ဘာသာတရား အမျိုးမျိုးကွဲပြားသော လောကတွင် ကျွန်ုပ်တို့ အသက်ရှင်နေရသည်။ မကြာသေးမီက ပြုလုပ်သော လေ့လာဆန်းစစ်မှုတစ်ခုအရ ကမ္ဘာတစ်ဝန်းတွင် အဓိကဘာသာကြီး ၁၉ ဘာသာနှင့် အခြားဘာသာများ ၁၀,၀၀၀ ခန့်ရှိကြောင်း သိရသည်။ ထိုသို့ဘာသာတရား အမျိုးမျိုး ကွဲပြားနေခြင်းကြောင့် လူတို့သည် တစ်ခါနှင့်မျှမတူအောင် ရွေးချယ်စရာ များလာသည်။ ထို့ကြောင့် မည်သည့်ဘာသာကိုပင် သင်ရွေးချယ်ပါစေ အရေးကြီးပါသလော။

ဘာသာတရား အမျိုးမျိုးသည် တောင်တစ်တောင်သို့တက်သော လမ်းအသွယ်သွယ်နှင့် တူသည်ဟု လူအချို့ ဆိုကြသည်။ မည်သည့်လမ်းကိုပင် ရွေးချယ်ပါစေ သူတို့အတွက် အရေးမကြီးပေ။ အကြောင်းမှာ လမ်းအားလုံးသည် တစ်နေရာတည်းသို့သာ ပို့ဆောင်ပေးသောကြောင့် ဖြစ်၏။ အတိုင်းအဆမဲ့တန်ခိုးရှင် ဘုရားသခင် တစ်ပါးတည်းသာ ရှိသောကြောင့် ဘာသာတရားအားလုံးသည် ကိုယ်တော်ထံသို့ ပို့ဆောင်ရမည်ဟု သူတို့ ဆင်ခြင်ကြသည်။

သမိုင်းတွင် အလေးစားခံရဆုံး ဘာသာရေးဆရာတစ်ဦးဖြစ်သော ယေရှုခရစ်သည် ယင်းကိစ္စနှင့်ပတ်သက်၍ အဘယ်အရာ ပြောဆိုခဲ့သနည်း။ “ကျဉ်းသောတံခါးကို ဝင်ကြလော့” ဟူ၍ တပည့်များကို ကိုယ်တော် ပြောဆိုသည်။ အဘယ်ကြောင့်နည်း။ “ပျက်စီးခြင်းသို့ရောက်သော လမ်းနှင့် တံခါးသည် ကျယ်ဝန်းသည်ဖြစ်၍ ဝင်သောသူတို့သည် များကြ၏။ အသက်ရှင်ခြင်းသို့ ရောက်သော လမ်းနှင့် တံခါးသည် အလွန်ကျဉ်းမြောင်းသည်ဖြစ်၍ တွေ့ဝင်သောသူတို့သည် နည်းကြ၏။”—မဿဲ ၇:၁၃၊ ၁၄၊ သမ္မာကျမ်း။

ဘာသာတရား အချို့သည် “ပျက်စီးခြင်းသို့” ပို့ဆောင်သည်ဟု ယေရှု အမှန်တကယ် ပြောဆိုနေခြင်းလော။ သို့မဟုတ် ဘုရားသခင်ကို မယုံကြည်သူများသာ လမ်းကျယ်တွင်ရှိနေပြီး ဘုရားသခင်ကို ယုံကြည်သူများမူ မည်သည့်ဘာသာကိုပင် ကိုးကွယ်ပါစေ အသက်ရှင်ခြင်းသို့ ပို့ဆောင်သော လမ်းကျဉ်းတွင် ရှိနေသည်ဟု ကိုယ်တော် သွန်သင်နေခြင်းလော။

လမ်းနှစ်သွယ်သာရှိကြောင်း ပြောဆိုပြီးသည့်နောက် ယေရှု ဤသို့ဆက်ဆို၏– “အယောင်ဆောင် ပရောဖက်များကို သတိပြုကြလော့။ သူတို့သည် အတွင်း၌ လုယက်စားသောက်တတ်သော ဝံပုလွေများ ဖြစ်ကြလျက် သိုးရေကို လွှမ်းခြုံကာ သင်တို့ထံသို့ လာကြ၏။” (မဿဲ ၇:၁၅၊ ကက်သလစ်ကျမ်းစာတော်မြတ်) နောက်ပိုင်း၊ ကိုယ်တော် ဤသို့မိန့်ဆို၏– “ငါ့ကို ‘သခင်၊ သခင်’ ဟုခေါ်သောသူတိုင်း ကောင်းကင်နိုင်ငံတော်သို့ ဝင်ရလိမ့်မည် မဟုတ်။ ကောင်းကင်ဘုံ၌ရှိတော်မူသော ငါ့ခမည်းတော်၏ အလိုတော်ကို ဆောင်ရွက်သောသူ သာလျှင် ဝင်ရလိမ့်မည်။” (မဿဲ ၇:၂၁၊ ကက်သလစ်ကျမ်းစာတော်မြတ်) တစ်စုံတစ်ဦးသည် ပရောဖက်ဟု အခေါ်ခံရလျှင်ဖြစ်စေ၊ ယေရှုကို မိမိ၏ “သခင်” ဟု ခေါ်ဆိုလျှင်ဖြစ်စေ ထိုသူကို ဘုရားသခင်အား မယုံကြည်သူအဖြစ် မဟုတ်ဘဲ ဘာသာတရား ကိုင်းရှိုင်းသူအဖြစ် လူတို့ သတ်မှတ်ခြင်းမှာ ကျိုးကြောင်းဆီလျော်ပါသည်။ သို့သော် ထိုကျမ်းချက်အရ ရှင်းနေသည်မှာ ဘာသာအားလုံး ကောင်းသည်၊ ဘာသာရေးဆရာအားလုံးကို ယုံကြည်စိတ်ချသင့်သည်ဟု သတ်မှတ်၍ မရကြောင်း ယေရှု သတိပေးနေခြင်း ဖြစ်၏။

ဘာသာအားလုံး၊ တစ်နည်းအားဖြင့် လမ်းအားလုံးသည် ဘုရားသခင်ထံ ပို့ဆောင်ပေးသည် မဟုတ်သောကြောင့် ထောင်နှင့်ချီသော လမ်းများအနက် အသက်ရှင်ခြင်းသို့ ပို့ဆောင်သော လမ်းကျဉ်းကို သင် မည်သို့ ရှာတွေ့နိုင်သနည်း။ ဤဥပမာကို သုံးသပ်ကြည့်ပါ– သင်သည် မြို့ကြီးတစ်မြို့တွင် လမ်းပျောက်နေသည်ဟု မြင်ယောင်ကြည့်ပါ။ အကူအညီတောင်းရန် သင်ဆုံးဖြတ်လိုက်သည်။ လူတစ်ဦးက အရှေ့အရပ်သို့သွားရန် သင့်ကို တိတိကျကျ လမ်းညွှန်လိုက်၏။ နောက်တစ်ဦးကမူ အနောက်အရပ်သို့သွားရန် တိုက်တွန်းသည်။ သို့သော် နောက်တစ်ဦးက အမှန်ကန်ဆုံးဟု သင်ယူဆသောအရပ်သို့ သွားရန် အကြံပြုသည်။ နောက်ဆုံးတွင် လူတစ်ဦးသည် စိတ်ချအားထားရသော လမ်းညွှန်မြေပုံကို ထုတ်၍ လမ်းမှန်ကို ပြညွှန်ပေးသည်။ ထို့နောက် လမ်းခရီးတစ်လျှောက် သင်အသုံးပြုနိုင်ရန် ထိုမြေပုံကို သင့်လက်ထဲ ထည့်ပေးသည်။ သင်သည် လိုရာခရီးသို့ ရောက်ရှိမည်ကို ပို၍ယုံကြည်စိတ်ချလာသည် မဟုတ်လော။

အလားတူ၊ စစ်မှန်သောဘာသာကို ကျွန်ုပ်တို့ ရွေးချယ်သောအခါတွင်လည်း ယုံကြည်စိတ်ချထိုက်သော လမ်းညွှန် လိုအပ်သည်။ ထိုလမ်းညွှန်မျိုး ရှိပါသလော။ ရှိပါသည်။ ယင်းမှာ သမ္မာကျမ်းစာ ဖြစ်သည်။ ကျမ်းစာက ဤသို့ဆို၏– ‘ကျမ်းစာမှန်သမျှကို ဘုရားသခင်၏ လမ်းညွှန်မှုဖြင့် ရေးသားပြုစုထားသဖြင့် ထိုကျမ်းစာသည် သမ္မာတရားကို သွန်သင်ခြင်း၊ ဆုံးမခြင်း၊ အမှားများကို ပြုပြင်ခြင်း၊ လျောက်ပတ်စွာ သက်ရှင်နေထိုင်တတ်ရန် လမ်းညွှန်ခြင်းတို့ကို ပြုတတ်၏။’—၂ တိမောသေ ၃:၁၆၊ ခမ။

စစ်မှန်သောဘာသာကို ပြညွှန်ပေးရန် လမ်းညွှန်မြေပုံသဖွယ် အသုံးပြုနိုင်သည့် သမ္မာကျမ်းစာကို သင့်ဘာသာစကားဖြင့် ရရှိနိုင်ပေမည်။ ဤဂျာနယ်ကို ထုတ်ဝေသော ယေဟောဝါသက်သေများသည် ကမ္ဘာသစ်ဘာသာပြန် ခရစ်ယာန်ဂရိကျမ်းစာအဖြစ် လူသိများသည့် စိတ်ချအားထားရသော ဘာသာပြန်ကျမ်းတစ်စောင်ကို မြန်မာဘာသာစကားဖြင့် ထုတ်ဝေထားပါသည်။ သို့သော် သင်သည် ယေဟောဝါသက်သေတစ်ဦး မဟုတ်ပါက စစ်မှန်သောဘာသာနှင့် မှားယွင်းသောဘာသာကို ခွဲခြားသိရှိစေသည့် အကြောင်းအရာကို သုံးသပ်သည့်အခါ အခြားဘာသာပြန်ကျမ်းစာများကို ပို၍ အသုံးပြုလိုပေမည်။ ထို့ကြောင့် အခြားဘာသာများက အလွန်လေးမြတ်ကြသော ဘာသာပြန်ကျမ်းစာများကို ဤအခန်းဆက် ဆောင်းပါးများတွင် ကိုးကားဖော်ပြထားပါသည်။

နောက်ဆောင်းပါးများကို ဖတ်ရှုသောအခါ သင်သိရှိထားရာနှင့် ကျမ်းစာသွန်သင်ရာကို နှိုင်းယှဉ်ပါ။ မှားယွင်းသောဘာသာမှ စစ်မှန်သောဘာသာကို ခွဲခြားသိရှိနိုင်ပုံနှင့်ပတ်သက်သည့် ယေရှု၏စကားများကို စိတ်စွဲမှတ်ထားပါ။ ကိုယ်တော် ဤသို့ဆိုခဲ့သည်– “ကောင်းသောအပင်သည် ကောင်းသောအသီး၊ မကောင်းသောအပင်သည် မကောင်းသောအသီးကို သီးတတ်၏။ ကောင်းသောအပင်သည် မကောင်းသောအသီး၊ မကောင်းသောအပင်သည် ကောင်းသောအသီးကို မသီးနိုင်။” (မဿဲ ၇:၁၇၊ ၁၈၊ သမ္မာကျမ်း) “ကောင်းသောအပင်” ဟုတ်မဟုတ် ခွဲခြားသိရှိစေမည်ဟု ကျမ်းစာက ဖော်ပြသော ကောင်းသောအသီး သုံးမျိုးကိုသာ သုံးသပ်ကြည့်ကြစို့။