Bato mingi bakanisaka ete Nzambe ya solo nde azali koyangela mokili oyo. Kasi soki ezali bongo, bampasi elingaki kozala mingi boye na mokili? (Kolimbola Mibeko 32:4, 5) Biblia elobi ete moto mabe nde azali kokonza mokili.​—Tángá 1 Yoane 5:19.

Ndenge nini moto mabe akómaki kokonza bato? Na ebandeli, anzelu moko atombokelaki Nzambe mpe atindaki mwasi ná mobali ya liboso básala mpe bongo. (Ebandeli 3:1-6) Mwasi ná mobali yango bandimaki kotosa anzelu wana motomboki, Satana, mpe bakómisaki ye mokonzi na bango. Kaka Nzambe Mozwi-ya-Nguya-Nyonso nde azali mokonzi oyo abongi, kasi alingi ete bato bápona boyangeli na ye mpo balingaka ye. (Kolimbola Mibeko 6:6; 30:16, 19) Likambo ya mawa, ebele ya bato bakosami mpe baponi kaka nzela wana ya mabe oyo mwasi ná mobali ya liboso baponaki.​—Tángá Emoniseli 12:9.

Nzambe akotika boyangeli mabe ya Satana libela? Te! Nzambe akosalela Yesu mpo na kolongola makambo nyonso ya mabe oyo Satana abimisá.​—Tángá 1 Yoane 3:8.

Yesu akosalela nguya oyo Nzambe apesi ye mpo na koboma Satana. (Baroma 16:20) Na nsima, Nzambe akoyangela bato mpe akozongisa bango na bomoi ya esengo mpe ya kimya oyo akanaki mpo na bango na ebandeli.​—Tángá Emoniseli 21:3-5.