Mu tshikondo tshia dikenga dinene bantu nebapete ntatu mikole menemene itubu kabayi banji kupeta to. Bilondeshile milayi ya mu Bible, dikenga dinene nedienzeke “mu matuku a ku nshikidilu,” anyi mu “tshikondo tshia ku nshikidilu.” (2 Timote 3:1; Danyele 12:4) Netshikale tshikondo tshia “dikenga ditu kadiyi dianji kuenzeka katshia ku tshibangidilu tshia bufuki buvua Nzambi mufuke too ne ku tshikondo atshi, ne kadiakuenzeka kabidi to.”​—Mâko 13:19; Danyele 12:1; Matayi 24:21, 22.

Malu enzeka mu dikenga dinene

•   Dibutuka dia bitendelelu bia dishima. Nebabutule bitendelelu bia dishima mu mupodi wa dîsu. (Buakabuluibua 17:1, 5; 18:9, 10, 21) Bukalenge bua matunga masanga budi buleja makokeshi a malu a tshididi nebubutule bitendelelu ebi bua kukumbaja disua dia Nzambi.​—Buakabuluibua 17:3, 15-18. *

•   Dibunda ntendelelu mulelela. Mu tshikena kumona tshia Yehezekele badi babikila bisamba bidisange bikala mua kuteta bua kubutula bantu badi mu ntendelelu mulelela ne: “Goga wa mu buloba bua Magoga.” Kadi Nzambi neakube batendeledi bende ku kabutu aku.​—Yehezekele 38:1, 2, 9-12, 18-23.

•   Dinyoka badi basombele pa buloba. Yezu nealumbuluishe bukua bantu buonso ne “neatapulule bantu anu bu mudi mulami wa mikoko utapulula mikoko ne mbuji.” (Matayi 25:31-33) Nealumbuluishe muntu yonso bua muvuaye muambuluishe anyi mubenge kuambuluisha “bana babu” ne Yezu, bikala mua kukokesha nende mu diulu.​—Matayi 25:34-46.

•   Disangisha bikala mua kukokesha mu Bukalenge. Padi bena lulamatu badibu basungule bua kukokesha ne Kristo bajikija lubilu luabu pa buloba, nebababishe bua kuya mu diulu.​—Matayi 24:31; 1 Kolinto 15:50-53; 1 Tesalonike 4:15-17.

•   Armagedone. “Mvita ya dituku dinene dia Nzambi Wa Bukole Buonso” eyi badi bayibikila kabidi ne: “Dituku dia Yehowa.” (Buakabuluibua 16:14, 16; Yeshaya 13:9; 2 Petelo 3:12) Nebabutule bantu bonso bikala Kristo mua kuangata bu baluishi bende. (Sefanya 1:18; 2 Tesalonike 1:6-10) Nebikale mua kubutula kabidi ndongoluelu wa malu a tshididi wa pa buloba bujima, udi Bible wamba mudiye nyama wa luonji udi ne mitu muanda-mutekete.​—Buakabuluibua 19:19-21.

Malu enzeka panyima pa dikenga dinene

•   Diela Satana ne bademon bende mu buloko. Muanjelu munene neele Satana ne bademon bende mu dijimba dile menemene,” mmumue ne: kabatshiyi kabidi ne mushindu wa kupambuisha bantu to. (Buakabuluibua 20:1-3) Tudi mua kufuanyikija nsombelu wikala nende Satana mu dijimba dile menemene ne wa muntu udi mu buloko; kakuikala kabidi ne bukole bua kusaka bantu ku dienza malu kampanda nansha.​—Buakabuluibua 20:7.

•   Dituadija dia Bukokeshi bua bidimu tshinunu. Bukalenge bua Nzambi nebutuadije kukokesha bua bidimu tshinunu ne nebutuadile bantu mabenesha bungi kabuyi kubala. (Buakabuluibua 5:9, 10; 20:4, 6) Bena mu “musumba munene” badi muntu kayi mua kubala ‘nebafume mu dikenga dinene,’ bapanduke bua kumona ntuadijilu wa bukokeshi bua bidimu tshinunu pa buloba.​—Buakabuluibua 7:9, 14; Misambu 37:9-11.