“Kandi hole ofikola!” Ngeenge osho ho kala u udite ngaho otashi dulika u yelekwe u efe po ofikola. Oshitukulwa eshi oshi na eenghedi dimwe odo tadi dulu oku ku kwafela.

•  Osho hashi ningifa vamwe va efe po ofikola

•  Diladila koilanduliko yeenghatu doye

•  Osho shiwa okuninga

•  Osho oomakula voye tava ti

Ovashiivinawa vehongo ova yandja omatomheno amwe oo haa ningifa ovanafikola va efe po ofikola:

• Oupyakadi wokulihonga. ‘Okukala iho shi endifa nawa mofikola, keshe efimbo oitwa otai shuna ashike pedu.’

• Okuhakala u na ohokwe. ‘Osho handi lihongo mofikola itashi ti sha kwaame.’

• Oupyakadi wopamaxupilo. ‘Ondi na okulonga opo ndi kwafele oukwaneumbo wetu.’

Ombiibeli oya ti: “Omunamayele ta diinine eenghatu daye.” (Omayeletumbulo 14:15) Oshilihongomwa? Diladila koilanduliko yeenghatu doye ofimbo ino efa po ofikola.

Lipula kutya:

• ‘Ohandi ka dula tuu okumona oilonga iwa monakwiiwa ngeenge onda efa po ofikola?’

  Julia okwa ti: “Diladila kutya oto ka kala wa pumbwa oilonga, opo u dule okufila oshisho oukwaneumbo weni. Ndele oto ka mona oilonga ngahelipi ngeenge oilonga ihapu ohai pula nande odiploma?”

• ‘Ohandi ka dula tuu okuungaunga noupu nomaupyakadi omonakwiiwa ngeenge onda efa po ofikola?’

  Daniel okwa ti: “Ofikola ohai ku palele ondjila. Monakwiiwa, oto ka shakeneka ovanhu, omayeleko noilonga oyo to ka longa otai ka kala i na omaupyakadi a faafana naao wa li wa taalela mofikola.”

• ‘Okweefa po ofikola otashi ka kuma ngahelipi owino woye?’

  Anna okwa ti: “Osho we lihonga mofikola otashi dulika shi kale shihe na oshilonga paife. Ashike ngeenge owa wanifa omido 23, ndele to kendabala okuninga o-budget yoye, oto ka tya, ‘Onda pandula eshi nda kala handi yandje elitulemo komwaalu.’”

• Konga ekwafo. Ombiibeli oya ti: “Ovapukululi vahapu otava eta exupifo.” (Omayeletumbulo 11:14) Ngeenge ito shi endifa nawa mofikola pula ovadali voye, omuhongi, omutekuli woye, ile omukulunhu umwe oo we lineekela opo e ku kwafele nghee u na okuxwepopala.

  Edward okwa ti: “Popya nomuhongi woye ngeenge oto nyengwa. Omafimbo amwe otashi dulika u diladile kutya omuhongi oye e na oupyakadi, ashike luhapu ngeenge owa kongo ekwafo onghalo otai ka xwepopala.”

• Diladila nghee onghalamwenyo yoye tai ka kala. Ombiibeli oya ti: “Exulilo loshinima li dule ehovelo lasho.” (Omuudifi 7:8) Ngeenge owa mane ofikola ito ka kala ashike u shii oilongwa oyo wa longwa, ndele oto ka kala yo u na omaukwatya mawa nowino.

  Vera okwa ti: “Ngeenge owa kulu, ito ka shanga eenhumwafo ile u leshe opo u ka shange ekonakono, ashike onghedi omo ho ungaunga nepolimano kofikola otai ku kwafele nghee u na oku ka ungaunga nomaupyakadi shimha wa mane ofikola.”

• Diladila komaetepo oye. Ombiibeli oya ti: “Omweendeleli keshe te likongele eemhumbwe.” (Omayeletumbulo 21:5) Ino diladila kutya okweefa po ofikola osho ashike ekandulepo loupyakadi. Oto dulu okumanifa ofikola yoye mokukala ho hongelwa meumbo, ile kointaneta.

  Benjamin okwa ti: “Ofikola ohai ku hongo nghee u na okulonga noudiinini, okukandula po omaupyakadi nosho yo okulongela kumwe navakweni. Omauwa oo ohaa kalelele. Osha fimana neenghono adishe okumana ofikola.”

Osho sha fimana: Mana ofikola opo u dule okulilongekidila oinakuwanifwa youkulunhu.