Thakame nĩ ya bata mũno tondũ gũtirĩ mũndũ ũngĩkorũo muoyo atarĩ nayo. Ngai arĩ na kĩhooto gĩa gũtwĩra ũrĩa twagĩrĩirũo nĩ kũhũthĩra thakame tondũ nĩwe watũũmbire. Hihi oigĩte atĩa ũhoro-inĩ wĩgiĩ thakame? Nĩ twagĩrĩirũo kũmĩrĩa kana gwĩkĩrũo mĩkiha-inĩ? Na nĩ kĩĩ kĩngĩtũteithia gũtua matua mega megiĩ ũndũ ũcio?

1. Jehova akoragwo na mawoni marĩkũ megiĩ thakame?

Jehova eerire athathaiya ake ũũ mahinda-inĩ ma Bibilia: “Muoyo wa kĩũmbe o gĩothe nĩ thakame yakĩo.” (Maũndũ ma Alawii 17:14) Maitho-inĩ ma Jehova, thakame ĩrũgamagĩrĩra muoyo. Tondũ kĩheo kĩa muoyo nĩ kĩndũ gĩtheru kuuma kũrĩ Ngai, thakame o nayo nĩ kĩndũ gĩtheru.

2. Nĩ maũndũ marĩkũ Ngai agirĩtie megiĩ ũhũthĩri wa thakame?

Jehova nĩ aathĩte athathaiya ake a tene matikanarĩe thakame. (Thoma Kĩambĩrĩria 9:4 na Maũndũ ma Alawii 17:10.) Nĩ aacokerire watho ũcio rĩrĩa kĩama kĩrĩa gĩatongoragia kĩerire Akristiano ‘methemage thakame.’—Thoma Atũmwo 15:28, 29.

Gwĩthema thakame nĩ kuuga atĩa? Ndagĩtarĩ angĩkwĩra wĩtheme njohi, hatarĩ nganja ndũngĩmĩnyua. No hihi no ũrĩe irio ciĩkĩrĩtwo njohi kana wĩkĩrũo njohi mĩkiha-inĩ? Aca, ndũngĩka ũguo. O ũndũ ũmwe na ũcio, watho wa Ngai wa gwĩthema thakame, nĩ kuuga atĩ tũtiagĩrĩirũo kũnyua thakame, kana kũrĩa nyama ya nyamũ ĩtaitĩtwo thakame. Ningĩ tũtiagĩrĩirũo kũrĩa irio o ciothe ciĩkĩrĩtwo thakame.

Ĩ kũhũthĩra thakame maũndũ-inĩ megiĩ ũrigitani? Njĩra imwe cia ũrigitani ikoragwo ciagararĩte watho wa Ngai ĩmwe kwa ĩmwe. Njĩra icio nĩ hamwe na gwĩkĩrũo thakame ĩrĩ yothe, kana gĩcunjĩ o gĩothe harĩ icunjĩ iria nene ciayo, nĩcio hengereca ndune (red cells), hengereca njerũ (white cells), hengereca cia kũgiria thakame kuura (platelets), na gĩcunjĩ gĩa thakame kĩrĩa kĩhaana maĩ (plasma). Njĩra ingĩ cia ũrigitani, no ikorũo itekuuna watho wa Ngai ĩmwe kwa ĩmwe. Kwa ngerekano, njĩra imwe cia ũrigitani, ihutĩtie kũhũthĩra tũcunjĩ tũnini tũrutĩtwo harĩ icunjĩ iria nene cia thakame. Nacio njĩra ingĩ, ihutĩtie kũhũthĩra thakame ya mũndũ we mwene. Rĩrĩa tũrecũrania ũhoro wĩgiĩ njĩra icio cia ũrigitani, o mũndũ agĩrĩirũo nĩ gwĩtuĩra itua rĩake mwene. a​—Agalatia 6:5.

 THUTHURIA MAKĨRIA

3. Tuaga matua marĩkenagia Jehova megiĩ ũrigitani

Nĩ kĩĩ kĩngĩgũteithia gũtua matua megiĩ ũrigitani, marĩa mararingana na mawoni ma Ngai megiĩ thakame? Mwĩrorerei VIDEO ĩno, mũcoke mwarĩrĩrie bata wa kuoya makinya marĩa marũmĩrĩire.

• Kũhoya ũheo ũũgĩ.​—Jakubu 1:5.

• Gũthuthuria motaaro ma Bibilia na ũrĩa mangĩhũthĩka.​—Thimo 13:16.

• Gũtuĩria njĩra cia ũrigitani iria ingĩoneka kũrĩa ũikaraga.

• Kũmenya njĩra cia ũrigitani iria wee ũtangĩtĩkĩra.

• Gũtigĩrĩra atĩ itua rĩrĩa ũgũtua nĩ rĩgũgũtiga na thamiri theru.—Atũmwo 24:16. b

• Kũmenya atĩ gũtirĩ mũndũ wagĩrĩirũo gũkwĩra itua rĩrĩa ũgũtua maũndũ-inĩ megiĩ thamiri, o na kana nĩ ũrĩa mũhikanĩtie nake, mũthuri wa kĩũngano kana mwarimũ waku wa Bibilia.—Aroma 14:12.

• Kwandĩka itua rĩaku.

4. Aira a Jehova methaga ũrigitani ũrĩa mwega biũ

No kũhoteke mũndũ arũmĩrĩre watho wa Ngai wĩgiĩ thakame na agĩe na ũrigitani ũrĩa mwega biũ ategwĩkĩrũo thakame. Mwĩrorerei VIDEO ĩno.

Thomai Tito 3:2, mũcoke mwarĩrĩrie kĩũria gĩkĩ:

• Twagĩrĩirũo gũkorũo na gĩtĩo na ũhooreri nĩkĩ rĩrĩa tũraria na mandagĩtarĩ?

 5. Rĩrĩa ũrigitani ũrahũthĩra tũcunjĩ twa thakame

Thakame ĩkoragwo na icunjĩ inya nene, nĩcio hengereca ndune, hengereca njerũ, hengereca cia kũgiria thakame kuura, na gĩcunjĩ gĩa thakame kĩhaana maĩ. Icunjĩ icio nĩ ikoragwo na tũcunjĩ tũngĩ tũingĩ tũnini. c Tũcunjĩ tũmwe tũnini twa thakame nĩ tũhũthagĩrũo gũthondeka ndawa iria iteithagĩrĩria harĩ kũrũa na mĩrimũ kana kũgirĩrĩria thakame kuura.

Ũhoro-inĩ wĩgiĩ ũrigitani ũrahũthĩra tũcunjĩ tũrĩa tũnini twa thakame, o Mũkristiano nĩwe wagĩrĩirũo gwĩtuĩra itua rĩake mwene akĩhũthĩra thamiri yake ĩmenyeretio nĩ Bibilia. Akristiano amwe no mathuure kũrega ũrigitani ũrahũthĩra tũcunjĩ twa thakame. Angĩ nao no mone atĩ thamiri yao ndĩramagirĩrĩria gwĩtĩkĩra ũrigitani ũrahũthĩra tũcunjĩ twa thakame.

Rĩrĩa ũratua matua wĩyũrie kĩũria gĩkĩ:

• Ingĩtaarĩria ndagĩtarĩ atĩa kĩrĩa kĩratũma ndege kana njĩtĩkĩre ũrigitani ũrahũthĩra tũcunjĩ tũmwe twa thakame?

 ŨRĨA TWERUTA

Jehova endaga twĩtheme kũhũthĩra thakame ũũru.

Ciũria cia gũcokera

• Nĩ kĩĩ gĩtũmaga Jehova one thakame ĩrĩ kĩndũ gĩtheru?

• Tũmenyaga atĩa atĩ watho wa Ngai wa gwĩthema thakame nĩ ũhutĩtie nginya kwaga gwĩkĩrũo thakame mĩkiha-inĩ?

• Nĩ kĩĩ kĩngĩgũteithia gũtua matua mega megiĩ ũrigitani ũrahũthĩra thakame?