Мексикӕйы бандӕйы, «Ӕрыгон сатанисттӕ», зӕгъгӕ, чи уыд, уыцы лӕппу цӕй фӕрцы фӕивта ӕмӕ дзы ӕууӕнкджын ӕмӕ куыстуарзаг адӕймаг куыд рауад? Сӕйрагдӕр ӕхца кӕмӕн уыд, Японийӕ уыцы хъӕздыг сылгоймаг цардмӕ ӕндӕр цӕстӕй кӕсын цӕмӕн райдыдта ӕмӕ, цымӕ, ууыл нӕ фӕсмон кӕны? Хӕцӕнгарз сусӕгӕй чи уӕй кодта, Уӕрӕсейӕ уыцы лӕг йе ’хцаджын куыст цӕмӕн ныууагъта? Ӕркӕсӕм, сӕхӕдӕг цы дзурынц, уымӕ.

 

ЙӔ НОМ АДРИАН ПЕРЕС

ЦӔУЫ ЙЫЛ 30 АЗЫ

ЦӔРЫ МЕКСИКӔЙЫ

РАЗДӔР УЫД БАНДӔЙЫ

Горӕт Экатепек-де-Морелосмӕ (штат Мехико) куы ралыгъдыстӕм, уӕд мыл цыд 13 азы. Уыцы рӕстӕг горӕты ӕрыгӕттӕй бирӕтӕ уыдысты наркомантӕ, алы фыдракӕндтӕ арӕзтой, пырх кодтой ӕмӕ сӕфтой, цӕуыл ӕмбӕлдысты, уый. Ӕз дӕр райдыдтон нуазын, ӕнӕгъдау цард кӕнын ӕмӕ ӕндӕр ахӕм ӕвзӕр хъуыддӕгтӕ кӕнын.

Фӕстӕдӕр цӕрынмӕ ацыдыстӕм мӕ райгуырӕн горӕт Сан-Висентемӕ. Фӕлӕ уым дӕр уыд бирӕ наркомантӕ. Диссаг дӕр никӕмӕ каст, уынгты ӕрыгӕттӕ мардӕй кӕй хуыссынц, уый. Ӕз бацыдтӕн «Ӕрыгон сатанистты» бандӕмӕ. Мах давтам, наркотиктӕ кодтам, клеймӕ ӕмӕ растворительмӕ смыстам. Арӕх-иу ӕмбаргӕ дӕр нӕ бакодтон, хӕдзармӕ куыд ӕрбацыдтӕн, уый. Хатт та-иу уынджы хуыссыдтӕн, ницы ӕмбӕрстон, афтӕмӕй. Ме ’мбӕлттӕй чидӕртӕ ахӕстонмӕ бахаудысты, кӕй давтой кӕнӕ адӕймаджы кӕй амардтой, уый тыххӕй.

Кӕд ахӕм хъуыддӕгтӕ кодтон, уӕддӕр Хуыцауыл ӕууӕндыдтӕн. Цӕмӕй мыл мӕ зӕрдӕ ма худтаид, уый тыххӕй дины ӕгъдӕуттӕ ӕххӕст кодтон, зӕгъӕм, Чырыстийӕн кувӕн къуыри-иу уынгты дзуар куы хастой, уӕд-иу ӕз дӕр ацыдтӕн. Фӕлӕ-иу уый фӕстӕ не ’ппӕт дӕр бӕрӕгбоны фӕдыл  тынг банызтам, суанг Чырыстийы ролы чи хъазыд, уый дӕр.

БИБЛИЙЫ ФӔРЦЫ МӔ ЦАРД ФӔИВТА: 20 азы бӕрц мыл куы цыд, уӕд Йегъовӕйы Ӕвдисӕнтимӕ Библи ахуыр кӕнын райдыдтон. Ӕмбӕрстон, царды мын бӕлвырд нысан кӕй нӕй ӕмӕ дарддӕр афтӕ куы цӕрон, уӕд мӕм хорзӕй кӕй ницы ӕнхъӕлмӕ кӕсы. Тынг мӕм бахъардтой Галатӕгтӕм 6:8 ныхӕстӕ: «Йӕ тӕригъӕдджын буары монцтӕ ӕфсадынӕн чи тауы, уый йӕ тӕригъӕдджын буар ӕркӕндзӕн сӕфтмӕ. Сыгъдӕг уды цы фӕнды, уый чи тауы, уый та сыгъдӕг уд ӕркӕндзӕн ӕнусон цардмӕ». Ацы ныхӕсты фӕрцы бамбӕрстон: кӕд мӕ царды исты хорзӕй фенын фӕнды, уӕд хъуамӕ фӕивон ӕмӕ мӕ фидӕныл хъуыды кӕнон.

Библи куы ахуыр кодтон, уӕд бамбӕрстон, Йегъовӕ удӕгас Хуыцау кӕй у, кӕй мыл тыхсы ӕмӕ цӕттӕ кӕй у мӕ тӕригъӕдтӕ ныххатыр кӕнынмӕ. Бамбӕрстон, мӕ куывдтытӕ мын кӕй хъусы.

Мӕ цард фӕивын ӕмӕ бандӕ ныууадзын, ӕнцон хъуыддаг нӕ уыд. Бандӕтӕ горӕты районтӕ кӕрӕдзийыл кӕй адихтӕ кодтой, уымӕ гӕсгӕ мын иуӕй-иу бынӕтты ацӕуӕн нӕ уыд, кӕд бандӕйы нал уыдтӕн, уӕддӕр. Мӕ раздӕры ӕмбӕлттӕй-иу мӕ ӕмбӕхсын бахъуыд, уымӕн ӕмӕ-иу мӕ агуырдтой, цӕмӕй та мӕ мӕ раздӕры хъуыддӕгтыл бафтыдтаиккой.

Йегъовӕйы Ӕвдисӕнты ӕмбырдтӕм цӕуын куы райдыдтон, уӕд дзы сӕмбӕлдтӕн хӕларзӕрдӕ адӕмыл. Дис кодтон, Хуыцауыл куыд тынг ӕууӕндынц ӕмӕ ӕмбырдты цы ахуыр кӕнынц, уымӕ гӕсгӕ кӕй цӕрынц, ууыл. Тынг хицӕн кодтой, раздӕр цы адӕмы ’хсӕн уыдтӕн, уыдонӕй.

МӔ ЦАРД ФӔХУЫЗДӔР: Ныр дӕс азы дӕн Йегъовӕйы Ӕвдисӕн. Ӕппӕт хъарутӕй архайын, цӕмӕй Библимӕ гӕсгӕ цӕрон, ӕмӕ мын мӕ бинонтӕ аргъ кӕнынц. Уымӕн ӕмӕ зонынц, хорз кусӕг кӕй дӕн, стӕй сӕм мӕ бон у ӕхцайӕ фӕкӕсын дӕр. Мӕ мад дӕр сси Йегъовӕйы Ӕвдисӕн. Мӕ фыд дӕр архайы йӕ цард Библимӕ гӕсгӕ фӕивыныл ӕмӕ кӕд мӕ бинонтӕн сӕ фылдӕр Йегъовӕйӕн нӕ лӕггад кӕнынц, уӕддӕр уынынц, ӕз куыд фӕивтон, уый ӕмӕ сӕ бауырныдта, Библийы фӕрцы адӕймагӕн йӕ бон кӕй у хуыздӕрырдӕм фӕивын.

 

ЙӔ НОМ ЯЁИ НАГАТАНИ

ЦӔУЫ ЙЫЛ 50 АЗЫ

ЦӔРЫ ЯПОНИЙЫ

РАЗДӔР ӔХЦАДЖЫН КУЫСТ КОДТА

Схъомыл дӕн, хӕларзӕрдӕ адӕм кӕм цӕры, ахӕм гыццыл горӕты. Мӕ фыдӕн уыд стыр дукани ӕмӕ йӕм куыста дӕс адӕймаджы. Нӕ хӕдзар дуканимӕ ’ввахс уыди, ӕмӕ-иу мӕ мад ӕмӕ мӕ фыд куысты куы уыдысты, уӕддӕр мӕм афтӕ никуы каст, ӕмӕ иунӕг дӕн.

Ӕртӕ хойӕ ӕз дӕн хистӕр, уымӕ гӕсгӕ мӕ мӕ гыццылӕй фӕстӕмӕ нӕ дуканийы кусын ахуыр кодтой. Смой кодтон хӕрзӕрыгонӕй,  ӕмӕ нын фӕд-фӕдыл ӕртӕ сывӕллоны райгуырд. Мӕ лӕг банчы куыста, фӕлӕ стӕй йӕ куыст ныууагъта ӕмӕ иумӕ кусын райдыдтам. Ӕз райсомӕй изӕрмӕ дуканийы куыстон, мӕ мад та сывӕллӕттӕм каст ӕмӕ хӕдзары куыстытӕ кодта. Фӕлӕ уӕддӕр куысты фӕстӕ нӕ рӕстӕг нӕ бинонтимӕ иумӕ ӕрвыстам.

Иу рӕстӕджы нӕ куыст размӕ нал цыд, ӕмӕ уӕд сфӕнд кодтам стыр фӕндагмӕ ’ввахс дукани бакӕнын ӕмӕ хӕдзары ремонтӕн цыдӕриддӕр хъуыди, уыдӕттӕ уӕй кӕнын. Дукани аразын куы хъуамӕ райдыдтаиккам, уый размӕ бон мӕ фыды ӕвиппайды инсульт ныццавта. Ныхас кӕнын дӕр ын зын уыди ӕмӕ уӕд ног дуканийы хицауӕй мӕн сӕвӕрдта. Мӕ лӕг та нӕ зӕронд дуканийы куыста. Афтӕмӕй нӕ ӕппындӕр ницӕмӕуал ӕвдӕлыд.

Нӕ ног дуканийы куыст тынг хорз цыд. Мӕхицӕй сӕрыстыр уыдтӕн, уымӕн ӕмӕ мын бирӕ ӕнтыст ӕмӕ-иу ӕнафонмӕ дӕр куыстон. Ӕмӕ кӕд мӕ сывӕллӕтты уарзтон, уӕддӕр мӕ хъуыдытӕ ӕрмӕст куыстыл уыдысты. Мӕ лӕгимӕ аныхас кӕнынмӕ дӕр мӕ нал ӕвдӕлд, ныхас кӕнынӕн-иу рӕстӕг куы ссардтам, уӕд та-иу хыл кодтам. Мӕ фӕллад суадзыны тыххӕй-иу алы изӕр дӕр хӕдзарӕй ацыдтӕн, цӕмӕй-иу ме ’мбӕлттӕ ӕмӕ ме ’мкусджытимӕ абадтаин ӕмӕ банызтаин. Мӕ царды куыст, нуӕзт ӕмӕ фынӕй йеддӕмӕ ницыуал уыди. Хъӕздыг уыдтӕн, фӕлӕ ӕнамонд, ӕмӕ афтӕ цӕмӕн уыд, уый не ’мбӕрстон.

БИБЛИЙЫ ФӔРЦЫ МӔ ЦАРД ФӔИВТА: Йегъовӕйы Ӕвдисӕнтимӕ Библи ахуыр кӕнын куы райдыдтон, уӕд мӕ зӕрдӕмӕ тынг бахъардтой Библийӕ ӕртӕ стихы. Матфейы 5:3 цы фыст ис, уый куы бакастӕн, уӕд фӕкуыдтон: «Амондджын сты, ӕнӕ Хуыцауӕй цӕрӕн кӕй нӕй, уый чи ӕмбары, уымӕн ӕмӕ уыдоны у уӕларвон паддзахад». Ацы ныхӕстӕй бамбӕрстон, кӕд хъӕздыг уыдтӕн ӕмӕ мӕ ме ’мкусджытӕ ӕппӕлыдысты, уӕддӕр цардӕй райгонд цӕуылнӕ уыдтӕн, уый. Ӕцӕг амондджын уыдаин, ӕнӕ Хуыцауӕй цӕрӕн кӕй нӕй, уый куы бамбӕрстаин, ӕрмӕстдӕр уӕд.

Японийы цард куы фӕуӕззаудӕр, уӕд уыдтон, ме ’мбӕлттыл куыд ӕххӕст кӕнынц 1 Тимофеймӕ 6:9 ныхӕстӕ: «Кӕй фӕнды, цӕмӕй схъӕздыг уа, уыдон та бахауынц фӕлварӕны ӕмӕ къӕппӕджы, ӕмӕ сӕм фӕзыны, адӕймаджы сӕфтмӕ ӕмӕ мӕлӕтмӕ чи кӕны, бирӕ ахӕм ӕнӕзонд ӕмӕ фыдбылыз фӕндтӕ». Матфейы 6:24 Йесо Чырыстийы ныхӕстӕ, зӕгъгӕ, «уӕ бон нӕу, цӕмӕй Хуыцауы цагъартӕ дӕр уат ӕмӕ Хъӕздыгдзинады цагъартӕ дӕр», куы бакастӕн, уӕд бамбӕрстон, мӕнмӕ кӕй хауынц ӕмӕ сфӕнд кодтон мӕ цард фӕивын.

Бамбӕрстон, мӕ ныййарджытӕ, мӕ лӕг ӕмӕ мӕ сывӕллӕттӕ рохуаты кӕй аззадысты. Стӕй ма уыдтон, ӕвзӕр миниуджытӕ дӕр мӕм кӕй фӕзынд. Ссӕрбӕрзонд дӕн, фӕразондзинад мын нӕ фаг кодта. Уайтагъд-иу амӕсты дӕн. Фыццаг афтӕ хъуыды кодтон, ӕмӕ мӕ бон не суыдзӕн фӕивын ӕмӕ Хуыцауӕн лӕггад кӕнын. Фӕлӕ мӕ сывӕллӕтты тынг уарзтон ӕмӕ уыдтон, Библийы уынаффӕтӕй-иу куы пайда кодтон, уӕд нӕ кӕрӕдзи хуыздӕр кӕй ӕмбӕрстам. Семӕ фылдӕр рӕстӕг ӕрвитын райдыдтон ӕмӕ сӕ Йегъовӕйы Ӕвдисӕнты ӕмбырдтӕм кодтон.

МӔ ЦАРД ФӔХУЫЗДӔР: Ныр амондджын ӕмӕ райгонд дӕн, уымӕн ӕмӕ зонын, адӕймаг цӕмӕн цӕры, уый ӕмӕ мӕ бон у Хуыцауӕн лӕггад кӕнын ӕмӕ, йӕ зӕрдӕмӕ куыд цӕуы, афтӕ цӕрын. Ныр мын сӕйрагдӕр куыст нӕу, фӕлӕ мӕ бинонтӕ, уымӕ гӕсгӕ та мӕхицӕн аргъ кӕнын райдыдтон.

Мӕ мад уыдта, Библимӕ гӕсгӕ кӕй цӕрын, уый фӕрцы хуыздӕрырдӕм кӕй ивын ӕмӕ уый дӕр райдыдта Библи ахуыр кӕнын ӕмӕ сси Йегъовӕйы Ӕвдисӕн. Ӕхсызгон мын у, Хуыцауӕн кӕй лӕггад кӕнӕм, уый тыххӕй мӕ фыд ӕмӕ мӕ лӕг нӕ ныхмӕ кӕй не сты, уый. Мӕ сывӕллӕттимӕ кӕрӕдзи хуыздӕр ӕмбарын райдыдтам, фенгомдӕр стӕм ӕмӕ ныр мӕ бинонтимӕ ӕцӕг амондджын дӕн.

 

ЙӔ НОМ МИХАИЛ ЗУЕВ

ЦӔУЫ ЙЫЛ 51 АЗЫ

ЦӔРЫ УӔРӔСЕЙЫ

РАЗДӔР СУСӔГӔЙ ХӔЦӔНГАРЗ УӔЙ КОДТА

Мӕ райгуырӕн горӕт Красногорскы ӕрдз тынг рӕсугъд у. Ис дзы цӕугӕдон Мӕскуы. Ныгуылӕн ӕмӕ цӕгатырдыгӕй фӕсгорӕт бӕлӕстӕй нал зыны.

Ӕрыгонӕй уарзтон хыл кӕнын ӕмӕ хӕцӕнгарзӕй хъазын. Тынг бирӕ рӕстӕг мын цыд тренировкӕтыл. Стӕй ма арӕзтон хӕцӕнгарз, гилдзытӕ ӕмӕ кӕрдтӕ. Рӕстӕг рацыд, ӕмӕ уый сси мӕ куыст. Алцыдӕр хорз спълан кодтон ӕмӕ фыдгӕнджытӕн хӕцӕнгарз уӕй кодтон ӕмӕ мӕ куыст хорз цыди.

БИБЛИЙЫ ФӔРЦЫ МӔ ЦАРД ФӔИВТА: 1990 азты райдиан сӕмбӕлдтӕн Йегъовӕйы Ӕвдисӕнтыл, фӕлӕ сӕ ныхӕстыл нӕ баууӕндыдтӕн. Ӕгӕр бирӕ фарстатӕ мӕм лӕвӕрдтой.

Иу бон мын сӕ иу бакаст Ромӕгтӕм 14:12: «Хуыцауы раз алчидӕр йӕхи тыххӕй дзуапп ратдзӕн». Ӕмӕ ахъуыды кодтон, ӕз та Хуыцауӕн цы дзуапп ратдзынӕн, ууыл. Уыцы ныхӕсты фӕстӕ мӕ бафӕндыд базонын, Хуыцау мӕ цы домы, уый.

Зӕрдиагӕй архайдтон Библийы Колоссӕгтӕм 3:5–10 ныхӕстӕм гӕсгӕ: «Амарут уӕ зӕххон буары фӕндтӕ: хӕтындзинад, чъизи митӕ, монцӕй судзын, фыдбылыз фӕндтӕ, стӕй уӕд зыд, уымӕн ӕмӕ зыд кӕнын у мӕнгхуыцауӕн кувын. Уыдӕтты тыххӕй адӕмыл Хуыцау йӕ маст ныккалдзӕн... Ныр ныууадзут ӕппӕт уыдӕттӕ: фыдӕх, маст, ӕвзӕрдзинад ӕмӕ ӕфхӕрӕн ныхас, ӕмӕ уӕ дзыхӕй иу ӕнӕфсарм ныхас дӕр макуы схауӕд. Кӕрӕдзийы ма сайут. Зӕронд адӕймаджы удыхъӕд йӕ митимӕ ныууадзут ӕмӕ уӕ удыхъӕд ногмӕ раивут».

Тынг зын мын уыд мӕ цард фӕивын. Мӕ раздӕры ӕмбӕлттӕ мын хӕцӕнгарз уӕй кӕнын кодтой, стӕй мӕ бон нӕ уыд мӕхиуыл фӕхӕцын, исчи-иу мӕ куы ’фхӕрдта, уӕд. Фӕлӕ уӕддӕр фесӕфтон, цыдӕриддӕр мӕм хӕцӕнгарз уыд, уый. Хуыцау ӕмӕ мӕ йӕ Фырт куыд уарзынц, уый куы базыдтон, уӕд мӕн дӕр бафӕндыд мӕ уарзондзинад равдисын. Ӕз дарддӕр фӕндфидарӕй ахуыр кодтон Библи, ӕмбырдтӕм цыдтӕн ӕмӕ Хуыцауӕй ӕххуыс куырдтон.

МӔ ЦАРД ФӔХУЫЗДӔР: Сабыргай-сабыргай, стыр фыдӕбонимӕ ӕмӕ мӕ чырыстон ӕфсымӕрты ӕххуысӕй мӕ удыхъӕд хуыздӕрырдӕм ивтон. Стыр циндзинад мын хӕссы, Йегъовӕ Хуыцау алы адӕймагыл дӕр кӕй тыхсы, суанг чи амард, уыдоны дӕр кӕй райгас кӕндзӕн (Ап. хъ. 24:15). Ӕз уарзын хуымӕтӕг ӕмӕ зӕрдӕхӕлар адӕмы, ӕмӕ ахӕм миниуджытӕ федтон Йегъовӕйы Ӕвдисӕнты ’хсӕн. Стыр бузныг сӕ дӕн, зӕрдиагӕй мыл кӕй тыхстысты ӕмӕ Хуыцауыл иузӕрдион кӕй сты, уый тыххӕй.

Мӕ бинонтӕ ӕмӕ ме ’мбӕлттӕй иуӕй-иутӕ фыццаг мӕ ног дины ныхмӕ уыдысты. Фӕлӕ стӕй ӕрсабыр сты ӕмӕ бамбӕрстой, хуыздӕр кӕй у, цӕмӕй Хуыцауыл ӕууӕндон ӕмӕ мын фыдгӕнджытимӕ иумӕйагӕй мацы уа. Амондджын дӕн, мӕ цард хӕцӕнгарзимӕ баст кӕй нал у ӕмӕ адӕмӕн кӕй ӕххуыс кӕнын фарнуарзаг Хуыцауы тыххӕй базонынӕн.

[Ныв 27 фарсыл]

Дины ӕгъдӕуттӕ ӕххӕст кодтон, цӕмӕй мыл мӕ зӕрдӕ ма худтаид

[Ныв 28 фарсыл]

Хъӕздыг уыдтӕн, фӕлӕ мӕ цардӕй мӕ зӕрдӕ нӕ рухс кодта