ບົດທີ 15
ຜູ້ເຖົ້າແກ່ຊ່ວຍເຫຼືອປະຊາຄົມແນວໃດ?
ແຟງລັງ
ການສອນ
ການບຳລຸງລ້ຽງ
ການປະກາດ
ພວກເຮົາບໍ່ມີຄຸນພໍ່ທີ່ຮັບເງິນເດືອນໃນອົງການຂອງພວກເຮົາ. ແທນທີ່ຈະເປັນແນວນັ້ນ ແບບດຽວກັບທີ່ເຮັດໃນຕອນເລີ່ມຕົ້ນຂອງປະຊາຄົມຄລິດສະຕຽນ ມີການແຕ່ງຕັ້ງຜູ້ດູແລເດີນທາງທີ່ມີຄຸນວຸດທິພຽງພໍ “ເພື່ອ . . . ລ້ຽງຮັກສາພວກຊຸມນຸມແຫ່ງພະເຈົ້າ.” (ກິດຈະການ 20:28) ຜູ້ເຖົ້າແກ່ເຫຼົ່ານີ້ເປັນຜູ້ຊາຍທີ່ມີສາຍສຳພັນທີ່ແໜ້ນແຟ້ນກັບພະເຢໂຫວາເຊິ່ງນຳໜ້າໃນປະຊາຄົມແລະໃນການບຳລຸງລ້ຽງ “ບໍ່ໃຊ່ດ້ວຍຂືນໃຈ . . . ແຕ່ວ່າດ້ວຍນ້ຳໃຈພ້ອມຕາມພະເຈົ້າ ບໍ່ໃຊ່ດ້ວຍເຫັນແກ່ກຳໄລອັນເປັນໂລບ ແຕ່ວ່າດ້ວຍໃຈເຫຼື້ອມໃສ.” (1 ເປໂຕ 5:1-3) ເຂົາເຈົ້າເຮັດວຽກຫຍັງແດ່ເພື່ອປະໂຫຍດຂອງເຮົາ?
ເຂົາເຈົ້າເອົາໃຈໃສ່ແລະປົກປ້ອງພວກເຮົາ. ຜູ້ເຖົ້າແກ່ໃຫ້ການຊີ້ນຳແລະຊ່ວຍປົກປ້ອງປະຊາຄົມໃຫ້ໃກ້ຊິດພະເຢໂຫວາ. ໂດຍສຳນຶກວ່າພະເຈົ້າໄວ້ວາງໃຈເຂົາເຈົ້າໃນໜ້າທີ່ທີ່ສຳຄັນນີ້ ຜູ້ເຖົ້າແກ່ບໍ່ໄດ້ໃຊ້ສິດອຳນາດປົກຄອງຄົນຂອງພະເຈົ້າຢ່າງເກີນຂອບເຂດ ແຕ່ແທນທີ່ຈະເຮັດແນວນັ້ນ ເຂົາເຈົ້າມີສ່ວນສົ່ງເສີມຄວາມສຸກແລະຄວາມຍິນດີຂອງພວກເຮົາ. (2 ໂກລິນໂທ 1:24) ເຊັ່ນດຽວກັບຜູ້ລ້ຽງແກະເອົາໃຈໃສ່ແກະແຕ່ລະຕົວຂອງຕົນ ຜູ້ເຖົ້າແກ່ພະຍາຍາມຮູ້ຈັກກັບສະມາຊິກໝົດທຸກຄົນຂອງປະຊາຄົມເປັນສ່ວນບຸກຄົນ.—ສຸພາສິດ 27:23
ເຂົາເຈົ້າສອນເຮົາໃຫ້ຮູ້ວິທີເຮັດຕາມໃຈປະສົງຂອງພະເຈົ້າ. ໃນທຸກ ໆ ອາທິດຜູ້ເຖົ້າແກ່ຮັບຜິດຊອບການປະຊຸມຕ່າງ ໆ ປະຈຳປະຊາຄົມເພື່ອເສີມສ້າງຄວາມເຊື່ອຂອງພວກເຮົາ. (ກິດຈະການ 15:32) ນອກຈາກນັ້ນ ຊາຍທີ່ອຸທິດຕົວເຫຼົ່ານີ້ຍັງນຳໜ້າໃນວຽກງານການສອນ ໄປປະກາດກັບພວກເຮົາ ແລະຝຶກສອນພວກເຮົາໃນວິທີຕ່າງ ໆ ກ່ຽວກັບວຽກງານຮັບໃຊ້.
ເຂົາເຈົ້າໃຫ້ການໜູນໃຈເຮົາເປັນສ່ວນຕົວ. ເພື່ອຊ່ວຍເຮົາໃຫ້ເສີມສ້າງສາຍສຳພັນທີ່ເປັນສ່ວນຕົວກັບພະເຢໂຫວາ ຜູ້ເຖົ້າແກ່ທີ່ຢູ່ໃນທ້ອງຖິ່ນຂອງເຮົາອາດໄປຢາມເຮົາຢູ່ເຮືອນຫຼືເວົ້າລົມກັບເຮົາຢູ່ຫໍປະຊຸມເພື່ອໃຫ້ຄວາມຊ່ວຍເຫຼືອແລະການປອບໂຍນຈາກພະຄຳພີ.—ຢາໂກໂບ 5:14, 15
ນອກເໜືອຈາກວຽກຢູ່ໃນປະຊາຄົມແລ້ວ ຜູ້ເຖົ້າແກ່ສ່ວນຫຼາຍຍັງມີວຽກອາຊີບແລະຄວາມຮັບຜິດຊອບທາງດ້ານຄອບຄົວເຊິ່ງຮຽກຮ້ອງເວລາແລະຄວາມເອົາໃຈໃສ່ຈາກເຂົາເຈົ້າ. ພວກເຮົາຄວນຈະນັບຖືພີ່ນ້ອງຊາຍເຫຼົ່ານີ້ທີ່ເຮັດວຽກໜັກ.—1 ເທຊະໂລນີກ 5:12, 13
-
ຜູ້ເຖົ້າແກ່ໃນປະຊາຄົມມີໜ້າທີ່ຫຍັງແດ່?
-
ຜູ້ເຖົ້າແກ່ສະແດງຄວາມສົນໃຈເປັນສ່ວນຕົວຕໍ່ເຮົາໂດຍວິທີໃດແດ່?
