၁။ ပျော်ရွှင်တဲ့မိသားစုဘဝကို ရရှိစေတဲ့အဓိကအချက်က ဘာလဲ။

ယေဟောဝါဘုရားသခင်က သင့်မိသားစုဘဝကို ပျော်ရွှင်စေချင်တယ်။ ကိုယ်တော့်စကားတော် သမ္မာကျမ်းစာမှာ မိသားစုဝင်ယောက်တိုင်းအတွက် လမ်းညွှန်ချက်တွေပေးထားပြီး တစ်ဦးချင်းစီကို ဘုရားသခင်လုပ်ဆောင်စေလိုတဲ့ တာဝန်တွေကို ဖော်ပြပေးတယ်။ မိသားစုဝင်တွေက ဘုရားသခင့်ဆုံးမစကားနဲ့အညီ မိမိတို့ရဲ့တာဝန်တွေကို လုပ်ဆောင်တဲ့အခါ ကျေနပ်ဖွယ်အကျိုးရလဒ် ရရှိကြတယ်။ “ဘုရားသခင်၏တရားစကားတော်ကို ကြားနာ၍ စောင့်ရှောက်သောသူသည် သာ၍ပျော်ရွှင်၏” လို့ ယေရှုပြောခဲ့တယ်။—လုကာ ၁၁:၂၈။

၂။ မိသားစုပျော်ရွှင်မှုဆိုတာ ဘယ်အရာကို အသိအမှတ်ပြုခြင်းအပေါ် မူတည်သလဲ။

^၂ မိသားစုပျော်ရွှင်မှုက မိသားစုဘဝကို အစပြုပေးတဲ့အရှင်၊ “ကျွန်ုပ်တို့အဖ” လို့ ယေရှုခေါ်ဆိုခဲ့တဲ့ ယေဟောဝါကို အသိအမှတ်ပြုခြင်းပေါ် အဓိကမူတည်နေပါတယ်။ (မဿဲ ၆:၉) မြေကြီးပေါ်မှာရှိတဲ့ မိသားစုတိုင်းက ကောင်းကင်ခမည်းတော်ကြောင့် တည်ရှိလာတာဖြစ်တယ်၊ ဒါကြောင့် မိသားစုပျော်ရွှင်အောင် ဘာလုပ်ရမလဲဆိုတာကို ကိုယ်တော် ကောင်းကောင်းသိတယ်။ (ဧဖက် ၃:၁၄၊ ၁၅) မိသားစုဝင်တစ်ဦးချင်းစီရဲ့ တာဝန်နဲ့ပတ်သက်ပြီး သမ္မာကျမ်းစာက ဘာသွန်သင်သလဲ။

၃။ လူ့မိသားစုအစကို သမ္မာကျမ်းစာမှာ ဘယ်လိုဖော်ပြထားသလဲ၊ ဒီဖော်ပြချက်မှန်တယ်ဆိုတာ ကျွန်ုပ်တို့ ဘယ်လိုသိရသလဲ။

^၃ ယေဟောဝါက ပထမဦးဆုံးလူသား၊ အာဒံနဲ့ဧဝကို ဖန်ဆင်းခဲ့ပြီး သူတို့နှစ်ဦးကို  အကြင်လင်မယားအဖြစ် ပေါင်းဖက်ပေးခဲ့တယ်။ ကိုယ်တော်က သူတို့နှစ်ယောက်ကို သာယာလှပတဲ့ မြေကြီးပရဒိသုစံအိမ် ဧဒင်ဥယျာဉ်မှာ နေရာချပေးပြီး သားသမီးတွေမွေးဖွားဖို့ ပြောခဲ့တယ်။ “များပြားစွာမွေးဖွားကြလော့။ မြေကြီးကိုပြည့်စေ၍ နိုင်ကြလော့” ဆိုပြီး ယေဟောဝါပြောခဲ့တယ်။ (ကမ္ဘာဦး ၁:၂၆-၂၈; ၂:၁၈၊ ၂၁-၂၄) ဒါက ဒဏ္ဍာရီပုံပြင်တစ်ပုဒ် မဟုတ်ဘူး၊ အကြောင်းကတော့ မိသားစုဘဝရဲ့အစနဲ့ပတ်သက်ပြီး ကမ္ဘာဦးကျမ်းဖော်ပြချက် မှန်ကန်တယ်ဆိုတာ ယေရှုဖော်ပြခဲ့တယ်။ (မဿဲ ၁၉:၄၊ ၅) ကျွန်ုပ်တို့ဟာ ပြဿနာများစွာကို ရင်ဆိုင်ကြရပြီး လက်ရှိဘဝအသက်တာက ဘုရားသခင် ရည်ရွယ်ထားတဲ့အတိုင်း မဖြစ်ခဲ့ဘူး။ ဒါပေမဲ့ မိသားစုပျော်ရွှင်နိုင်တဲ့ အကြောင်းရင်းတွေရှိပါတယ်၊ အဲဒါကို ကြည့်ကြစို့။

၄။ (က) ပျော်ရွှင်တဲ့မိသားစုဖြစ်ဖို့ မိသားစုဝင်တစ်ဦးချင်းစီက ဘယ်လိုလုပ်ဆောင်နိုင်သလဲ။ (ခ) ယေရှုရဲ့အသက်တာကို လေ့လာခြင်းက မိသားစုပျော်ရွှင်မှုအတွက် ဘာကြောင့် အလွန်အရေးကြီးသလဲ။

^၄ မိသားစုဝင်တစ်ဦးစီက မေတ္တာတင်ပြရာမှာ ဘုရားသခင်ကိုတုပခြင်းအားဖြင့် မိသားစုဘဝပျော်ရွှင်ဖို့ လုပ်ဆောင်နိုင်တယ်။ (ဧဖက် ၅:၁၊ ၂) ဒါပေမဲ့ ဘုရားသခင်ကို မမြင်နိုင်တဲ့အတွက် ကိုယ်တော့်ကို ကျွန်ုပ်တို့ ဘယ်လိုတုပနိုင်သလဲ။ မိမိရဲ့သားဦးကို ကောင်းကင်ကနေ မြေကြီးကို စေလွှတ်ပေးခဲ့တဲ့အတွက် ယေဟောဝါရဲ့လုပ်ရပ်တွေကို ကျွန်ုပ်တို့ သင်ယူနိုင်ကြတယ်။ (ယောဟန် ၁:၁၄၊ ၁၈) ကိုယ်တော့်သားတော် ယေရှုခရစ် မြေကြီးပေါ်ရှိစဉ်က ကောင်းကင်ခမည်းတော်ကို ကောင်းစွာတုပခဲ့တဲ့အတွက် ယေရှုကို မြင်တွေ့ရခြင်း၊ ယေရှုစကား နားထောင်ရခြင်းက ယေဟောဝါနဲ့အတူရှိနေရသလို၊ ယေဟောဝါပြောတာကို ကြားနေရသလို ဖြစ်တယ်။ (ယောဟန် ၁၄:၉) ဒါကြောင့် ယေရှုပြသခဲ့တဲ့မေတ္တာအကြောင်း လေ့လာခြင်း၊ ကိုယ်တော့်ပုံသက်သေကို တုပခြင်းအားဖြင့် ကျွန်ုပ်တို့တစ်ဦးစီဟာ မိသားစုဘဝပျော်ရွှင်ဖို့ ထောက်ကူပေးနိုင်ကြတယ်။

၅၊ ၆။ (က) အသင်းတော်အပေါ် ယေရှုပြုမူဆက်ဆံပုံက လင်ယောက်ျားတွေအတွက် ဘယ်လိုနည်းနဲ့ ပုံသက်သေဖြစ်သလဲ။ (ခ) အပြစ်ခွင့်လွှတ်ခံရဖို့ ဘာလုပ်ရမလဲ။

^၅ တပည့်တွေကို ယေရှုပြုမူဆက်ဆံခဲ့တဲ့နည်းအတိုင်း လင်ယောက်ျားတွေက မိမိတို့ဇနီးကို ပြုမူဆက်ဆံသင့်တယ်လို့ သမ္မာကျမ်းစာက ဖော်ပြတယ်။ ဒီကျမ်းစာလမ်းညွှန်ချက်ကို သုံးသပ်ကြည့်ပါ– “ခင်ပွန်းဖြစ်သူတို့၊ ခရစ်တော်သည် အသင်းတော်ကိုချစ်သဖြင့် အသင်းတော်အတွက် အသက်စွန့်တော်မူသကဲ့သို့ သင်တို့၏ဇနီးကို ဆက်၍ချစ်နေကြလော့။ . . . ထိုနည်းတူ ခင်ပွန်းသည်လည်း ကိုယ့်ကိုယ်ကိုယ်ချစ်သကဲ့သို့ ဇနီးကို ချစ်သင့်၏။ မိမိဇနီးကိုချစ်သောသူသည် ကိုယ့်ကိုယ်ကိုယ် ချစ်သောသူဖြစ်၏။ အကြောင်းမူကား မည်သူမျှ မိမိခန္ဓာကိုယ်ကို မုန်းသည်မရှိ။  လူတိုင်း မိမိခန္ဓာကိုယ်ကို ကျွေးမွေး၍ မြတ်နိုးတတ်၏။ ခရစ်တော်သည် အသင်းတော်ကိုကျွေးမွေး၍ မြတ်နိုးတော်မူသကဲ့သို့ ဖြစ်၏။”—ဧဖက် ၅:၂၃၊ ၂၅-၂၉။

^၆ တပည့်တွေနဲ့ဖွဲ့စည်းထားတဲ့ အသင်းတော်ကို ယေရှုချစ်မြတ်နိုးခြင်းက လင်ယောက်ျားတွေအတွက် အကောင်းဆုံးပုံသက်သေပဲ။ တပည့်တွေက အပြစ်သားတွေဖြစ်ကြပေမဲ့လည်း သူတို့အတွက် ကိုယ်တော်အသက်စွန့်ခြင်းအားဖြင့် “မိမိလူတို့ကို . . . အဆုံးတိုင်အောင်ချစ်” ခဲ့တယ်။ (ယောဟန် ၁၃:၁; ၁၅:၁၃) အလားတူပဲ၊ လင်ယောက်ျားတွေကို “ခင်ပွန်းဖြစ်သူတို့၊ သင်တို့၏ဇနီးကို ဆက်၍ချစ်ကြလော့။ သူတို့ကို ခါးသီးစွာ အမျက်မထွက်ကြနှင့်” လို့တိုက်တွန်းထားတယ်။ (ကောလောသဲ ၃:၁၉) ဇနီးဖြစ်သူ တစ်ခါတလေ အမှားလုပ်မိတဲ့အခါမှာတောင် အထက်ပါဆုံးမစကားကိုကျင့်သုံးဖို့ လင်ယောက်ျားတွေကို ဘာကထောက်ကူပေးမလဲ။ မိမိကိုယ်တိုင်လည်း အမှားလုပ်မိတတ်တယ်ဆိုတဲ့အချက်နဲ့ ဘုရားသခင့်ခွင့်လွှတ်မှုခံရဖို့ သူ ဘာလုပ်ရမယ်ဆိုတာကို ပြန်သတိရသင့်တယ်။ သူ ဘာလုပ်ရမလဲ။ မိမိဇနီးအပါအဝင် မိမိကိုပြစ်မှားသူတွေကို ခွင့်လွှတ်ရမှာဖြစ်တယ်။ ဇနီးကလည်း အဲဒီလိုပဲ လုပ်ရမှာဖြစ်တယ်။ (မဿဲ ၆:၁၂၊ ၁၄၊ ၁၅ ကိုဖတ်ပါ) အောင်မြင်တဲ့အိမ်ထောင်ရေးဆိုတာ လိုလိုလားလားခွင့်လွှတ်တတ်သူနှစ်ဦး ပေါင်းစပ်ထားတာဖြစ်တယ်လို့ လူတချို့ပြောကြတယ်။

၇။ ယေရှု ဘယ်အရာကို ထည့်တွက်စဉ်းစားသလဲ၊ လင်ယောက်ျားတွေအတွက် ဘာပုံသက်သေချမှတ်ခဲ့သလဲ။

^၇ ယေရှုက တပည့်တွေအတွက် အမြဲစဉ်းစားပေးတယ်ဆိုတဲ့အချက်ကိုလည်း လင်ယောက်ျားတွေ သတိပြုသင့်တယ်။ ကိုယ်တော်က တပည့်တွေရဲ့ အကန့်အသတ်ဖြစ်မှု၊ ကာယရေးလိုအပ်မှုတွေကို ထည့်သွင်းစဉ်းစားပေးခဲ့တယ်။ ဥပမာ၊ တပည့်တွေ မောပန်းနေတဲ့အခါ သူတို့ကို ကိုယ်တော်က “လူသူကင်းမဲ့ရာအရပ်သို့ သီးသန့်လာ၍ ခဏနားကြ” ဆိုပြီး ပြောခဲ့တယ်။ (မာကု ၆:၃၀-၃၂) ဇနီးတွေလည်း ထောက်ထားစာနာမှုကို ရထိုက်ပါတယ်။ သမ္မာကျမ်းစာမှာ ဇနီးတွေကို “သာ၍အားနွဲ့သောတန်ဆာ” အဖြစ်ဖော်ပြထားပြီး သူတို့ကို “ဂုဏ်တင်” ဖို့ လင်ယောက်ျားတွေကို မိန့်မှာထားတယ်။ ဘာကြောင့်လဲ။ အကြောင်းကတော့ လင်နဲ့မယားဟာ “မဟာကျေးဇူးတော်ကြောင့် ရရှိမည့်အသက်တာ” ကို အတူတူအမွေခံရမှာ ဖြစ်လို့ပဲ။ (၁ ပေတရု ၃:၇) ဘုရားသခင် တန်ဖိုးထားတာက ယောက်ျားဖြစ်ခြင်း၊ မိန်းမဖြစ်ခြင်းမဟုတ်ဘဲ သစ္စာရှိခြင်းသာဖြစ်ကြောင်း လင်ယောက်ျားတွေ သတိရသင့်တယ်။—ဆာလံ ၁၀၁:၆။

၈။ (က) “မိမိဇနီးကိုချစ်သောသူသည် ကိုယ့်ကိုယ်ကိုယ် ချစ်သောသူဖြစ်၏” ဆိုတာက လင်ယောက်ျားတစ်ဦးအတွက် ဘာအဓိပ္ပာယ်ရှိသလဲ။ (ခ) “တစ်သားတစ်ကိုယ်တည်းဖြစ်” ခြင်းဆိုတာက ဘာကိုဆိုလိုတာလဲ။

^၈ “မိမိဇနီးကိုချစ်သောသူသည် ကိုယ့်ကိုယ်ကိုယ် ချစ်သောသူဖြစ်၏” လို့ ကျမ်းစာမှာ ဖော်ပြထားတယ်။ အကြောင်းကတော့ ယေရှုဖော်ပြခဲ့သလို လင်မယားတွေဟာ  “နှစ်ဦးမဟုတ်တော့ဘဲ တစ်သားတစ်ကိုယ်တည်းဖြစ်” ကြလို့ပဲ။ (မဿဲ ၁၉:၆) ဒါကြောင့် လိင်ဆက်ဆံခြင်းကို သူတို့နှစ်ဦးတည်းအတွက်ပဲ ကန့်သတ်ထားရမယ်။ (သုတ္တံ ၅:၁၅-၂၁; ဟေဗြဲ ၁၃:၄) ကိုယ်ကျိုးမဖက်ဘဲ အချင်းချင်းရဲ့လိုအင်ဆန္ဒတွေကို အလေးထားမယ်ဆိုရင် အဲဒီလိုဖြစ်နိုင်တယ်။ (၁ ကောရိန္သု ၇:၃-၅) ဒီသတိပေးချက်က မှတ်သားစရာဖြစ်တယ်– “မည်သူမျှ မိမိခန္ဓာကိုယ်ကို မုန်းသည်မရှိ။ . . . လူတိုင်း မိမိခန္ဓာကိုယ်ကို ကျွေးမွေး၍ မြတ်နိုးတတ်၏။” လင်ယောက်ျားတွေဟာ မိမိတို့ရဲ့ဦးခေါင်းဖြစ်သူ ယေရှုခရစ်ထံမှာ စာရင်းရှင်းရမယ်ဆိုတာကို သတိရပြီး ကိုယ့်ကိုယ်ကိုယ်ချစ်သလို ဇနီးသည်ကို ချစ်ဖို့လိုတယ်။—ဧဖက် ၅:၂၉; ၁ ကောရိန္သု ၁၁:၃။

၉။ ဖိလိပ္ပိ ၁:၈ မှာ ယေရှုရဲ့ ဘယ်အရည်အသွေးကို ဖော်ပြထားသလဲ၊ လင်ယောက်ျားတွေက မိမိတို့ရဲ့ဇနီးသည်တွေအပေါ် အဲဒီအရည်အသွေးကို ဘာကြောင့် တင်ပြသင့်တာလဲ။

^၉ တမန်တော်ပေါလုက “ခရစ်တော်ယေရှု၏ ချစ်ခင်စုံမက်မှု” အကြောင်း ပြောခဲ့တယ်။ (ဖိလိပ္ပိ ၁:၈) ယေရှုရဲ့ချစ်ခင်စုံမက်မှုက စိတ်လန်းဆန်းစေတဲ့ အရည်အသွေးတစ်ခုဖြစ်တယ်၊ ဒီအရည်အသွေးက ကိုယ်တော့်တပည့်ဖြစ်လာတဲ့ အမျိုးသမီးတွေအတွက် နှစ်သက်စရာပါပဲ။ (ယောဟန် ၂၀:၁၊ ၁၁-၁၃၊ ၁၆) ဒါ့အပြင် ဇနီးသည်တွေက မိမိတို့လင်ယောက်ျားရဲ့ ချစ်ခင်ယုယမှုကို ခံယူချင်ကြတယ်။

၁၀။ ယေရှုက ဇနီးသည်တွေအတွက် ပုံသက်သေ ဘယ်လိုပြသလဲ။

^၁၀ မိသားစုတစ်စု ပျော်ရွှင်သာယာဖို့အတွက် လင်ယောက်ျားက ဦးစီးရမှာဖြစ်တယ်။ ယေရှုမှာတောင် ဦးဆောင်သူ ဦးခေါင်းရှိတယ်။ “မိန်းမ၏ဦးခေါင်းကား ယောက်ျားဖြစ်” သလိုပဲ “ခရစ်တော်၏ဦးခေါင်းကား ဘုရားသခင်ဖြစ်” တယ်။ (၁ ကောရိန္သု ၁၁:၃) ကျွန်ုပ်တို့အားလုံးမှာ လက်အောက်ခံရမယ့် ဦးဆောင်သူရှိတဲ့အတွက် ဘုရားသခင့်ဦးဆောင်မှုကို ယေရှုလက်အောက်ခံခြင်းက ကျွန်ုပ်တို့အတွက် ပုံသက်သေကောင်းဖြစ်တယ်။

၁၁။ ဇနီးဖြစ်သူက လင်ယောက်ျားအပေါ် ဘယ်သဘောထားရှိသင့်သလဲ၊ ဇနီးရဲ့အမူအကျင့်က ဘယ်လိုအကျိုးသက်ရောက်မှု ရှိနိုင်သလဲ။

^၁၁ အပြစ်ရှိတဲ့ မစုံလင်သူလူသားတွေဖြစ်တဲ့ အမျိုးသားတွေဟာ အမှားတွေပြုလုပ်တတ်တာကြောင့် တစ်ခါတစ်ရံမှာတော့ အိမ်ထောင်ဦးစီးကောင်းတွေ မဖြစ်ကြဘူး။ အဲဒီလိုဆိုရင် ဇနီးသည်တစ်ဦး ဘာလုပ်သင့်သလဲ။ လင်ယောက်ျားလုပ်ဆောင်တဲ့အရာကို အထင်မသေးသင့်သလို လင်ယောက်ျားရဲ့ ဦးစီးမှုနေရာကိုယူဖို့လည်း မကြိုးစားသင့်ဘူး။ နူးညံ့ငြိမ်သက်ခြင်းသဘောကို ဘုရားသခင် အလွန်တန်ဖိုးထားတယ်ဆိုတာ ဇနီးဖြစ်သူ သတိရသင့်တယ်။ (၁ ပေတရု ၃:၄) အဲဒီစိတ်သဘောထား ရှိတယ်ဆိုရင် အခက်အခဲကြုံရတဲ့ အခြေအနေတွေမှာတောင် ဘုရားသခင်နှစ်သက်တဲ့ လက်အောက်ခံမှုကို တင်ပြဖို့ ပိုလွယ်ကူတယ်ဆိုတာ တွေ့ရမှာဖြစ်တယ်။ ဒါ့အပြင် ကျမ်းစာမှာ “ဇနီးသည်လည်း မိမိ၏ခင်ပွန်းကို အလွန်ရိုသေသင့်” တယ်လို့ပြောထားတယ်။ (ဧဖက် ၅:၃၃) ဒါပေမဲ့ လင်ယောက်ျားဖြစ်သူက ခရစ်တော်ကို မိမိရဲ့ဦးခေါင်းအဖြစ် လက်မခံဘူးဆိုရင်ကော။ ကျမ်းစာမှာ ဇနီးသည်တွေကို ဒီလိုတိုက်တွန်းထားတယ်– “ကိုယ့်ခင်ပွန်းကို လက်အောက်ခံကြလော့။ သို့ပြုခြင်းဖြင့် တရားစကားတော်ကို မနာခံသူအချို့ရှိလျှင်ပင် တစ်ခွန်းမျှပြောရန်မလိုဘဲ သင်တို့၏အမူအကျင့်အားဖြင့် သူတို့ကိုရလိမ့်မည်။ အကြောင်းမူကား သင်တို့၏စင်ကြယ်သော အမူအကျင့်နှင့် အလွန်ရိုသေလေးစားမှုကို သူတို့မြင်သောကြောင့်ဖြစ်၏။”—၁ ပေတရု ၃:၁၊ ၂။

၁၂။ ဇနီးတစ်ဦးက မိမိရဲ့အယူအဆကို တလေးတစားပြောပြတာ ဘာကြောင့်မမှားသလဲ။

^၁၂ လင်ယောက်ျားဖြစ်သူက ယုံကြည်သူဖြစ်စေ၊ မယုံကြည်သူဖြစ်စေ ဇနီးက လင်ယောက်ျားရဲ့အယူအဆနဲ့ မတူတဲ့ တခြားအယူအဆကို လိမ္မာပါးနပ်စွာ ပြောပြတာက မရိုမသေပြုရာ မရောက်ဘူး။ ဇနီးရဲ့ရှုမြင်ချက်က မှန်ကောင်းမှန်နိုင်တဲ့အတွက် ဇနီးရဲ့စကားကို လင်ယောက်ျားဖြစ်သူ နားထောင်ပေးမယ်ဆိုရင် တစ်မိသားစုလုံး အကျိုးရှိနိုင်တယ်။ ဇနီးဖြစ်သူစာရာက အိမ်တွင်းရေးပြဿနာတစ်ခုနဲ့ပတ်သက်ပြီး လက်တွေ့ကျတဲ့ ဖြေရှင်းနည်းတစ်ခုကို ပြောပြတဲ့အခါ အာဗြဟံသဘောမတူပေမဲ့ ဘုရားသခင်က “သူ၏စကားကိုနားထောင်လော့” ဆိုပြီး ပြောခဲ့တယ်။ (ကမ္ဘာဦး ၂၁:၉-၁၂ ကိုဖတ်ပါ) ခင်ပွန်းဖြစ်သူက ဘုရားသခင့်ပညတ်နဲ့ မဆန့်ကျင်တဲ့ အပြီးသတ်ဆုံးဖြတ်ချက်ကို ချတဲ့အခါ ဇနီးဖြစ်သူက အဲဒီဆုံးဖြတ်ချက်ကို ထောက်ခံခြင်းအားဖြင့် လက်အောက်ခံမှုကို တင်ပြနိုင်တယ်။—တမန်တော် ၅:၂၉; ဧဖက် ၅:၂၄။

၁၃။ (က) တိတု ၂:၄၊ ၅ မှာ အိမ်ထောင်သည်အမျိုးသမီးတွေကို ဘယ်အရာပြုလုပ်ဖို့ တိုက်တွန်းထားသလဲ။ (ခ) ခွဲနေတာ၊ ကွာရှင်းတာနဲ့ပတ်သက်ပြီး ကျမ်းစာမှာဘာပြောထားသလဲ။

^၁၃ ဇနီးအနေနဲ့ မိသားစုမှာ မိမိရဲ့တာဝန်ကိုကျေပွန်စေဖို့ နည်းလမ်းမျိုးစုံနဲ့ လုပ်ဆောင်နိုင်ပါတယ်။ ဥပမာ၊ ကျမ်းစာမှာ အိမ်ထောင်သည်အမျိုးသမီးတွေဟာ ‘ကိုယ့်ခင်ပွန်းကိုချစ်သောသူ၊ မိမိ၏သားသမီးတို့ကို ချစ်မြတ်နိုးသူ၊ သမာသတိရှိသူ၊ စင်ကြယ်သူ၊ အိမ်မှုကိစ္စ ကြိုးစားလုပ်ဆောင်သူ၊ ကောင်းမွန်သူ၊ ခင်ပွန်းကိုလက်အောက်ခံသူများဖြစ်’ ကြရမယ်လို့ ဖော်ပြထားတယ်။ (တိတု ၂:၄၊ ၅) အဲဒီလိုလုပ်ဆောင်တဲ့ ဇနီး၊ မိခင်တစ်ဦးဟာ မိသားစုရဲ့ချစ်မြတ်နိုးမှုနဲ့ ရိုသေလေးစားမှုကို ခံရပါလိမ့်မယ်။ (သုတ္တံ ၃၁:၁၀၊ ၂၈၊ ၂၉ ကိုဖတ်ပါ) ဒါပေမဲ့ အိမ်ထောင်ဆိုတာ မစုံလင်တဲ့အပြစ်သားနှစ်ဦး ပေါင်းဖက်ထားတာဖြစ်တဲ့အတွက် အလွန်ဆိုးရွားတဲ့ အခြေအနေတချို့ကြောင့် ခွဲနေတာ၊ ဒါမှမဟုတ် ကွာရှင်းတာ ဖြစ်နိုင်တယ်။ တချို့သောအခြေအနေတွေမှာ ခွဲနေတာကို ကျမ်းစာကခွင့်ပြုတယ်။ ဒါပေမဲ့ ခွဲနေတာကို ပေါ့ပေါ့တန်တန် သဘော ထားလို့မရဘူး၊ “ဇနီးသည် ခင်ပွန်းနှင့် မခွဲခွာသင့်။ . . . ခင်ပွန်းသည်လည်း ဇနီးကိုပစ်မထားသင့်” လို့ ကျမ်းစာမှာဆုံးမထားတယ်။ (၁ ကောရိန္သု ၇:၁၀၊ ၁၁) ကျမ်းစာမှာပါတဲ့မူအရဆိုရင် အိမ်ထောင်ဖက်တစ်ဦး ဖောက်ပြန်မှသာ ကွာရှင်းလို့ရတယ်။—မဿဲ ၁၉:၉။

၁၄။ ကလေးတွေကို ယေရှု ဘယ်လိုဆက်ဆံခဲ့သလဲ၊ ကလေးတွေဟာ မိဘတွေထံက ဘယ်အရာလိုအပ်သလဲ။

^၁၄ ကလေးတွေနဲ့ ယေရှုဆက်ဆံပုံက မိဘတွေအတွက် အကောင်းဆုံးပုံသက်သေဖြစ်တယ်။ တခြားသူတွေက ကလေးငယ်တွေကို ယေရှုအနားမကပ်ဖို့ တားဆီးတဲ့အခါ ယေရှုက “ငါ့ထံသို့ ကလေးငယ်များ လာပါလေစေ။ မတားဆီးကြနှင့်” လို့ပြောခဲ့တယ်။ အဲဒီနောက် ယေရှုက သူတို့ကို “ချီပိုက်လျက် သူတို့အပေါ်မှာ လက်တော်ကိုတင်လျက် ကောင်းချီးပေးတော်မူ၏” လို့ ကျမ်းစာမှာ ဖော်ပြတယ်။ (မာကု ၁၀:၁၃-၁၆) ယေရှုက ကလေးငယ်တွေကို အချိန်ပေးခဲ့တဲ့အတွက် သင့်သားသမီးတွေကိုလည်း အဲဒီလိုပဲ အချိန်ပေးသင့်တယ်မဟုတ်လား။ ကလေးတွေကို အချိန်အနည်းငယ်လောက်သာမဟုတ်ဘဲ အချိန်အများကြီး ပေးဖို့လိုတယ်။ ကလေးတွေကို သွန်သင်ဆုံးမရမယ်လို့ မိဘတွေကို ယေဟောဝါ ညွှန်ကြားထားတဲ့အတွက် အချိန်ပေးပြီး သွန်သင်ဆုံးမဖို့လိုတယ်။—တရားဟောရာ ၆:၄-၉ ကိုဖတ်ပါ။

၁၅။ မိဘတွေက မိမိတို့ရဲ့ကလေးတွေကို ကာကွယ်ဖို့ ဘယ်အရာ ပြုလုပ်နိုင်သလဲ။

^၁၅ ဒီလောက,က ဆိုးသည်ထက်ဆိုးလာတဲ့အတွက် မိဘတွေဟာ သားသမီးတွေ ကို လိင်ဆိုင်ရာအမြတ်ထုတ်ချင်သူတွေရဲ့ အန္တရာယ်ကနေ ကာကွယ်ပေးဖို့လိုတယ်။ “ချစ်သားတို့” ဆိုပြီး ယေရှု ချစ်ခင်ကြင်နာစွာခေါ်ဆိုခဲ့တဲ့ တပည့်တွေကို ကိုယ်တော် ဘယ်လိုကာကွယ်ပေးခဲ့တယ်ဆိုတာ သုံးသပ်ကြည့်ပါ။ ယေရှုဟာ မိမိအဖမ်းခံရပြီး အသတ်ခံရတော့မယ့်အချိန်မှာ တပည့်တွေလွတ်မြောက်ဖို့ နည်းလမ်းရှာကြံပေးခဲ့တယ်။ (ယောဟန် ၁၃:၃၃; ၁၈:၇-၉) မိဘတစ်ဦးအနေနဲ့ သင့်ကလေးငယ်တွေကို အန္တရာယ်ပြုဖို့ စာတန်ရဲ့ကြိုးပမ်းမှုတွေကို သတိထားဖို့လိုတယ်။ ကလေးတွေကို ကြိုတင်သတိပေးထားဖို့ လိုတယ်။ * (၁ ပေတရု ၅:၈) သူတို့ရဲ့ ကိုယ်ခန္ဓာ၊ ဘုရားသခင်နဲ့ သူတို့ရဲ့ဆက်ဆံရေး၊ စာရိတ္တရေးတွေက တစ်ခါနဲ့မှမတူအောင် အန္တရာယ်တွေ့နိုင်တဲ့ အခြေအနေမှာရှိနေတယ်။

၁၆။ တပည့်တွေကို ယေရှု သွန်သင်ဆုံးမပုံကနေ မိဘတွေ ဘယ်အရာသင်ယူနိုင်သလဲ။

 ^၁၆ ယေရှုမသေဆုံးခင်ညမှာ တပည့်တွေက ဘယ်သူပိုကြီးမြတ်သလဲဆိုတာ ငြင်းခုံခဲ့ကြတယ်။ ယေရှုက သူတို့ကိုစိတ်ဆိုးမယ့်အစား အပြောအဆိုနဲ့ ပုံသက်သေအားဖြင့် မေတ္တာပါစွာ ဆက်သွန်သင်ဆုံးမခဲ့တယ်။ (လုကာ ၂၂:၂၄-၂၇; ယောဟန် ၁၃:၃-၈) သင်က မိဘတစ်ဦးဖြစ်မယ်ဆိုရင် သင့်ကလေးတွေကို အမှားပြင်ပေးရာမှာ ယေရှုရဲ့ပုံသက်သေကို ဘယ်လိုတုပနိုင်တယ်ဆိုတာ သိပါသလား။ ကလေးတွေကို ဆုံးမပဲ့ပြင်ပေးဖို့ လိုအပ်တာ မှန်ပါတယ်၊ ဒါပေမဲ့ စိတ်လိုက်မာန်ပါမဟုတ်ဘဲ ‘တော်ရုံသင့်ရုံ’ ဆုံးမတာဖြစ်သင့်တယ်။ “သန်လျက်နှင့်ထိုးသကဲ့သို့” မဆင်မခြင် ပြောဆိုဆုံးမတာမျိုး မလုပ်သင့်ဘူး။ (ယေရမိ ၃၀:၁၁; သုတ္တံ ၁၂:၁၈) သူတို့ တကယ် အကျိုးခံစားရတဲ့နည်းနဲ့ ဆုံးမသွန်သင်သင့်တယ်။—ဧဖက် ၆:၄; ဟေဗြဲ ၁၂:၉-၁၁။

၁၇။ ယေရှုဟာ ဘယ်နည်းတွေနဲ့ ကလေးတွေအတွက် အကောင်းဆုံးပုံသက်သေ ပြခဲ့သလဲ။

^၁၇ ကလေးတွေကော ယေရှုထံကနေ သင်ယူနိုင်ပါသလား။ သင်ယူနိုင်ပါတယ်။ ကလေးတွေ မိဘစကားနားထောင်ရမယ်ဆိုတာကို ယေရှုကိုယ်တိုင် ပုံသက်သေပြခဲ့တယ်။ ‘ငါ့ခမည်းတော် ငါ့အားသွန်သင်တော်မူသည့်အတိုင်း ဟောပြောသည်’ ဆိုပြီး ယေရှုပြောခဲ့တယ်။ ဒါ့အပြင် “ထိုအရှင်နှစ်သက်တော်မူရာများကို အစဉ်မပြတ် ငါပြု၏” လို့ဆက်ပြောခဲ့တယ်။ (ယောဟန် ၈:၂၈၊ ၂၉) ယေရှုက ကောင်းကင်ခမည်းတော်ပြောတာကို နာခံခဲ့တယ်၊ ကျမ်းစာမှာလည်း သားသမီးတွေက မိဘစကားနားထောင်ရမယ်လို့ ပြောတယ်။ (ဧဖက် ၆:၁-၃ ကိုဖတ်ပါ။) ယေရှုဟာ ဘုရားသခင့်သားတော်ဖြစ်ပေမဲ့ အပြစ်ရှိတဲ့လူသားမိဘတွေဖြစ်တဲ့ ယောသပ်နဲ့ မာရိရဲ့စကားကို နားထောင်ခဲ့တယ်။ ဒါကြောင့် ယေရှုရဲ့မိသားစုဝင်အားလုံး ပျော်ရွှင်ခဲ့ကြမှာ သေချာတယ်။—လုကာ ၂:၄၊ ၅၊ ၅၁၊ ၅၂။

၁၈။ ယေရှုက ကောင်းကင်ခမည်းတော်ရဲ့စကားကို ဘာကြောင့် အမြဲနားထောင်ခဲ့တာလဲ၊ ယနေ့ ကလေးတွေ မိဘစကားနားထောင်တဲ့အခါ ဘယ်သူပျော်သလဲ။

^၁၈ သားသမီးတွေအနေနဲ့ ယေရှုနဲ့ပိုတူနိုင်တဲ့နည်းလမ်းတွေ၊ မိဘတွေကို ပျော်ရွှင်စေနိုင်တဲ့နည်းလမ်းတွေကို သိရှိနိုင်ပါသလား။ လူငယ်တွေအနေနဲ့ တစ်ခါတစ်ရံမှာ မိဘစကားနားထောင်ဖို့ အခက်တွေ့နိုင်ပါတယ်၊ ဒါပေမဲ့ ဘုရားသခင်က သားသမီးတွေကို မိဘစကားနားထောင်စေချင်တယ်။ (သုတ္တံ ၁:၈; ၆:၂၀) ယေရှုက ခက်ခဲတဲ့အခြေအနေမှာတောင် ကောင်းကင်ခမည်းတော်ပြောတာကို အမြဲနာခံခဲ့တယ်။ တစ်ကြိမ်မှာတော့ ယေရှုဟာ ဘုရားသခင့်အလိုတော်ကို လုပ်ဆောင်ဖို့ အရမ်းခက်ခဲနေချိန်မှာ “အဖ၊ အလိုတော်ရှိလျှင် ဤခွက် [တောင်းဆိုချက်] ကို ကျွန်ုပ်ထံမှ ဖယ်ရှား တော်မူပါ” လို့ တောင်းလျှောက်ခဲ့တယ်။ ဒါပေမဲ့ သူ့အတွက် အကောင်းဆုံးအရာကို ခမည်းတော်သိတယ်ဆိုတာ ယေရှု သဘောပေါက်တဲ့အတွက် ဘုရားသခင်ခိုင်းတဲ့အတိုင်း လုပ်ဆောင်ခဲ့တယ်။ (လုကာ ၂၂:၄၂) သားသမီးတွေဟာ နာခံတတ်ဖို့သင်ယူခြင်းအားဖြင့် မိဘတွေနဲ့ ကောင်းကင်ခမည်းတော်ကို ပျော်ရွှင်စေကြမှာဖြစ်တယ်။ *—သုတ္တံ ၂၃:၂၂-၂၅။

၁၉။ (က) စာတန်က ကလေးတွေကို ဘယ်လိုသွေးဆောင်သလဲ။ (ခ) ကိုယ်ကျင့်တရားမကောင်းတဲ့ ကလေးတွေကြောင့် မိဘတွေကို ဘယ်လိုထိခိုက်နိုင်သလဲ။

^၁၉ စာတန်က ယေရှုကိုသွေးဆောင်ခဲ့တဲ့အတွက် လူငယ်တွေကိုလည်း အမှားလုပ်ဖို့ သွေးဆောင်မယ်ဆိုတာ သေချာတယ်။ (မဿဲ ၄:၁-၁၀) စာတန်က တွန်းလှန်ဖို့ခက်တဲ့ ရွယ်တူခြင်းဖိအားကို အသုံးပြုတယ်။ ဒါကြောင့် သားသမီးတွေက အမှားလုပ်တဲ့သူတွေနဲ့ မပေါင်းသင်းဖို့ အရမ်းအရေးကြီးတယ်။ (၁ ကောရိန္သု ၁၅:၃၃) ယာကုပ်ရဲ့သမီး ဒိနက ယေဟောဝါကို ဝတ်မပြုသူတွေနဲ့ ပေါင်းသင်းခဲ့လို့ ပြဿနာတွေအများကြီး ဖြစ်ခဲ့တယ်။ (ကမ္ဘာဦး ၃၄:၁၊ ၂) မိသားစုဝင်တစ်ဦး လိင်အကျင့်ယိုယွင်းမှုမှာ ပါဝင်ပတ်သက်တဲ့အခါ မိသားစုကို ဘယ်လိုထိခိုက်နိုင်တယ်ဆိုတာ စဉ်းစားကြည့်ပါ!—သုတ္တံ ၁၇:၂၁၊ ၂၅။

၂၀။ ပျော်ရွှင်တဲ့မိသားစုဘဝဖြစ်ဖို့ မိသားစုဝင်တစ်ဦးချင်းစီက ဘာလုပ်ရမလဲ။

^၂၀ ကျမ်းစာပါ ဆုံးမစကားတွေကို လက်တွေ့ကျင့်သုံးတဲ့အခါ မိသားစုပြဿနာ တွေကို ကိုင်တွယ်ဖြေရှင်းဖို့ ပိုလွယ်ကူသွားတယ်။ တကယ်တော့ အဲဒီဆုံးမစကားတွေကို လက်တွေ့ကျင့်သုံးခြင်းက မိသားစုပျော်ရွှင်မှုအတွက် အရေးကြီးဆုံးအချက်ပဲ။ ဒါကြောင့် လင်ယောက်ျားတို့၊ သင်တို့ရဲ့ဇနီးကိုချစ်ပါ၊ အသင်းတော်ကို ယေရှုဆက်ဆံတဲ့နည်းအတိုင်း ဇနီးကိုပြုမူဆက်ဆံပါ။ ဇနီးတို့၊ သင့်ခင်ပွန်းရဲ့ဦးစီးမှုကို လက်အောက်ခံပါ၊ သုတ္တံ ၃၁:၁၀-၃၁ မှာဖော်ပြထားတဲ့ အရည်အချင်းရှိတဲ့ဇနီးရဲ့ ပုံနမူနာကို လိုက်လျှောက်ပါ။ မိဘတို့၊ သားသမီးတွေကို လေ့ကျင့်သွန်သင်ပေးပါ။ (သုတ္တံ ၂၂:၆) ဖခင်တို့၊ “မိမိအိမ်ထောင်စုကို ကောင်းစွာဦးစီး” ပါ။ (၁ တိမောသေ ၃:၄၊ ၅; ၅:၈) သားသမီးတို့၊ မိဘစကားကို နားထောင်ပါ။ (ကောလောသဲ ၃:၂၀) မိသားစုဝင်အားလုံးက မစုံလင်တဲ့ အပြစ်သားတွေဖြစ်တယ်၊ အားလုံးက မှားတတ်ကြတယ်။ ဒါကြောင့် နှိမ့်ချမှုပြပြီး အချင်းချင်းခွင့်လွှတ်ဖို့ တောင်းဆိုကြပါ။

၂၁။ ရှေ့မှာ ဘယ်လိုကောင်းတဲ့ အနာဂတ်စောင့်ကြိုနေသလဲ၊ အခုအချိန်မှာတောင် ပျော်ရွှင်တဲ့မိသားစုဘဝကို ဘယ်လိုပိုင်ဆိုင်နိုင်သလဲ။

^၂၁ မှန်ပါတယ်၊ ကျမ်းစာမှာ မိသားစုဘဝနဲ့ပတ်သက်တဲ့ အဖိုးတန်ဆုံးမစကားတွေ၊ ညွှန်ကြားချက်တွေ များစွာပါရှိတယ်။ ဒါ့အပြင် ကျမ်းစာက ယေဟောဝါကိုဝတ်ပြုကိုးကွယ်ကြတဲ့ ပျော်ရွှင်တဲ့လူသားတွေ နေထိုင်မယ့် သာယာလှပတဲ့မြေကြီးပရဒိသု အကြောင်းလည်း သင်ပေးတယ်။ (ဗျာဒိတ် ၂၁:၃၊ ၄) ရှေ့မှာ တကယ်ကောင်းတဲ့အနာဂတ် စောင့်ကြိုနေတယ်။ ဘုရားသခင့်စကားတော်၊ သမ္မာကျမ်းစာပါ သွန်သင်ချက်တွေကို လက်တွေ့ကျင့်သုံးမယ်ဆိုရင် အခုအချိန်မှာတောင် ပျော်ရွှင်တဲ့မိသားစုဘဝကို ပိုင်ဆိုင်နိုင်ပါတယ်။