Harmagedonimi sorsunnissaq qaqugu pissava?

“Takusaqalerpunga, takuallu, inuppassuit amerlangaaramik kisinneqarsinnaanngitsut, inuiaqatigiinnit naggueqatigiinnillu inuiannillu immikkullu oqaasilinnit tamanit pisut . . . annikilliortitaangaarnermit aniguisimasut.” — SAQQUMMERSITAT 7:9, 14.

HARMAGEDONIMI sorsunnissamut inissitsitertoqareersimavoq. Tamanna qanoq nalunngilarput?

Nunarsuaq tamakkerlugu inoqareerpoq Jehovamut kiffartortunik ileqqussatigut najoqqutassianik qutsissunik Biibilimiittunik maleruaasunik. Guuti ikiortigalugu inuit millionillit, inuiaqatigiinnit, naggueqatigiinnit inuiannillu immikkut oqaasilinnit tamaneersut qatanngutigiittut peqatigiittut asaqatigiillutik ataqatigiilluinnarput. Jehovap Nalunaajaasui taamatut ataasiussuseqarput. — Johannesi 13:35.

Saatanip sakkutuuni qanittukkut katersortissavai inunnut eqqissisimasunut illersortissaqarpasinngitsunullu taakkununnga sakkortuumik saassussiniassagami. (Ezekieli 38:8-12; Saqqummersitat 16:13, 14, 16) Tamanna qanoq nalunngilarput? Biibilimi pisussat aalajangersimasut eqqaaneqarput Harmagedonip qaqugu takkunnissaanik paasinninnissatsinnut iluaqutigisinnaasavut. Pisussat siulittuutigineqartut ilarpassui maannakkut pilereerput.

Pisussat siulittuutigineqartut maanna eqquussortut

Jiisusi ajoqersugaasa aperaat ‘silarsuup naggatissaata’ qanillinera qanoq ilillutik paasisinnaaneritsik. (Matthæusi 24:3) Jiisusi akivoq taamaalinerani ‘inuiaat pikitsitsiumaartut inuiannut, naalagaaffillu naalagaaffimmut, sumilu tamani kaannersuaqartarumaartoq nunalu sajuttarluni’. Taava oqarpoq: “Tamakku tamarmik nallisitsinernut aallaqqaataapput.” (Matthæusi 24:7, 8) Apustilip Paulusip piffissaq tamanna ‘ullussanik kingullernik’ taavaa, oqarporlu ‘nalliukkumaartut ullut atugarliungaarfissat’. (2 Timotheusi 3:1) Illit isumaqarpit siulittuutini tamakkunani ullut inuuffigisavut allaaserineqartut?

Sooq ullut taakku taama atugarliorfiutigissappat? Apustilip Johannesip tamatumunnga  pissutaasoq nassuiarpaa. Taassuma siulittuutigaa Saatanip inngilipiluisalu nunarsuaq kisiat ‘piffissami sivikitsumi’ iliuuseqarfigisinnaassagaat, eqqaaneqarporlu piffissami tamatumani ‘kamattorsuussasoq’. (Saqqummersitat 12:7-12) Malugisarpiuk ullumikkut inuit akornanni nakuuserneq kamannerlu atuuttut, sumiiffimmi ataasiinnaanngitsumi silarsuarmili tamarmi?

Jiisusi aamma oqarpoq piffissami erloqinartorsiorfiungaartumi tamatumani suliaq immikkut illuinnartoq suliarineqassasoq. Ima oqarpoq: “[Guutip naalagaaffianik] iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.” (Matthæusi 24:14) Ullumikkut Jehovap Nalunaajaasui nunani 235-nit amerlanerusuni oqaatsit 500-nit amerlanerusut atorlugit Guutip naalagaaffianik iivangkiiliu pillugu oqaluussisarput. Atuagassiat biibililersaarutit marluk saqqummersittagaat, Napasuliaq Alapernaarsuiffik aamma Vågn op!, nunarsuarmi siammarsimanerpaajupput. Nalunaajaasut aamma Biibili oqaatsinut 100-t missaannut nutsersimavaat. Taakkua suliaat nammineq piumassutsiminnik sulisut kisiisa sulisoralugit suliarineqartarpoq kajumissutsimillu tunissuteqarnerinnakkut aningaasalersorneqarluni. Oqaluussineq maluginiarnartoq tamanna Jiisusip siulittuutaata eqquunneraa?

Biibilimi eqqaaneqarportaaq pisussat Jehovap Guutip akerlilersortaasalu sorsuutilernerannik kinguneqarumaartut. Siulittuutit pingasut uku eqquuttussat takujumaarpatit:

Qanittukkut pisussat

Siulittuut nr. 1: Biibilimi allassimavoq naalagaaffiit erseqqissumik nalunaarumaartut oqarlutik “sumilluunniit aarlerinartoqanngilaq”. Immaqa isumaqassapput ajornartorsiutitik annerpaat qaangerluinnalerlugit. Taamatulli nalunaaruteqarnerup kingorna pisussat eqqissinanngilluinnassapput. — 1 Thessalonikamiut 5:1-3.

Siulittuut nr. 2: Tamatuma kingorna naalakkersuisut arlallit aalajangissapput silarsuarmi upperisarsioqatigiinnut annerpaanut akuliunniarlutik. Biibilimi naalakkersuisut nersummut qaasuttumut assersuunneqarput, silarsuarmilu upperisarsiorneq eqqunngitsoq arnamut atortittartumut nersutip qaavani qimussertumut assersuunneqarluni. (Saqqummersitat 17:3, 15-18) Assersuutaasumik nersutip qaasuttup upperisarsiornerit Guutimut sinniisuunerartut nungutikkunigit Guutip piumasaa sianiginagu naammassissavaa.

Apustilip Johannesip pisussaq pissanganartoq assersuusiorluni imatut allaatigaa: “[Nassuit] qulit takusavit nersutillu arnaq atortittartoq taanna uumissulissavaat suerullugulu tamataarutitillugulu neqaalu nerillugu ikuallallugulu. Tassami Guutip nammineq piumasani taakkununnga naammassitissimavaa.” — Saqqummersitat 17:16, 17.

Siulittuut nr. 3: Upperisarsiorneq eqqunngitsoq iluatsittumik saassunneqareerpat Saatanip naalagaaffiit katersussavai Jehovamik Guutimik pallorfiginnittunut saassussitinniarlugit. — Saqqummersitat 7:14; Matthæusi 24:21.

Tamanna ilinnut qanoq sunniuteqassava?

Biibilimi allassimasunik sukumiisumik paasiniaanissannut periarfissaqarsimanngikkuit immaqa upperiuminaatsissavat pisussat eqqaaneqareersut pinissaat. Pissutissaqarluarporli upperissallugu siulittuutit eqquuteqqissaarnissaat tamatumalu qanittukkut pinissaa. Siulittuuterpassuit Biibilimeersut eqquutereersimasut tamatumunnga uppernarsaataapput. *

Soormi piffissaq sivisunngitsoq atorlugu paasiniarukku sooq Jehovap Nalunaajaasuisa qularinngilluinnaraat ‘Guutip Ajugaqanngitsup ullussarsuani sorsunnissaq’ qanillisoq, aamma sooq ullussarsua annilaangagisariaqanngikkit? Aperikkit inunnut Jehovap Guutip illersugaanut ilaassaguit iliuuserisariaqakkatit pillugit Biibilimi qanoq allassimasoqarnersoq. (Saqqummersitat 16:14) Taamaalioruit siunissaq pillugu isummat allanngorujussuarsinnaassagunarpoq.

[Quppernerup ataani ilanngussaq]

[Qupp. 8-mi issuagaq]

Jehovap Nalunaajaasuisa sulinerat Biibilimi siulittuutip eqquunneraa?