DISÁ 38
Bhana Valolo ku Ujitu wa Mwenyu
Kukala ku mwenyu kutubhana kithangana kya kubhanga ima itubhangesa kudiwana. Né mwene kyoso kitudibhana ni maka, tutena kusanguluka ku mwenyu. Kyenyiki, kyebhi kitutena kulondekesa kwila, tubhana valolo ku ujitu wa mwenyu? Kyebhi o kima kyabetakota kitubhangesa kubhana valolo ku mwenyu?
1. Mukonda dyahi twatokala kubhana valolo ku mwenyu?
Twatokala kubhana valolo ku mwenyu, mukonda wene ujitu watubhana Tata yetu Jihova. Mwène ‘o fixi ya mwenyu’ kifwa mwène wabhange o mwenyu. (Jisálamu 36:9) “Mwène ubhana oso o kukola o mwenyu ni kubhwima ni kumona ima yoso.” (Ikalakalu 17:25, 28) O jivelusu jiji jilondekesa kwila, Jihova utubhana yoso itwabhindamena phala tukale ku mwenyu. Maji kikyene ngó, mwene ubhanga dingi. Jihova utubhana yoso itwabhindamena phala kusanguluka ku mwenyu.—Tanga Ikalakalu 14:17.
2. Kyebhi kitulondekesa kwa Jihova kwila twamubhana valolo ku ujitu wa mwenyu?
Sayi kizuwa selevende ya Nzambi mu ukulu amwixanene Davidi wasambe: “Mesu mé ma ngi mono mukutu wami, kyoso ngó kiluwa u di umba.” (Jisálamu 139:16) Kiki kilondekesa kwila, Jihova ukubhana valolo tunde mumala amamenu. O mwenyu wé wala ni valolo ya dikota kwa Jihova. (Tanga Matesu 10:29-31.) Jihova ubhana valolo ya dikota ku mwenyu, kyenyiki mwene uluwala kyavulu kyoso o muthu kya katula o mwenyu wamukwa mba udijibha. a (Makatukilu 20:13) Jihova uluwala we se etu kitudilange anga tuta o mwenyu wetu mba ya akwetu mu kilwezu. Kyoso kitulanga o mwenyu wetu anga tuxila o mwenyu wa akwetu, tulondekesa kwila tubhana valolo yadikota ku ujitu yu.
DILONGE DINGI
Tala o maukexilu utena kulondekesa kwila ubhana valolo ku ujitu wa mwenyu.
3. Langa o sawidi yê
Kuma tujiselevende ja Jihova, twakanena kubhakula o mwenyu wetu phala kumusidivila ngó mwene. Kyadifwangana kala twabhakula o mukutu wetu kala sata kwa Nzambi. Tanga Loma 12:1, 2, mukusuluka bhanga o ibhwidisu ya kayela:
-
Kala kitwatange mu jivelusu jiji, ihi itena kukukwatekesa kulanga o sawidi yê?
-
Ebhi o maukexilu akubhanga kiki?
4. Mukubhanga o ima dilange phala kibhukale muthu udita mu kilwezu mba ufwa
O Bibidya itutendelesa kulenga o ima ita o mwenyu wetu mu kilwezu. Tala OVIDYU phala kumona ima yebhi i utena o kubhanga phala kudilanga.
Tanga Jisabhu 22:3, mukusuluka zwelenu kyebhi eye ni akwenu mutena kudilanga . . .
-
ku bhata.
-
ku salu.
-
mukujokala.
-
mukwendesa mba mukwendela mu dikalu.
5. Xila o mwenyu wa kabwetele wala hanji mumala
Sobha Davidi wajimbulula kwila, Jihova umona yoso ibhita ni kabwetele wala hanji mumala. Tanga Jisálamu 139:13-17, mukusuluka bhanga o kibhwidisu kya kayela:
-
Phala Jihova o mwenyu umatekena mu kithangana kyebhi: kyoso o muhatu kyemita inga kyoso o mona kya muvwala?
O itumu ya Jihova phala o mundu wa Izalayele mu ukulu, yexile mulanga o mama ni mona ka muvwalele luwa. Tanga Makatukilu 21:22, 23, mukusuluka bhanga o ibhwidisu ya kayela:
-
Kyebhi Jihova kyexile mutala o muthu ujibha o mona mu mala se kukimesena?
-
Kyebhi mwene kyadivwa kyoso o muthu kya kibhanga mu lwelu? b
-
Ihi ubanza ya lungu ni ukexilu wa Jihova wakutala o maka yá?
Kate mwene o muhatu wejiya kwila o mwenyu wala ni valolo yadikota, utena kubanza kwila mwene we utena kuseluka. Tanga Izaya 41:10, mukusuluka bhanga o ibhwidisu ya kayela:
-
Se muhatu a mu mujijidika kuseluka, mwene utena kubhinga kikwatekesu kwa nanyi? Mukonda dyahi?
ATHU AVULU AMBA: “Muhatu woso wala ni ufolo wakuseluka, mukonda o mukutu wemwene.”
-
Ihi ikuxikinisa kwila Jihova ubhana valolo kikale kumwenyu wa mama ni wa kabwetele kê?
IHI IWADILONGO
O Bibidya itulonga kuzola, kuxila ni kulanga o mwenyu, o ujitu wakatunda watubhana Jihova. Kiki kyalungu kikale ni mwenyu wetu mba mwenyu wa akwetu.
Kubhitulula
-
Mukonda dyahi o mwenyu wa muthu wala ni valolo yadikota kwa Jihova?
-
Kyebhi Jihova kyadivwa kyoso o muthu kyakatula o mwenyu wa mukwa mu lwelu?
-
Mukonda dyahi eye ubhana valolo ku ujitu wa mwenyu?
TOKWESA DINGI
Kyebhi kitutena kusakidila Jihova ku ujitu wa mwenyu?
O Kwila Nzambi utena kuloloka muhatu waseluka?
“Ihi Yamba o Bibidya ya Lungu ni Kuseluka?” (Milongi ya jw.org)
Dilonge kyebhi o ukexilu wa Nzambi kutala o mwenyu utukwatekesa kusola itonokenu ki ite o myenyu yetu mu kilwezu.
“‘Jijoko Jita o Mwenyu mu Kilwezu’—O Kwila Tutena ku Jijokala?” (Despertai! 8 de Outubro de 2000)
Abha se o muthu wala ni ixinganeku ya kudijibha? Tala kyebhi o Bibidya itena kumukwatekesa.
a Jihova wivwa o ndolo ya muthu wamesena kukatula o mwenyu we, mwene wamesena kumukwatekesa. Jihova usuwa kyavulu yó atoloka o mixima. (Jisálamu 34:18) Phala kwijiya kyebhi Jihova kya kwatekesa yó ala ni ixinganeku ya kudijibha, tanga o mbandu Tokwesa Dingi mu milongi “Eme Ngamesena Kufwa—O Kwila o Bibidya Itena ku Ngikwatekesa se Ngala ni Ixinganeku ya Kudijibha?”
b Woso waseluka kya kabhingi dingi kuditatela mukonda dya kituxi kiki, Jihova utena kuloloka. Phala kwijiya dingi tanga o mbandu, Tokwesa Dingi mu milongi, “Ihi Yamba o Bibidya ya Lungu ni Kuseluka?”
Eye Nange Wandawabhela we o Maka Yá
IBHUIDISU IENE MU BHANGA DINGI O ATHU
Kyebhi o Jimbangi ja Jihova Kyene Mulonga o Bibidya?
Ni ukexilu ubhe yú wakulonga o Bibidya wa Jimbangi ja Jihova, eye utena we kutanga o jivelesu mu Bibidya yoso yoso iwamesena. Divwa kyambote phala kwixana muthu kumwiji wé mba kamba dyé kudibunda neye mukudilonga o Bibidya.
