Meetse a Išago Bophelong

Jesu o be a sepela go phatša Samaria yeo e lego ka leboa la Jerusalema. O be a lapile e bile a nyorilwe. Ge a dutše sedibeng, o ile a kgopela mosadi wa Mosamaria gore a mo gele meetse. Mosadi o ile a makatšwa ke gore Mojuda o be a mo kgopela meetse, mola lekgolong la pele la nywaga Bajuda le Basamaria ba be ba sa kwane gabotse.

Mosadi yo a gakanegilego o ile a botšiša Jesu gore: “Go tla bjang gore wena, o re o le Mojuda o nkgopele meetse mola ke le mosadi wa Mosamaria?”

Jesu a re go yena: “Ge nkabe o tsebile mpho e sa lefelelwego ya Modimo le gore ke mang yo a rego go wena, ‘Mphe meetse ke nwe,’ o ka be o kgopetše yena, gomme yena a ka be a go neile meetse a phelago.”

Jesu o tšwetše pele ka go mo hlalosetša gore: “Yo mongwe le yo mongwe yo a nwago meetse a o tla buša a nyorwa. Mang le mang yo a nwago meetse ao ke tlago go mo nea ona a ka se ke a ba a nyorwa, eupša meetse ao ke tlago go mo nea ona e tla ba mothopo wa meetse o runyago bakeng sa go nea bophelo bjo bo sa felego.”—Johane 4:1-15.

Jesu o be a bolela ka meetse afe?

BEIBELE e re Mmopi, Jehofa Modimo, ke “sediba sa meetse a phelaxo.” (Jeremia 2:13) Bophelo ke mpho e tšwago go Modimo gomme go ba gona ga rena go ithekgile ka gore re hwetše meetse ao a re neago ona, ka tsela ya kgonthe le ka tsela ya moya.

Go nyakega tlhahlo ya moya lehono go feta le ge e le neng pele. Ee, go ka bolelwa gore lefase le na le komelelo ya moya. Batho ba nyaka dikarabo tša dipotšišo tše bjalo ka tše: Bahu ba kae? Na go na le kholofelo ya gore re tla boelanywa le bona gape? Ke ka baka la’ng Modimo a dumelela tlaišego? Na ntwa, bokebekwa, tlala le malwetši di tla ka tša fela nakong e tlago? Dihlatse tša Jehofa di dumela gore dikarabo tše di kgotsofatšago tša dipotšišo tše di ka hwetšwa ka go seo go thwego ke meetse a lapološago a Lentšu la Modimo, Beibele.

Ge Jesu a be a bolela le mosadi wa Mosamaria sedibeng, bjalo ka ge go hlalositšwe pejana, o be a bolela ka meetse ao a neago bophelo a therešo ao  re ka a hwetšago ka Lentšung la Modimo. Dihlatse tša Jehofa di go laletša gore o kwe tatso ya meetse a sekilego a therešo. Taletšo ye e tšweletšwa ka pukung ya mafelelo ya Beibele: “Mang le mang yo a nyorilwego a a tle; mang le mang yo a ratago a tle a tšee meetse a bophelo ka ntle le tefo.”—Kutollo 22:17.

Go ithuta mo go oketšegilego mabapi le kamoo Mmušo wa Modimo o tlago go hola moloko wa batho ka gona, etela Dihlatse tša Jehofa Holong ya Mmušo ya kgaufsi goba o ngwalele atereseng e swanetšego yeo e lego go letlakala 5 la makasine wo. Le gona, o ka etela mokero wa Web go www.watchtower.org.

 [Lepokisi go letlakala 8, 9]

NA BODUMEDI BO TLOŠITŠE BATHO LENYORA?

Go fo ya kerekeng goba go bolela gore o modumedi ga go nee motho meetse a kgotsofatšago a therešo. Therešo ke gore, dikereke tše dintši tše dikgolo di okeditše mathata a batho go e na le go a rarolla. Ela hloko mohlala o mongwe: Dinakong tša dintwa, Makatholika a bolaile Makatholika, gomme Maprotestanta a bolaya Maprotestanta—mahlakore ka bobedi a kgopela Modimo gore a a thuše go fenya.

Go tlaleletša go seo, go na le dipego tše dintši tšeo di lešago dihlong ka kereke tšeo di akaretšago baruti bao ba ilego ba utswa tšhelete goba go tlaiša bana ka dikopano tša botona le botshadi. Therešo ke gore meetse ao a newago ke dikereke tše dintši a šilafetše. (Kutollo 17:4-6; 18:1-5) Boemo bo swana le bjoo bo hlalositšwego ka Beibeleng go Tito 1:16 e rego: “Ba bolela phatlalatša gore ba tseba Modimo, eupša ba mo latola ka mediro ya bona.” Mabakeng a mantši, bodumedi bo dirile mo go nyenyane bakeng sa go tloša batho lenyora mo dinakong tša komelelo ya moya.

[Box/​Picture on page 17]

Dikgaolong tše 19, kgatišo ya matlakala a 224 ya Ke Eng Seo ge e le Gabotse Beibele e se Rutago? e nea dikarabo tša Beibele tša dipotšišo tša motheo tše bjalo ka tše rego:

“Morero wa Modimo ka lefase ke ofe?”

“Bahu ba kae?”

“Na re phela ‘mehleng ya bofelo’?”

“Ke ka baka la’ng Modimo a dumelela tlaišego?”

[Seswantšho go letlakala 17]

O ka hwetša ‘meetse a bophelo’ Holong ya Mmušo ya lefelong la geno