ബൈബിൾവാക്യങ്ങളുടെ വിശദീകരണം
വെളിപാട് 21:1—“ഒരു പുതിയ ആകാശവും പുതിയ ഭൂമിയും”
“പിന്നെ ഞാൻ ഒരു പുതിയ ആകാശവും പുതിയ ഭൂമിയും കണ്ടു. പഴയ ആകാശവും പഴയ ഭൂമിയും നീങ്ങിപ്പോയിരുന്നു. കടലും ഇല്ലാതായി.”—വെളിപാട് 21:1, പുതിയ ലോക ഭാഷാന്തരം.
“ഞാൻ പുതിയ ആകാശവും പുതിയ ഭൂമിയും കണ്ടു; ഒന്നാമത്തെ ആകാശവും ഒന്നാമത്തെ ഭൂമിയും ഒഴിഞ്ഞുപോയി; സമുദ്രവും ഇനി ഇല്ല.”—വെളിപാട് 21:1, സത്യവേദപുസ്തകം.
വെളിപാട് 21:1-ന്റെ അർഥം
ദൈവത്തിന്റെ സ്വർഗീയരാജ്യം എല്ലാ മനുഷ്യഗവൺമെന്റുകളെയും നീക്കിക്കളയുമെന്ന് ആലങ്കാരികമായി പറയുകയാണ് ഈ വാക്യത്തിൽ. ആ രാജ്യം ദുഷ്ടന്മാരെയെല്ലാം ഇല്ലാതാക്കും. എന്നിട്ട് അത് ദൈവരാജ്യത്തിന്റെ അധികാരത്തിനു മനസ്സോടെ കീഴ്പെടുന്ന ഒരു പുതിയ മനുഷ്യസമൂഹത്തിന്മേൽ ഭരണം നടത്തും.
വെളിപാട് പുസ്തകത്തിൽ കാര്യങ്ങൾ അവതരിപ്പിച്ചിരിക്കുന്നത് ‘അടയാളങ്ങളായിട്ടാണ്,’ അല്ലെങ്കിൽ ആലങ്കാരികമായിട്ടാണ്. (വെളിപാട് 1:1) അതുകൊണ്ടുതന്നെ ഈ വാക്യത്തിൽ പറഞ്ഞിരിക്കുന്ന സ്വർഗവും ഭൂമിയും അക്ഷരീയ അർഥത്തിലല്ല, ആലങ്കാരിക അർഥത്തിലാണ് എടുക്കേണ്ടത്. മാത്രമല്ല “പുതിയ ആകാശവും പുതിയ ഭൂമിയും” ആലങ്കാരിക അർഥത്തിൽ മറ്റു വാക്യങ്ങളിലും ഉപയോഗിച്ചിട്ടുണ്ട്. (യശയ്യ 65:17; 66:22; 2 പത്രോസ് 3:13) ഈ വാക്യങ്ങളും ബൈബിളിലെ മറ്റു വിവരണങ്ങളും താരതമ്യം ചെയ്തുനോക്കിയാൽ ഈ വാക്കുകളുടെ അർഥം മനസ്സിലാക്കാനാകും.
‘പുതിയ ആകാശം.’ ബൈബിളിൽ ചിലപ്പോൾ ഭരണകൂടത്തെയോ ഗവൺമെന്റുകളെയോ ഒക്കെ കുറിക്കാൻ ‘ആകാശം’ എന്ന പദം ഉപയോഗിച്ചിട്ടുണ്ട്. (യശയ്യ 14:12-14; ദാനിയേൽ 4:25, 26) ഇനി, പ്രാവചനികദർശനങ്ങളിൽ “ആകാശം എന്ന പദം മിക്കപ്പോഴും കുറിക്കുന്നത് അപ്പോഴുള്ള ഭരണത്തെയോ ഗവൺമെന്റിനെയോ ആണ്” എന്ന് ഒരു പരാമർശഗ്രന്ഥവും പറയുന്നു. a അതുകൊണ്ട് വെളിപാട് 21:1-ലെ ‘പുതിയ ആകാശം’ ദൈവരാജ്യത്തെയാണ് കുറിക്കുന്നത്. ഈ സ്വർഗീയഗവൺമെന്റിനെ ചിലപ്പോഴൊക്കെ “സ്വർഗരാജ്യം” എന്നു വിളിച്ചിട്ടുണ്ട്. ആ രാജ്യത്തെക്കുറിച്ച് വെളിപാട് പുസ്തകത്തിൽ ഉടനീളവും ബൈബിളിന്റെ മറ്റു പുസ്തകങ്ങളിലും കാണാനാകും. (മത്തായി 4:17; പ്രവൃത്തികൾ 19:8; 2 തിമൊഥെയൊസ് 4:18; വെളിപാട് 1:9; 5:10; 11:15; 12:10) യേശു രാജാവായിരിക്കുന്ന ദൈവരാജ്യം ‘പഴയ ആകാശത്തെ’ അതായത് മനുഷ്യൻ ഉണ്ടാക്കിയിരിക്കുന്ന എല്ലാ ഗവൺമെന്റുകളെയും നീക്കിക്കളയും.—ദാനിയേൽ 2:44; ലൂക്കോസ് 1:31-33; വെളിപാട് 19:11-18.
‘പുതിയ ഭൂമി.’ നമ്മൾ ജീവിക്കുന്ന ഈ അക്ഷരീയ ഭൂമി ഒരിക്കലും നശിപ്പിക്കപ്പെടുകയോ അതിനു പകരം മറ്റൊന്നു വരുകയോ ചെയ്യില്ല എന്ന് ബൈബിൾ പറയുന്നു. (സങ്കീർത്തനം 104:5; സഭാപ്രസംഗകൻ 1:4) അപ്പോൾപ്പിന്നെ ഈ വാക്യത്തിൽ പറഞ്ഞിരിക്കുന്ന ഭൂമി എന്താണ്? ബൈബിളിൽ പലപ്പോഴും “ഭൂമി” എന്ന വാക്ക് മനുഷ്യകുടുംബത്തെ കുറിക്കാൻ ഉപയോഗിച്ചിട്ടുണ്ട്. (ഉൽപത്തി 11:1; 1 ദിനവൃത്താന്തം 16:31; സങ്കീർത്തനം 66:4; 96:1) അതുകൊണ്ടുതന്നെ ‘പുതിയ ഭൂമി’ എന്നതുകൊണ്ട് ഉദ്ദേശിക്കുന്നത് ദൈവത്തിന്റെ സ്വർഗീയരാജ്യത്തിന് കീഴ്പെട്ടിരിക്കുന്ന പുതിയ മനുഷ്യസമൂഹത്തെയാണ്. ‘പഴയ ഭൂമി’ എന്നത് ദൈവരാജ്യത്തെ എതിർക്കുന്ന മനുഷ്യസമൂഹവുമാണ്. ദൈവരാജ്യത്തെ എതിർക്കുന്ന ഈ മനുഷ്യർ നീങ്ങിപ്പോകും.
“കടലും ഇല്ലാതായി.” വെളിപാട് 21:1-ന്റെ ബാക്കി ഭാഗംപോലെതന്നെ ‘കടൽ’ എന്നു പറഞ്ഞിരിക്കുന്നതും ആലങ്കാരികമായിട്ടാണ്. ഇളകിമറിയുന്ന, പെട്ടെന്നു പ്രക്ഷുബ്ധമാകുന്ന കടൽ കുറിക്കുന്നത് ദൈവത്തിൽനിന്ന് അകന്ന, പ്രശ്നങ്ങളും കുഴപ്പങ്ങളും ഉണ്ടാക്കുന്ന മനുഷ്യവർഗത്തെയാണ്. (യശയ്യ 17:12, 13; 57:20; വെളിപാട് 17:1, 15) അങ്ങനെയുള്ള മനുഷ്യരും ഇല്ലാതാകും. സങ്കീർത്തനം 37:10 പറയുന്നു: “കുറച്ച് കാലംകൂടെ കഴിഞ്ഞാൽ ദുഷ്ടന്മാരുണ്ടായിരിക്കില്ല. അവർ ഉണ്ടായിരുന്നിടത്ത് നീ നോക്കും; പക്ഷേ, അവരെ കാണില്ല.”
വെളിപാട് 21:1-ന്റെ സന്ദർഭം
‘കർത്താവിന്റെ ദിവസത്തിൽ’ സംഭവിക്കുന്ന കാര്യങ്ങളാണ് വെളിപാട് പുസ്തകം മുൻകൂട്ടിപ്പറയുന്നത്. (വെളിപാട് 1:10) ബൈബിൾ പ്രവചനമനുസരിച്ച് ആ ദിവസം 1914-ൽ തുടങ്ങി. അന്ന് യേശു ദൈവരാജ്യത്തിന്റെ രാജാവായി. b അപ്പോൾത്തന്നെ യേശു ഭൂമിയുടെ ഭരണം മുഴുവനായി ഏറ്റെടുക്കുമായിരുന്നില്ല. ശരിക്കും, മറ്റു പ്രവചനങ്ങൾ പറയുന്നതനുസരിച്ച് ‘കർത്താവിന്റെ ദിവസത്തിന്റെ’ ആദ്യഭാഗത്ത് ഈ ലോകാവസ്ഥകൾ വഷളാകും. ആ ആദ്യകാലഘട്ടത്തെയാണ് ‘അവസാനകാലം’ എന്നു വിളിച്ചിരിക്കുന്നത്. (2 തിമൊഥെയൊസ് 3:1-5, 13; മത്തായി 24:3, 7; വെളിപാട് 6:1-8; 12:12) പ്രശ്നങ്ങളുള്ള, കുഴപ്പങ്ങൾ നിറഞ്ഞ ആ കാലഘട്ടത്തിന്റെ അവസാനത്തിൽ ദൈവരാജ്യം ആലങ്കാരികമായ ആകാശത്തെയും ഭൂമിയെയും നീക്കിക്കളയും. എന്നിട്ട് സമാധാനത്തിന്റെയും സന്തോഷത്തിന്റെയും ഒരു പുതിയ അധ്യായത്തിന് തുടക്കം കുറിക്കും. അന്ന് ‘പുതിയ ഭൂമി’ അഥവാ ദൈവരാജ്യത്തിന്റെ പ്രജകൾ നല്ല ആരോഗ്യത്തോടെയും സന്തോഷത്തോടെയും ഇവിടെ ജീവിക്കും.—വെളിപാട് 21:3, 4.
വെളിപാട് പുസ്തകത്തിന്റെ ചുരുക്കം മനസ്സിലാക്കാൻ ഈ വീഡിയോ കാണുക.
a മക്ലിന്റോക്കിന്റെയും സ്ട്രോങ്ങിന്റെയും വിജ്ഞാനകോശം (1891), വാല്യം 4 (ഇംഗ്ലീഷ്), പേജ് 122.