Be dia be amin’ireo miaramila amerikanina efa misotro ronono no maty namono tena. Maherin’ny 20 isan’andro izany. Misy 950 eo ho eo isam-bolana aza no manandrana mamono tena, amin’ireo mahazo fanampiana avy amin’ny fanjakana.

Hoy ny gazety China Daily: ‘Betsaka ny vehivavy sinoa latsaka ny 30 taona no miasa any amin’ny faritany hafa, ka efa ho ny antsasak’izy ireo no lasa bevohoka tsy manambady. Tato ho ato vao tena nirongatra be izany.’ Voalaza koa fa ‘betsaka ny Sinoa manao tokantranomaso.’

Miverina indray ny tazomoka, nefa efa saika foana tanteraka tamin’ny 1974. Antony roa no voalaza fa nahatonga izany: Nahenan’ny fanjakana ny vola ikarakarana ny fahasalamam-bahoaka, ary eo koa ny olana ara-toe-karena.

Na dia efa miova aza ny fiainan’ny olona noho ny fandrosoana, dia ny 74 isan-jaton’ireo nanontaniana no nilaza fa aleony ihany itadiavan’ny havany vady, toy izay izy no hifidy an’izay tiany. Ny 89 isan-jato no niteny hoe tsy tiany raha izy sy ny vady aman-janany irery no miray trano, fa aleony koa mba miara-mipetraka aminy ny ray aman-dreniny sy ny havany hafa.

‘Efa nilaozan’ny toetrandro ny Eglizy Katolika, na eran’i Eoropa na any Amerika, fa ny fiangonana fotsiny no ngezabe. Tranainy be ny fanaontsika, ary mihavitsy koa ny masera sy mompera. Be pitsipitsiny be ny fomba fiasantsika, nefa tsy mahomby akory. Ny fiakanjo sy ny fombafomba anefa atao mirentirenty erỳ. Tsy nivoatra mihitsy ny Eglizy tao anatin’ny 200 taona!’—Tenin’ny Kardinaly Carlo Maria Martini, navoakan’ny gazety Corriere della Sera rehefa maty izy.