩa Akristiano a ma ũmũthĩ mekaga maũndũ o ta marĩa Akristiano a karine ya mbere meekaga, marĩa Jesu ooigĩte atĩ nĩmo mangĩkamenyithania arũmĩrĩri ake.
“Akristiano a Ma Mangĩmenyeka Atĩa?” (Mũrangĩri, Ĩpuro 1, 2012)
Icunjĩ Ingĩ Hihi Ũngĩenda Gũthoma
CIŨRIA IRIA CIŨRAGIO KAINGĨ
Mũbango wa Aira a Jehova wa Kwĩruta Bibilia na Andũ Ũkoragwo Ũhaana Atĩa?
Rĩrĩa ũreruta Bibilia na Aira a Jehova, no ũhũthĩre Bibilia ĩrĩa ũkwenda. No ũnyite ũgeni andũ anyu othe a famĩlĩ kana arata aku rĩrĩa ũreruta.
