Eshuura ya Ikumi na Mwenda

Yerindire omu Kukunda kwa Ruhanga

Okukunda Ruhanga nikimanyisa ki?

Nitubaasa kwerindira tuta omu kukunda kwa Ruhanga?

Ni bihembo ki ebi Yehova araije kuheereza abo abarikwerindira omu kukunda kwe?

1, 2. Ni nkahi ei turikubaasa kwiha obuhungiro ebiro ebi?

TEERA akashushani ori omu ruguuto noogyenda, hariho eihunga ry’amaani. Ku oba noogyenda, eiguru rihinduriza kandi habaho omwirima. Emirabyo etandika kutyankana, habaho okuhinda kw’enkuba, n’enjura etandika kufukunkuka. Ogyezaho kugyenda orikurahuka kandi orikuronda obwegamo. Ku oba noogyenda, haihi aho n’oruguuto, oreebaho obwegamo. Bwombekire gye, tiburikutura kandi ni burungi. Mbwenu ka nootwara obwegamo obwo kuba obw’omugasho munonga!

² Nitutuura omu biro by’ihunga. Emituurire y’abantu omu ensi neeyeyongyera kuba mbi munonga. Kwonka hariho obwegamo oburikwesigwa, obwegamo oburikubaasa kuturinda akabi obutwire bwona. Obwegamo obu niki? Yetegyereze eki Baibuli erikwegyesa ku erikugira eti: “Aryagira MUKAMA ati: Niiwe buhungiro bwangye, kandi orugo rwangye orugumire, Ruhanga wangye ou ndikwesiga.”—Zaaburi 91:2.

3. Tukaabaasa tuta kuhindura Yehova obuhungiro bwaitu?

 ³ Teekateeka ahari ekyo! Yehova, Omuhangi kandi Omutegyeki w’ensi yoona, naabaasa kuba obuhungiro bwaitu. Naabaasa kuturinda gye, ahabw’okuba we aine amaani okukira omuntu weena nari ekintu kyona ekirikubaasa kutureetaho akabi. N’obu twakuhikwaho akabi, Yehova naabaasa kumaraho byona ebirikureetwa akabi ako. Tukaabaasa tuta kuhindura Yehova obuhungiro bwaitu? Nitwetenga kumwesiga. Kandi n’Ekigambo kya Ruhanga nikitwehanangiriza kiti: “Mwerindire omu kukunda kwa Ruhanga.” (Yuda 21) Buzima, nitwetenga kwerindira omu kukunda kwa Ruhanga, tukahamya omukago gwaitu na Tataitwe ow’omu iguru. Obwo nibwo turikubaasa kuhamya ngu Ruhanga n’obuhungiro bwaitu. Kwonka shi, tukaabaasa tuta kugira omukago nk’ogwo nawe?

MANYA KANDI OYAKIIRE OKUKUNDA KWA RUHANGA

4, 5. Ni miringo ki emwe ei Yehova atworekiiremu rukundo ye?

⁴ Okubaasa kwerindira omu kukunda kwa Ruhanga, nitwetenga kubanza kwetegyereza oku Yehova atworekire okukunda kwe. Teekateeka aha nyegyesa za Baibuli ezimwe ezi oyegire obwo orikuhwerwa ekitabo eki. Nk’Omuhangi, Yehova akatuha ensi kuba eka yaitu enungi munonga. Akagiijuzamu eby’okurya bingi, amaizi, eby’obugaiga eby’omu itaka, enyamaishwa ezirikushemeza hamwe n’emyanya mirungi munonga. Nk’Omuhandiiki wa Baibuli, Ruhanga atushuuruuriire eiziina rye hamwe n’emitwarize ye. Kandi hoona, Ekigambo kye nikyoreka ngu akoohereza Yesu Omwana we ou akunda munonga omu nsi, yaamureka kubonabonesibwa n’okutufeera. (Yohaana 3:16) Ekiconco ekyo nikitugasira kita? Nikituha amatsiko aha biro birungi eby’omu maisho.

⁵ Amatsiko agu twine aha biro by’omu maisho geegami aha kintu ekindi eki Ruhanga atukoreire. Yehova akataho gavumenti omu iguru, nibwo Bukama bwa Mesia. Neeza kumariraho kimwe okubonabona kandi ehindure ensi ekibanja kya Ruhanga. Teekateeka ahari eki! Nitubaasa kutuura omu kibanja kya Ruhanga twine obusingye n’okushemererwa ebiro byona! (Zaaburi 37:29) Kwonka ekyo kitakabaireho, ebiro ebi Ruhanga naatuha obuhabuzi aha ku turikubaasa kutuura omu muringo ogurikukirayo oburungi. Atuhaire n’omugisha gw’okushaba, kandi ahabw’omugisha ogu nitubaasa kumuhikiirira obwire bwona n’ahi turaabe turi hoona.  Egi n’emwe aha mihanda ei Yehova ayorekiiremu abantu boona rukundo ye, naiwe obarimu.

6. Noobaasa kwakiira ota okukunda kwa Yehova oku akworekire?

⁶ Ekibuuzo ekikuru eki oshemereire kuteekateekaho n’eki: Niinyija kwakiira nta okukunda kwa Yehova? Baingi nibabaasa kugira, “Naanye nshemereire kukunda Yehova.” Niiwe okwo nikwo orikuteekateeka? Yesu akagira ngu ekiragiro ekirikukirayo n’ekirikugira kiti: “Kunda Mukama Ruhanga waawe n’omutima gwawe gwona, n’amagara gaawe goona, n’obwengye bwawe bwona.” (Matayo 22:37) Buzima hariho enshonga nyingi ezishemereire kukureetera kukunda Yehova Ruhanga. Kwonka shi okuhurira kwonka ngu oine okukunda nk’okwo nikyo kirikumanyisa okukunda Yehova n’omutima gwawe gwona, n’amagara gaawe goona, n’obwengye bwawe bwona?

7. Okuhurira oyiniire Ruhanga rukundo kwonka nikyo kirikumanyisa okumukunda buzima? Shoborora.

⁷ Nk’oku kirikushobororwaho omuri Baibuli, okukunda Ruhanga nikikira aha kuhurira kwonka ngu omwiniire rukundo. N’obu okwehurira oyiniire Yehova rukundo kiri kikuru, enyehurira egi n’entandikiro ya rukundo eya buzima ahari Ruhanga. Waaba nooyenda kutunga omuti ogurikwana ebijuma, nikiba nikikwetengyesa okubanza kutunga embibo y’ekijuma ky’omuti ogwo. Ku waakuba nooyenda ekijuma, mbwenu shi okaamarwa omuntu yaakuha embibo y’ekijuma ekyo yonka? Ngaaha buzima! Nikyo kimwe, okuhurira oyiniire Yehova Ruhanga rukundo n’entandikiro y’okumukunda kwonka. Baibuli neeyegyesa eti: “Oku nikwo kukunda Ruhanga, itwe okworobera ebiragiro bye; kandi ebiragiro bye tibirusya.” (1 Yohaana 5:3) Amazima gari ngu, okukunda Ruhanga kushemereire kwana ebyana birungi. Kushemereire kworekwa omu bikorwa.—Matayo 7:16-20.

8, 9. Nitubaasa kworeka tuta ngu nitukunda Ruhanga kandi ngu nitusiima ebi atukoreire?

⁸ Nitworeka ngu nitukunda Ruhanga ku turikworobera ebiragiro bye kandi tukagyendera aha misingye ye. Kandi okubyorobera ti kigumire. Omu mwanya gw’okuturutsya, ebiragiro bya Yehova  bitairweho kutuhwera kugira amagara marungi, agarimu okushemererwa n’okumarwa. (Isaaya 48:17, 18) Omu kugyendera aha buhabuzi bwa Yehova, nitworeka Tataitwe ow’omu iguru ngu buzima nitusiima byona ebi atukoreire. Kwonka eky’obusaasi, bakye munonga omu nsi egi nibo barikworeka okusiima okwo. Titurikwenda kuba entasiima, nka bamwe abaabaire bariho obu Yesu yaabaire ari omu nsi. Yesu akatambira ababembe ikumi, kwonka omwe wenka niwe yaagarukire kumwebaza. (Luka 17:12-17) Buzima nitwenda kuba nk’ori owaayorekire okusiima, beitu kutari kuba nka bari mwenda entasiima!

⁹ Ebiragiro bya Ruhanga ebi tushemereire kworobera ni biiha? Twegire bimwe aha biragiro ebyo omu kitabo eki, kwonka ka tweyijutsye bikye ahari byo. Okworobera ebiragiro bya Ruhanga nikwija kutuhwera kwerindira omu kukunda kwa Ruhanga.

YIRIRA HAIHI YEHOVA OBUTOOSHA

10. Shoborora ahabw’enki kiri kikuru okugumizamu turikwega ahari Yehova Ruhanga.

¹⁰ Okwega ahari Yehova n’ekintu kikuru omu kumwirira haihi. N’ekintu ekishemereire kugumizamu. Ku waakuba ori aheeru nooyota omuriro nyekiro ahabw’embeho,  mbwenu okaareka omuriro ogwo guraara? Ngaaha. Nooguma nooyongyera enku omu muriro kandi orikuzenegyezamu okugira ngu gugume nigwaka kandi ogume nootagatirwa. Amagara gaawe nigaba geegami aha kugumya omuriro nigwaka! Nk’oku enku zirikugumya omuriro nigwaka, nikwo ‘n’okweyongyera kwega ahari Yehova’ kurikuhamya rukundo yaitu ahariwe.—Enfumu 2:1-5.

11. Okwegyesa kwa Yesu kukakwata kuta aha bakuratsi be?

¹¹ Yesu akaba naayenda ngu abakuratsi be bahamye rukundo yaabo ahari Yehova n’aha Kigambo Kye eky’amazima kandi eky’omuhendo. Bwanyima y’okuzooka kwe, Yesu akeegyesa babiri aha beegyesibwa be ebirikukwata aha burangi bumwe oburi omu Byahandikirwe eby’Oruheburaayo obwahikiririziibwe omuriwe. Oburangi obwo bukabakwataho buta? Bwanyima bakagira bati: “Emitima yaitu tiyaashashaanuka, obu yaaba naagamba naitwe omu muhanda, naatushuuruurira Ebyahandiikirwe?”—Luka 24:32.

12, 13. (a) N’enki ekihikire aha kukunda oku baingi baine ahari Ruhanga n’ahari Baibuli? (b) Tukaayetantara tuta okuhora omuri rukundo?

¹² Obu waabanza kwega eki Baibuli buzima erikwegyesa, oketegyereza ngu omutima gwawe gukashashaanuka, gwijura amashemererwa, omujinya hamwe na rukundo ahari Ruhanga? Hatariho kubanganisa oku nikwo waahuriire. N’abandi baingi nikwo barikuhurira batyo. Kwonka eki orikwetenga kukora hati n’okugumya okukunda okwo kuhamire kandi okakutunguura. Titurikwenda kukuratira emitwarize y’ensi egi. Yesu akaragura ati: “Okukunda kw’abaingi kuryahora.” (Matayo 24:12) Okaayetantara ota okuhora omu kukunda oku oyiniire Yehova n’amazima g’ekigambo kye Baibuli?

¹³ Gumizamu nooyega amazima agarikukwata ahari Yehova Ruhanga na Yesu Kristo. (Yohaana 17:3) Yecumitirize aha bi orikwega omu Kigambo kya Ruhanga kandi yebuuze: Eki naayega nikinyegyesa ki ahari Yehova Ruhanga? N’enki ekindi eki kirikunyegyesa ekirikundetera kumukunda n’omutima gwangye gwona, n’obwengye bwangye bwona n’amagara gangye goona? (1 Timoseo 4:15) Okwecumitiriza okwo nikwija kugumya okukunda oku oyiniire Yehova kuhamire.

14. Okushaba nikutuhwera kuta omu kugumya okukunda kwaitu ahari Yehova kuhamire?

 ¹⁴ Okushaba obutoosha n’omuringo ogundi ogu turikubaasa kurindiramu okukunda kwaitu ahari Yehova kuhamire. (1 Abatesalonika 5:17) Omu Shuura ya 17 ey’ekitabo eki, tukeega ngu okushaba n’omugisha gw’omutaano kuruga ahari Ruhanga. Nk’oku enkorengana y’abantu erikuguma eri nungi haaba hariho empurizana nungi, n’omukago gwaitu na Yehova niguguma guhamire twaguma nitugamba nawe obutoosha. Nikikuru ngu tutakashabire, tubanze tuteekateeke aha bi turaagambeho—okushaba kwaitu kurekye kuba okugarukagaruka omu bigambo, kutyo kukabura amakuru. Nitwetenga kugamba na Yehova nk’oku omwana arikugamba n’ishe ou arikukunda munonga. Tushemereire kugamba na Ruhanga omu muringo gw’ekitiinisa, buzima tutaine eki turikumushereka kandi turikwihira kimwe aha mutima. (Zaaburi 62:8) Buzima, okweyegyesa Baibuli hamwe n’okushaba okurugire aha mutima n’ebintu bikuru omu kuramya kwaitu, kandi nibituhwera kwerindira omu kukunda kwa Ruhanga.

TUNGA OKUSHEMERERWA OMU KURAMYA KWAWE

15, 16. Ahabw’enki tushemereire kutwara omurimo gw’okubuurira aha Bukama nk’omugisha gw’omutaano kandi nk’eky’eitungo?

¹⁵ Okweyegyesa Baibuli hamwe n’okushaba n’ebikorwa by’okuramya ebi turikubaasa kukorera omu mubonano. Kwonka hati, ka twetegyereze omuringo ogu turikuramyamu turi omu bantu; okugamba n’abandi aha nyikiriza yaitu. Waaganiireho n’abandi aha mazima g’omu Baibuli? Ku oraabe waakikozire, otungire omugisha gw’omutaano. (Luka 1:74) Ku turikuganiira n’abandi aha mazima agu twegire ahari Yehova Ruhanga, nituba nitukora omurimo mukuru ogwahairwe Abakristaayo boona ab’amazima—nigwo murimo gw’okubuurira amakuru marungi ag’Obukama bwa Ruhanga.—Matayo 24:14; 28:19, 20.

¹⁶ Entumwa Paulo akaba naatwara obuheereza bwe nk’ekintu ky’omuhendo; akabweta eky’obutungi. (2 Abakorinso 4:7) Okuganiira n’abantu ahari Yehova Ruhanga hamwe n’aha bigyendererwa bye nigwo murimo ogurikukirayo ogu orikubaasa kukora. Oku nikuba kuri okuheereza Omutegyeki orikukirayo obukuru kandi okumuheereza nikurugamu emigisha erikukirayo oburungi. Omu  kwejumba omu buheereza obu, noohwera abantu ab’emitima egororokire kwirira haihi Tataitwe ow’omu iguru n’okuza omu muhanda gw’okutunga amagara agatahwaho! Ni murimo ki ogurikureeta okumarwa nk’ogu? Kandi ekindi, okubuurira aha birikukwata ahari Yehova hamwe n’Ekigambo kye nikwongyera  kuhamya okwikiriza kwawe kandi kuhamya na rukundo yaawe ahariwe. Kandi Yehova naasiima munonga okwehayo kwawe. (Abaheburaayo 6:10) Okugumizamu orikukora omurimo ogwo n’obwesigwa nikikuhwera kwerindira omu kukunda kwa Ruhanga.—1 Abakorinso 15:58.

17. Ahabw’enki omurimo gw’Abakristaayo ogw’okubuurira gushemereire kukorwa n’obwira?

¹⁷ Ni kikuru okwijuka ngu omurimo gw’okubuurira aha Bukama nigwetenga kukorwa n’obwira. Baibuli neegira eti: “Ogume obuurire ekigambo kya Ruhanga, ogambe n’obweziriki.” (2 Timoseo 4:2) Ahabw’enki okukora eki kirikwetengyesa munonga? Ekigambo kya Ruhanga nikitugambira kiti: “Eizooba rya MUKAMA erikuru riri haihi; riri haihi kandi nirirahuka munonga.” (Zefania 1:14) Buzima, obunaku nibuza kuhika juba obu Yehova araamareho obusingye obu bwona obubi. Abantu nibetenga kuraburwa! Nibetenga kumanya ngu obu nibwo bunaku bwabo kutooranaho Yehova akaba Omutegyeki waabo omukuru. Emperu ‘terikuza kukyerererwa.’—Habakuuki 2:3.

18. Ahabw’enki tushemereire kuramya Yehova tuteeraniire hamwe n’Abakristaayo ab’amazima?

¹⁸ Yehova naayenda ngu tumuramye turikuteeranira hamwe n’Abakristaayo ab’amazima. Egi niyo nshonga ahabw’enki Ekigambo kye nikigira kiti: “Ka tuteekateekye oku twakwezirikisana kukundana n’okukora ebirungi, tutarikureka kuteeranira hamwe nk’oku abamwe bagira, kureka tugumyane, kandi nk’oku murikureeba ngu ekiro ekyo kiri haihi n’okuhika, mweyongyere kutwaza mutyo.” (Abaheburaayo 10:24, 25) Ku turikuteeranira hamwe omu nteerane z’Ekikristaayo n’abaikiriza bataahi baitu, nitugira omugisha gw’okuhimbisa n’okuramya Ruhanga waitu omukundwa. Ekindi, nitwombekana kandi tugumyana.

19. N’enki eki tushemereire kukora okuhamya rukundo yaitu aha b’omu kibiina Ekikristaayo?

¹⁹ Ku turikuteeranira hamwe n’abandi baramya ba Yehova, nituhamya rukundo hamwe n’omukago gwaitu aha b’omu kibiina. Nikikuru itwe okuguma nitusherura ebirungi omu bandi, nk’oku Yehova arikusherura ebirungi omuriitwe. Otakaayenza abaikiriza bataahi baawe okuhikiirira. Ijuka ngu tibarikutunguuka omu by’omwoyo aha rurengo rumwe kandi ijuka ngu buri omwe  omuriitwe naakora enshobe. (Abakolosai 3:13) Sherura kugira emikago ehamire n’abo abarikukundira kimwe Yehova, haza noija kweshanga orikutunguuka omu by’omwoyo. Buzima, okuramya Yehova ori n’ab’eishe-emwe bataahi baawe nikiija kukuhwera kwerindira omu kukunda kwa Ruhanga. Ni biconco ki ebi Yehova arikuheereza abo abarikumuramya omu mazima kandi bakeerindira omu kukunda kwe?

YETENGYE KUGIRA “AMAGARA AGA BUZIMA”

20, 21. “Amagara aga buzima” nikyo ki, kandi ahabw’enki amatsiko g’okugatunga gari ag’omutaano?

²⁰ Yehova naaha abaheereza be ab’amazima ekiconco ky’amagara. Kwonka shi naabaha amagara ga muringo ki? Mbwenu hati buzima oine amagara? Baingi omuriitwe nibabaasa kugira ngu buri omwe ekyo naakireeba ku twine amagara. Ku turaabe nitwitsya, tukarya kandi tukanywa, buzima twine amagara. Obumwe ku turikushemererwa munonga, nitubaasa n’okugira tuti: “Aga buzima nigo magara agarikukirayo oburungi!” Kwonka, Baibuli neegira ngu omu muringo oguri gwo, tihariho muntu n’omwe ohuriire buzima.

²¹ Ekigambo kya Ruhanga nikituhiga “kutunga amagara aga buzima.” (1 Timoseo 6:19) Ebigambo ebyo nibyoreka ngu “amagara aga buzima” n’ekintu eki twine amatsiko kutunga omu biro by’omu maisho. Ku turiba abahikiriire, buzima turyagira amagara aga buzima omu nsi ebiro byona, turyatuura nk’oku Ruhanga yaabaire naayenda ngu tutuure. Ku turiba nitutuura omu kibanja kya Ruhanga omu nsi omu magara marungi, omu busingye n’omu kushemererwa, turyagira “amagara aga buzima”—nigo magara agatahwaho. (1 Timoseo 6:12) Ago buzima t’amatsiko g’omutaano?

22. Noobaasa ota kutunga “amagara aga buzima”?

²² Nitubaasa tuta “kutunga amagara aga buzima”? Omu bigambo nibyo bimwe, Paulo akahiga Abakristaayo ‘kukora ebirungi’ hamwe ‘n’okuba abatungi omu micwe mirungi.’ (1 Timoseo 6:18) N’ahabw’ekyo, ebi byona byegami aha ku turikuta omu nkora amazima agu twaherize kwega omuri Baibuli. Kwonka shi noogira ngu Paulo akaba naamanyisa ngu nitutunga “amagara aga buzima” ahabw’okukora ebirungi? Ngaaha, ahakuba okutunga amagara aga buzima nikurugiirira ahari Ruhanga ‘kutugirira embabazi.’ (Abarooma 5:15) Kwonka kandi, Yehova naashemerererwa okuha abaheereza be  abeesigwa ebiconco. Naayenda ngu ogire “amagara aga buzima.” Abo abarikwerindira omu kukunda kwa Ruhanga, omu biro by’omu maisho nibaija kutunga okushemererwa, obusingye n’amagara agatahwaho.

23. Ahabw’enki okwerindira omu kukunda kwa Ruhanga kiri ekintu kikuru?

²³ Buri omwe omuriitwe ashemereire kwebuuza ati: ‘Nindamya Ruhanga omu muringo ogu ataireho omuri Baibuli?’ Ku turaagume nitwebuuza buri izooba tukahamya ngu buzima nituramya Ruhanga omu muringo gu ataireho, biri turi omu muhanda oguhikire. Obwo nitugira obwesigye ngu Yehova n’obuhungiro bwaitu. Naija kurinda abantu be abeesigwa barabe omu biro by’oburemeezi eby’aha muheru eby’obusingye obu obubi. Yehova kandi naija kutukiza, atutaatsye omu nsi ensya eri haihi kwija. Ka nitwija kushemererwa kureeba ensi egyo! Kandi ka nitwija kushemererwa okureeba ngu tukacwamu gye omu biro ebi eby’aha mperu! Ku oraacwemu omu muringo nk’ogwo hati, noija kugira “amagara aga buzima,” ebiro byona nk’oku Yehova Ruhanga yaabaire naayenda ngu gabe!

EBI BAIBULI ERIKWEGYESA

▪ Nitworeka ngu twiniire Ruhanga rukundo eya buzima turikworobera ebiragiro bye kandi turikugyendera aha misingye ye.—1 Yohaana 5:3.

▪ Okwega Ekigambo kya Ruhanga, okushaba Yehova twihire aha mutima, okwegyesa abandi ebirikumukwataho hamwe n’okumuramya turi omu nteerane z’Ekikristaayo nibiija kutuhwera kwerindira omu kukunda kwa Ruhanga.—Matayo 24:14; 28:19, 20; Yohaana 17:3; 1 Abatesalonika 5:17; Abaheburaayo 10:24, 25.

▪ Abo abarikwerindira omu kukunda kwa Ruhanga baine amatsiko g’okutunga “amagara aga buzima.”—1 Timoseo 6:12, 19; Yuda 21.

[Ebibuuzo by’Obucweka]

[Ekishushani ekiri aha rupapura 184]

Noija kuhindura Yehova obuhungiro bwawe omu bwire obu obw’oburemeezi?

[Ekishushani ekiri aha rupapura 187]

Nk’oku enku zirikugumya omuriro nigwaka, nikwo n’okweyongyera kwega ahari Yehova kurikuhamya rukundo yaawe ahariwe

[Ekishushani ekiri aha rupapura 190]

Yehova naayenda ngu otungye “amagara aga buzima.” Noija kugatunga?