Diriša Tšhelete ya Gago ka Bohlale

POLELWANA e rego “Tšhelete ke modu wa bobe ka moka” gantši go thwe ke ya ka Beibeleng. Seo ge e le gabotse Beibele e se bolelago ke gore: “Lerato la tšhelete ke modu wa bobe ka moka.” (1 Timotheo 6:10, King James Version) Batho ba bangwe ba tloga ba e-na le lerato la go rata tšhelete gomme ba ineetše go ikgobeleleng mahumo. Ba bangwe ba fetogile makgoba a tšhelete gomme seo se ba baketše mathata a magolo. Lega go le bjalo, tšhelete e ka ba le mohola ge e ba e dirišwa ka mo go swanetšego. Beibele e bolela gore “tšhelete e rarolla mathata a mantši.”—Mmoledi 10:19, Holy Bible—Easy-to-Read Version.

Gaešita le ge Beibele e sa bolele ka ditaba tša tša ditšhelete, eupša e na le keletšo e šomago yeo e ka go thušago go diriša tšhelete ya gago ka bohlale. Megato e latelago e mehlano ke yeo ka tlwaelo e kgothaletšwago ke baeletši ba tša ditšhelete gomme e dumelelana le melao ya motheo yeo e lego kgale e ngwadilwe ka Beibeleng.

Boloka. Pego ya Beibele e bontšha gore Baisiraele ba bogologolo ba be ba rutwa bohlokwa bja go boloka. Ba be ba boditšwe gore ba beele karolo ya lesome ka thoko ngwaga o mongwe le o mongwe gore e dirišwe ka mo go kgethegilego go ya menyanyeng ya setšhaba. (Doiteronomio 14:22-27) Ka mo go swanago, moapostola Paulo o ile a kgothaletša Bakriste ba pele gore ba beele tšhelete ka thoko beke e nngwe le e nngwe e le gore ka morago ba ka tla ba kgona go thuša badumedi-gotee le bona bao ba se nago sa bona. (1 Bakorinthe 16:1, 2) Baeletši ba bantši ba tša ditšhelete ba kgothaletša go boloka tšhelete. Dira gore go boloka tšhelete e be selo seo se tlago pele bophelong bja gago. Gatee-tee feela ge o se na go hwetša mogolo wa gago, bea tšhelete yeo o nyakago go e boloka ka pankeng goba bobolokelong bjo bongwe bja ditšhelete. Seo se tla go thuša go lwantšhana le teko le ge e le efe ya go diriša tšhelete yeo.

Rulaganya Tirišo ya Tšhelete. Ye ke tsela e nnoši e šomago ya go hlokomela, go laola, goba go fokotša tirišo ya gago ya tšhelete. Go rulaganya tirišo ya tšhelete gabotse go ka go dira gore o bone moo tšhelete ya gago e felelago gona gomme go ka go thuša go fihlelela dipakane tša gago tša tša ditšhelete. Tseba mogolo wa gago gomme o se ke wa diriša tšhelete yeo e fetago mogolo wa gago. Tseba phapano magareng ga dinyakwa tša gago le dilo tšeo o fo bago o di nyaka. Mabapi le se, Jesu ka bohlale o  kgothaleditše batheetši ba gagwe gore ba ‘bale ditshenyegelo’ pele ba ka thoma ka modiro le ge e le ofe. (Luka 14:28) Beibele e re eletša ka gore re pheme dikoloto tšeo di sa nyakegego.—Diema 22:7.

Rulaganya. Hlahloba ka kelohloko dinyakwa tša gago tša nakong e tlago. Ka mohlala, ge e ba o rulaganya go reka ngwako goba folete, go dira kadimo ya tšhelete e nago le tswalo ya tlasana e ka ba phetho e botse. Ka mo go swanago, monna yo a ratago lapa la gagwe a ka bona go nyakega gore a be le inšuranse ya bophelo, ya tša kalafo, ya bogole goba mehuta e mengwe ya diinšuranse bakeng sa go šireletša lapa la gagwe. Go naganišiša ka dinyakwa tša gago tša nakong e tlago go ka akaretša gape le go dira dithulaganyo tša nakong ya ge o tla rola modiro. Diema 21:5 e re gopotša gore “’kêlêllô tša serôtô di iša mokhoreng.”

Ithute. O ka holwa ke go ithuta mešomo e itšego le go itlhokomela mmeleng le maikwelong. Dilo tše di ka tla tša go putsa. Dira gore go ithuta e be mokgwa wa gago wa bophelo ka moka. Beibele e tšeela godimo ‘bohlale le tlhaologanyo’ gomme e re kgothaletša go tšwela pele re di hlagolela.—Diema 3:21, 22; Mmoledi 10:10.

Teka-tekano. Bea tšhelete boemong bja yona. Dinyakišišo di bontšha gore bao ba etišago batho pele e sego tšhelete ba thabile. Ba bangwe ba dumelela megabaru gore e ba laole. Ba dira seo bjang? Ka morago ga go kgotsofatša dinyakwa tša bona tša motheo ka mo go lekanego, ba thoma go phegelela mahumo. Lega go le bjalo, ka ntle le dijo, diaparo le lefelo la go dula, ke’ng seo ge e le gabotse motho a se nyakago? Ga go makatše ge mongwadi wa Beibele yo a tsopotšwego mathomong a sehlogo se a ngwadile gape gore: “Ge re e-na le dijo le diaparo re tla kgotsofala ka tšona.” (1 Timotheo 6:8) Go hlagolela kgotsofalo go re efoša go ba le lerato la tšhelete le mathata ka moka ao a bakwago ke lona.

Ka kgonthe lerato la tšhelete ke modu wa dilo tše dintši tše mpe. Tšhelete e ka go laola ge e ba o e dumelela. Lega go le bjalo, ge e dirišwa gabotse, tšhelete e ka dira gore o be le tokologo ya go phegelela dilo tše bohlokwa bophelong, tše bjalo ka go ba le tswalano ya kgaufsi le lapa, le bagwera gotee le Modimo. Lega go le bjalo, lefaseng le go bonagala go sa kgonege gore motho a se tshwenyege ka mo go feletšego ka tšhelete. Na tšhelete e tla dula e le mothopo wa dipelaelo? Ke kholofelo efe yeo e lego gona ya go fediša bodiidi? Sehlogo sa mafelelo tatelanong ye ya dihlogo se tla araba dipotšišo tšeo.

[Ntlhakgolo go letlakala 5]

Tseba mogolo wa gago gomme o se ke wa diriša tšhelete yeo e fetago mogolo wa gago

[Ntlhakgolo go letlakala 5]

Tseba phapano magareng ga dinyakwa tša gago le dilo tšeo o fo bago o di nyaka

[Ntlhakgolo go letlakala 6]

Ka ntle le dijo, diaparo le lefelo la go dula, ke’ng seo ge e le gabotse motho a se nyakago?

 [Box/​Picture on page 7]

Ruta Bana Ba Gago Go Diriša Tšhelete Gabotse

Ka baka la gore batho ba bantši ba bagolo ba na le mathata a tša ditšhelete lehono, ditsebi di kgothaletša batswadi gore ba rute bana ba bona go diriša tšhelete—le gore ba thome go dira seo ka pela. Botšiša bana ba bantši gore tšhelete e tšwa kae gomme ba ka no re, “go tate” goba “pankeng.” Ge o ka ruta bana ba gago bohlokwa bja tšhelete—kamoo dinyakwa di fapanago le dilo tšeo motho a fo bago a di nyaka, kamoo ba ka bolokago tšhelete ka gona le kamoo ba ka e beeletšago ka gona—o ka ba thuša go phema go kwešwa bohloko ke dikoloto tše dikgolo le go tlaišwa ke maemo a tša boiphedišo. Ela hloko ditšhišinyo tše sego kae.

1. E-ba mohlala o mobotse. Bana ba gago ka kakaretšo ba tla ekiša seo o se dirago go feta seo o se bolelago.

2. Lekanyetša ditshenyagalelo tša gago. Boledišana le bana ba gago ka tšhelete yeo le ka e dirišago. Ithute go gana gomme o gane e le ka kgonthe.

3. Ba dumelele go diriša tšhelete gabotse. Ge e ba ba hwetša tekanyo e itšego ya tšhelete goba ba putswa ka yona bakeng sa modiro o itšego, ba fe tlhahlo. Ke moka o ba dumelele go itirela diphetho tše itšego.

4. Ba rute go abelana. Kgothaletša bana ba gago go abelana seo ba nago le sona le ba bangwe le gore ba dule ba beela tšhelete e itšego ka thoko bakeng sa go tumiša Modimo ka yona.