သင် သိပါသလား
ရှေးခေတ် အစ္စရေးလူမျိုးတွေ ဘာကြောင့် ကွမ်းဖိုး ပေးကြသလဲ
ကျမ်းစာခေတ်တုန်းက မင်္ဂလာဆောင်ဖို့ စီစဉ်တဲ့အချိန်မှာ သတို့သမီးရဲ့ မိသားစုကို ကွမ်းဖိုး (သတို့သမီး တင်တောင်းကြေး) ပေးလေ့ရှိတယ်။ ကွမ်းဖိုးအဖြစ် အဖိုးတန်ပစ္စည်း၊ တိရစ္ဆာန်၊ ငွေကြေးတွေ ပေးနိုင်တယ်။ တစ်ခါတလေ အလုပ်လုပ်ပေးရတာလည်း ဖြစ်နိုင်တယ်။ ယာကုပ်ဟာ ရာခေလကို ရဖို့ ခုနစ်နှစ် အလုပ်လုပ်ပေးခဲ့တယ်။ (က. ၂၉:၁၇၊ ၁၈၊ ၂၀) ဘာအတွက် ကွမ်းဖိုး ပေးတာလဲ။
ကျမ်းပညာရှင် ကာရိုလ် မေယာက “ကွမ်းဖိုးဆိုတာ မိသားစုအတွက် အရေးပါတဲ့ သမီးရဲ့ လုပ်အား ဆုံးရှုံးသွားတာ ဖြစ်လို့ လျော်ကြေး ပေးတဲ့ သဘော ဖြစ်နိုင်တယ်” လို့ ပြောတယ်။ ဆွေမျိုးတော်စပ်လာတဲ့ မိသားစု နှစ်စုဟာ ကွမ်းဖိုး ပေးတဲ့အတွက် ပိုရင်းနှီးလာတယ်။ ဒီမိသားစုတွေဟာ ဒုက္ခရောက်ချိန်မှာ အပြန်အလှန် ကူညီပေးကြတယ်။ ဒါ့အပြင် ကွမ်းဖိုး ပေးလိုက်တဲ့အတွက် အမျိုးသမီးဟာ စေ့စပ်ပြီးပြီ၊ ဖခင် ဖြစ်သူရဲ့ ကာကွယ်စောင့်ရှောက်မှုအောက်ကနေ ခင်ပွန်းရဲ့ ကာကွယ်စောင့်ရှောက်မှုအောက် ရောက်တော့မယ်ဆိုတာကို ပြတယ်။
ကွမ်းဖိုး ပေးလိုက်လို့ ဇနီးဖြစ်သူကို ကုန်ပစ္စည်းလို အရောင်းအဝယ် လုပ်တဲ့ သဘော မဟုတ်ဘူး။ “ငွေကြေး ဒါမှမဟုတ် အဖိုးတန်အရာတွေ ပေးလိုက်ရလို့ မင်္ဂလာဆောင်တာကို ပစ္စည်းဝယ်သလို မြင်မိနိုင်တယ်။ ဒါပေမဲ့ ကွမ်းဖိုး ပေးတာဟာ သတို့သမီးရဲ့ မိသားစုကို နစ်နာကြေး ပေးတဲ့ သဘော ဖြစ်ပြီး အမျိုးသမီးတစ်ယောက်ရဲ့ အဖိုးအခကို ပေးတဲ့ သဘော မဟုတ်ဘူး” လို့ စာအုပ်တစ်အုပ် (Ancient Israel—Its Life and Institutions) က ဆိုတယ်။
အခုခေတ် နိုင်ငံတချို့မှာ ကွမ်းဖိုး ပေးတဲ့ ထုံးစံ ရှိနေတုန်းပဲ။ ခရစ်ယာန် မိဘတွေအနေနဲ့ ကွမ်းဖိုး တောင်းတဲ့အခါ သင့်တင့်တဲ့ ပမာဏကိုသာ တောင်းဆိုခြင်းအားဖြင့် သူတို့ရဲ့ ‘အကျိုးသင့်အကြောင်းသင့်သဘောကို လူတိုင်း သိမြင်စေ’ သင့်တယ်။ (ဖိ. ၄:၅။ ၁ ကော. ၁၀:၃၂၊ ၃၃) ဒီနည်းနဲ့ သူတို့ဟာ “ငွေကို တပ်မက်သူ၊” လောဘကြီးသူ မဟုတ်ကြောင်း ပြရာရောက်တယ်။ (၂ တိ. ၃:၂) ဒါ့အပြင် ခရစ်ယာန် မိဘတွေ ကွမ်းဖိုး မတန်တဆ မတောင်းဘူးဆိုရင် သတို့သားလောင်းအနေနဲ့ ကွမ်းဖိုး ပေးနိုင်တဲ့ အချိန်အထိ မင်္ဂလာပွဲ ရွှေ့ဆိုင်းရတာမျိုး မဖြစ်တော့ဘူး။ ကွမ်းဖိုး ပေးနိုင်အောင် အချိန်ပြည့် အလုပ်လုပ်ဖို့ ရှေ့ဆောင်လုပ်ငန်းကနေ နားလိုက်ရတာမျိုး မဖြစ်တော့ဘူး။
ကမ္ဘာ့ဒေသတချို့မှာ ကွမ်းဖိုးကို ဥပဒေ ပြဋ္ဌာန်းထားတာ ရှိတယ်။ အဲဒီလို ရှိတယ်ဆိုရင် ခရစ်ယာန် မိဘတွေအနေနဲ့ ဥပဒေကို လိုက်နာရမှာ ဖြစ်တယ်။ ဘာကြောင့်လဲ။ ကျမ်းစာမှာ ခရစ်ယာန်တွေဟာ ဘုရားပညတ်နဲ့ မဆန့်ကျင်တဲ့ ‘အထက်အာဏာပိုင်တွေရဲ့ ဥပဒေကို လက်အောက်ခံရမယ်’ လို့ ပြောထားလို့ပဲ။—ရော. ၁၃:၁။ တ. ၅:၂၉။
