Eendombwedi daJehova ohadi ongala luvali oshivike keshe peenhele hadi ifanwa Olupale lOuhamba. Oshike hashi ningwa ko, nomolwashike sha fimana okuya kokwoongala oko?

•  Oshike hashi ningwa kOlupale lOuhamba?

•  Omolwashike wa pumbwa okuya kokwoongala?

•  Osho oomakula voye tava ti

KOlupale lOuhamba ohaku kundafanwa ashike ehongo lopaMbiibeli. Okukala pokwoongala otaku ku kwafele:

• u lihonge oshili kombinga yaKalunga.

• u ude ko oiningwanima oyo tai ningwa paife.

• u kale omunhu muwa.

•  u mone ookaume vawa.

Owe shi shiiva tuu? Eenhele dokwoongalela dEendombwedi daJehova ohadi ifanwa Olupale lOuhamba, molwaashi Ouhamba waKalunga oo hau kundafanwa ko pandjikilile. — Mateus 6:9, 10; 24:14; Lukas 4:43.

Ouyelele ou hau kundafanwa ko otau ku kwafele. Omafinamhango opaMbiibeli oo haa kundafanwa pokwoongala kwEendombwedi daJehova otae ku kwafele u “hapupalife ounongo.” (Omayeletumbulo 4:5) Osho osha hala kutya Ombiibeli otai dulu oku ku kwafela u kale ho ningi omatokolo opandunge. Otai ku kwafele yo u mone omanyamukulo omapulo a fimanenena, ngaashi:

• Onghalamwenyo oi na ngoo eityo lasha?

• Mbela Kalunga oye e na okupewa ombedi omolwokumona oixuna kwetu?

• Oshike hashi tu ningilwa ngeenge otwa fi?

Apa otapa shikula oipalanyole yoipopiwa imwe oyo hai kundafanwa pokwoongala kwomexuliloshivike:

• Omolwashike twa pumbwa ewiliko lOmbiibeli?

• Openi to dulu okumona ekwafo pefimbo lomaudjuu?

• Osho Ouhamba waKalunga tau tu ningile kunena.

Brenda okwa ti: “Omunafikola womongudu yetu okwa li e uya kokwoongala efiku limwe. Okwa kala omutumba noukwaneumbo wetu, notwa li hatu tale naye momambo etu. Lwanima, okwa ka lombwela nge kutya okwa li a kuminwa onghedi omo ovanhu va yandja omatyekosha pokwoongala. Okwa lombwela nge yo kutya kongeleka yavo kave na oishangomwa yokukonakonwa ngaashi fye.”

Owe shi shiiva tuu? MOlupale lOuhamba ohamu i wa oshali, noihamu umbwa ongalo.

Eendafano otali ku tu omukumo. Ombiibeli oya popya etomheno limwe kutya Ovakriste ohava ongala pamwe, opo va ‘twaafane omukumo.’ (Ovaheberi 10:24, 25) Ohashi tulumukifa neenghono okweendafana novanhu ovo va pitifa komesho Kalunga nosho yo ouwa wavakwao.

Elisa okwa ti: “Shimha efiku lonhumba inali endela nge nawa ohandi kala nda nyika oluhodi nonda loloka, ashike ovanhu kOlupale lOuhamba ohava kwafele nge ndi kale ndi udite xwepo. Eshi handi shuna keumbo konima yokwoongala ohandi kala nda hafa nondi na eenghono defiku la shikula ko.”

Owe shi shiiva tuu? Mounyuni aushe omu na omaongalo e dulife 120 000 Eendombwedi daJehova, ashike okwoongala ohaku ningilwa peenhele di dulife 60 000. Omudo keshe, ohaku tungwa Omalupale Ouhamba oupokati 1 500, omolwomuvalu tau hapupala wovanhu ovo hava kala pokwoongala. *