«Мӕ зынаргъ Ракел.

Стыр бузныг дын, тынг мӕ бафидар кодтай. Дӕхӕдӕг ӕй, ӕвӕццӕгӕн, ӕмбаргӕ дӕр нӕ кӕныс, цы диссаджы адӕймаг дӕ ӕмӕ мын дӕ ныхӕстӕ куыд тынг баххуыс кодтой, уый». Дженифер

ИСКУЫ дӕм исчи ӕнӕнхъӕлӕджы бузныджы ныхӕстӕ ныффыста? Ӕхсызгон дын куыннӕ уыдаид. Алы адӕймаджы дӕр фӕнды, цӕмӕй йын аргъ кӕной ӕмӕ дзы бузныг уой (Матфейы 25:19–23).

Адӕм кӕрӕдзийӕн бузныг куы фӕдзурынц, уӕд ӕнгомдӕр кӕнынц. Уымӕй уӕлдай, иннӕтӕй бузныг чи у, уый фӕзмы Йесо Чырыстийы. Хорз хъуыддаг-иу чи сарӕзта, уыдоны-иу алкӕддӕр бафиппайдта (Марчы 14:3–9; Лукайы 21:1–4).

Хъыгагӕн, абон адӕм кӕрӕдзийӕн бузныг нӕдӕр дзургӕ кӕнынц, нӕдӕр фысгӕ. Библийы фыст ис, зӕгъгӕ, «фӕстаг бонты» адӕм «хорздзинадӕн аргъ кӕнын нӕ зондзысты» (2 Тимофеймӕ 3:1, 2). Ацы дунейы адӕм ӕбузныг кӕй сты, уымӕ гӕсгӕ хъуамӕ лӕмбынӕг уӕм, цӕмӕй мах дӕр уыдоны хуызӕн ма суӕм.

Ныййарджыты бон куыд у сӕ сывӕллӕтты ахуыр кӕнын, цӕмӕй бузныг уой? Кӕмӕй хъуамӕ уӕм бузныг? Ӕмӕ кӕд адӕм нӕ алыварс хорздзинадӕн нал аргъ кӕнынц, уӕддӕр мах уыдоны хуызӕн цӕуылнӕ хъуамӕ уӕм?

Бинонты ’хсӕн

Ныййарджытӕ бирӕ фыдӕбон кӕнынц, цӕмӕй сӕ сывӕллӕттӕ мацы цух ӕййафой. Фӕлӕ сӕм иуӕй-иу хатт афтӕ фӕкӕсы, ӕмӕ сын сӕ фыдӕбонӕн нӕ аргъ кӕнынц. Цы бакӕнӕн ис ахӕм уавӕры. Баххуыс нын кӕндзӕн ӕртӕ хъуыддаджы.

1) Фӕзминаг у. Сывӕллӕтты хъомыл кӕнынӕн ӕппӕты хуыздӕр мадзал у ныййарджыты цӕвиттон. Библийы фыст ис, рагон Израилы мады фыдӕбонмӕ цы цӕстӕй кастысты, уый тыххӕй: «Йӕ фырттӕ йӕ разы сыстынц ӕмӕ йӕ схонынц амондджын», ома йын бузныг фӕзӕгъынц. Цымӕ уыцы сывӕллӕттӕ бузныг дзурын кӕм сахуыр сты? Дзуапп фыст ис ацы стихы дыккаг хайы: «Сысты йӕ сӕрыхицау ӕмӕ дзы раппӕлы» (Ӕмбисӕндтӕ 31:28). Лӕг ӕмӕ ус кӕрӕдзийӕн бузныг куы фӕдзурынц, уӕд сывӕллӕттӕ фӕуынынц, бузныг кӕмӕн дзурынц, уымӕн ӕхсызгон кӕй вӕййы, бинонтӕ ӕнгомдӕр кӕй кӕнынц ӕмӕ уый ӕмбаргӕ адӕймаджы миниуӕг кӕй у.

Иу нӕлгоймаг, Стивен, загъта: «Архайдтон, цӕмӕй мӕ сывӕллӕттӕн фӕзминаг уыдаин, ӕмӕ мӕ цардӕмбалӕн хӕрды фӕстӕ алыхатт дӕр бузныг дзырдтон». Куыд фӕзынд уый йӕ сывӕллӕттыл? «Мӕ дыууӕ чызджы уый уыдтой, ӕмӕ сын уый баххуыс кодта, цӕмӕй бузныг дзурын сахуыр уыдаиккой»,– загъта Стивен. Кӕд дын бинонтӕ ис, уӕд дӕ цардӕмбалӕн ӕппынӕдзух бузныг фӕдзурыс, гыццыл хъуыддӕгты тыххӕй дӕр? Дӕ сывӕллӕттӕ, сӕ хӕс цы у, уый куы бакӕнынц, уӕд дӕр сын бузныг фӕдзурыс?

2) Ахуыр сӕ кӕн. Цӕмӕй адӕймаг хорздзинадӕн аргъ кӕна, уый тыххӕй йӕ хъӕуы уыцы миниуӕгыл кусын. Уыцы миниуӕг дидинӕгӕй уӕлдай нӕу: цӕмӕй хорз рӕза, уый тыххӕй  йӕм хъӕуы зилын. Ныййарджыты бон куыд у сӕ сывӕллӕтты ахуыр кӕнын, цӕмӕй хорздзинадӕн аргъ кӕной ӕмӕ бузныг дзурой? Зондджын паддзах Соломон бамбарын кодта, ацы хъуыддаджы сӕйрагдӕр цы у, уый: «Рӕстгӕнӕджы зӕрдӕ дзуапп раттыны размӕ ахъуыды кӕны» (Ӕмбисӕндтӕ 15:28).

Ныййарджытӕ, уӕ бон куыд у уӕ сывӕллӕтты афтӕ ахуыр кӕнын, цӕмӕй иннӕты лӕвӕрттӕн аргъ кӕной ӕмӕ ӕмбарой, уыцы лӕварыл фыдӕбон кӕнын кӕй хъуыд ӕмӕ уый адӕймагӕн йӕ рӕдаудзинадыл дзурӕг кӕй у? Дидинӕг хорз зӕххы фӕрцы куыд рӕзы, афтӕ уӕ сывӕллӕттӕ дӕр хорздзинадӕн аргъ кӕнын зондзысты, уыдӕттыл хъуыды кӕнын куы сахуыр уой, уӕд. Ӕртӕ сывӕллоны чи схъомыл кодта, уыцы сылгоймаг, Марийӕ, зӕгъы: «Рӕстӕг хъӕуы, цӕмӕй дӕ сывӕллӕттимӕ ӕрбадай ӕмӕ сын бамбарын кӕнай, исчи сын исты куы балӕвар кӕны, уӕд уый цӕуыл дзурӕг у, уый: уыцы адӕймаг дыл хъуыды кӕны, фӕнды йӕ, куыд бирӕ дӕ уарзы, уый равдисын. Мӕнмӕ гӕсгӕ, уыдӕттӕ сын кӕй амыдтон, уый дзӕгъӕлы нӕ уыд». Нӕ сывӕллӕттимӕ афтӕ куы ныхас кӕнӕм, уӕд сын лӕвар чи скодта, уымӕн цы зӕгъой, ӕрмӕст уый нӕ зондзысты, фӕлӕ ма йын бузныг цӕмӕн хъуамӕ зӕгъой, уый дӕр ӕмбардзысты.

Хорз ныййарджытӕ сӕ сывӕллӕттӕн фембарын кӕнынц, иннӕтӕн сӕ хӕс кӕй нӕу, цӕмӕй сын лӕвӕрттӕ кӕной *. Ӕмбисӕндты 29:21 фыст ис, цагъартӕм цы цӕстӕй кӕсын хъуыд, уый, ӕмӕ уыцы ныхӕстӕ сывӕллӕттӕм дӕр хауынц: «Цагъары йӕ гыццылӕй буцахуыр куы скӕнай, уӕд стырӕй хорздзинадӕн аргъ кӕнын нӕ зондзӕн».

Куыд ис гыццыл сывӕллӕтты ахуыр кӕнӕн, цӕмӕй хорздзинадӕн аргъ кӕной? Ӕртӕ сывӕллоны мад, Линдӕ, загъта: «Мӕ цардӕмбалимӕ-иу искӕмӕн открыткӕ бузныджы ныхӕстимӕ куы фыстам, уӕд-иу нӕ сывӕллӕттӕн загътам, цӕмӕй-иу дзы исты сныв кодтаиккой кӕнӕ та-иу дзы сӕ ном ныффыстаиккой». Кӕй зӕгъын ӕй хъӕуы, ныв хуымӕтӕг уыдзӕн, сӕ фыстытӕ та – зынкӕсӕн, фӕлӕ уӕддӕр сывӕллӕттӕ ахуыр кӕндзысты ахсджиаг хъуыддагыл.

3) Ӕппынӕдзух архай. Ӕнӕххӕст кӕй стӕм, уымӕ гӕсгӕ хиуарзон стӕм ӕмӕ нын зын у хорздзинадӕн аргъ кӕнын (Райдиан 8:21; Матфейы 15:19). Фӕлӕ Библи Хуыцауы лӕггадгӕнджытӕн зӕгъы: «Уӕ зонд уын цы тых разӕнгард кӕны, уый [ног кӕнут], ӕмӕ уӕ удыхъӕд ногмӕ... раивут – уыцы удыхъӕд та конд у Хуыцауы фӕндонмӕ гӕсгӕ» (Ефесӕгтӕм 4:23, 24).

Фӕлӕ фӕлтӕрдджын ныййарджытӕ зонынц: сывӕллӕттӕн сӕ удыхъӕд ногмӕ раивынӕн баххуыс кӕнын, зӕгъын куыд ӕнцон у, йӕ саразын афтӕ нӕу. Уӕлдӕр цы Стивены кой кодтам, уый зӕгъы: «Афтӕ нӕм каст, ӕмӕ цалынмӕ нӕ чызджытӕ сӕхи зондӕй сахуыр уой бузныг дзурын, уӕдмӕ бирӕ рӕстӕг рацӕудзӕн». Фӕлӕ Стивен ӕмӕ йӕ бинойнагӕн сӕ ныфс нӕ асаст. «Ӕппынӕдзух сын амыдтам, ӕмӕ сахуыр сты,– зӕгъы Стивен.– Ныр нӕ сывӕллӕттӕ искӕмӕн бузныг куы фӕдзурынц, уӕд нын афтӕ ӕхсызгон вӕййы, ӕмӕ диссаг».

Не ’мбӕлттӕн ӕмӕ нӕ сыхӕгтӕн бузныг дзурӕм

Адӕймагӕн бузныг куы нӕ фӕзӕгъӕм, уӕд уый, чи зоны, уый тыххӕй нӕ вӕййы, ӕмӕ йын йӕ хорздзинадӕн нӕ аргъ кӕнӕм, фӕлӕ нӕ ферох вӕййы. Цымӕ ӕцӕгдӕр ахсджиаг у иннӕтӕн бузныг дзурын? Цӕмӕй ацы фарстайӕн дзуапп базонӕм, уый тыххӕй ӕркӕсӕм, Йесо Чырысти хъотырджынты куы сдзӕбӕх кодта, уыцы хабармӕ.

Чырысти Иерусалиммӕ куы фӕцӕйцыд, уӕд фӕндагыл фембӕлд дӕс хъотырджын лӕгыл. Библийы фыст ис: «[Уыдон ӕм] хъӕр кодтой: „Йесо, Ахуыргӕнӕг, батӕригъӕд нын кӕн!“ Куы сӕ федта, уӕд сын загъта: „Ацӕут ӕмӕ уӕхи сауджынтӕн фенын кӕнут“. Ӕмӕ куы фӕцӕйцыдысты, уӕд сӕ низ ӕрбайсӕфт. Сӕ иу уый куы федта, ӕмӕ сдзӕбӕх, уӕд фӕстӕмӕ раздӕхт, Хуыцауы хъӕрӕй кадджын кӕнгӕйӕ. Ӕмӕ Йесойы къӕхтӕм ӕрхауд ӕмӕ йын арфӕтӕ кодта. Уыцы лӕг та уыд самариаг» (Лукайы 17:11–16).

Цымӕ иннӕтӕ бузныг кӕй нӕ загътой, уый Чырысти нӕ бафиппайдта? Библийы дарддӕр кӕсӕм: «Уӕд Йесо загъта: „Дӕс адӕймаджы не сдзӕбӕх сты? Уӕд иннӕ фараст кӕм сты? Ацы ӕндӕрбӕстаджы йеддӕмӕ куыд ничи раздӕхт  ӕмӕ Хуыцауы куыд ничи скадджын кодта?“» (Лукайы 17:17, 18).

Уыцы фараст хъотырджыны ӕвзӕр адӕм нӕ уыдысты. Гыццыл раздӕр уыдон Чырыстийыл баууӕндыдысты ӕмӕ сын цы загъта, уымӕ байхъуыстой ӕмӕ Иерусалиммӕ ацыдысты, цӕмӕй сауджынтӕн сӕхи фенын кодтаиккой. Кӕй зӕгъын ӕй хъӕуы, Йесо сын цы хорздзинад сарӕзта, уымӕн саргъ кодтой, фӕлӕ йын йӕхицӕн бузныг нӕ загътой ӕмӕ йын уый хъыг уыди. Махӕй та цы зӕгъӕн ис? Исчи нын исты хорздзинад куы ракӕны, уӕд ын бузныг фӕзӕгъӕм, ӕмӕ фадат куы вӕййы, уыд ын писмо ныффыссӕм?

Библийы фыст ис, зӕгъгӕ, уарзондзинад, «чи не ’мбӕлы, ахӕм митӕ нӕ кӕны, йӕхицӕн куыд хуыздӕр уа, ууыл нӕ хъуыды кӕны» (1 Коринфӕгтӕм 13:5). Уӕдӕ бузныг зӕгъын, ӕрмӕст уӕздандзинадыл дзурӕг нӕу, фӕлӕ ма уарзондзинадыл дӕр. Мах фӕнды Чырыстийы зӕрдӕ рухс кӕнын, ӕмӕ уымӕ гӕсгӕ хъотырджынты хабарӕй ууыл ахуыр кӕнӕм, ӕмӕ хъуамӕ алкӕйдӕр уарзӕм ӕмӕ алкӕмӕн дӕр аргъ кӕнӕм, цыфӕнды адӕмыхаттӕй кӕнӕ динӕй ма уой, уӕддӕр.

Ахъуыды-ма кӕн: «Фӕстаг хатт бузныг кӕд загътон мӕ сыхагӕн, ме ’мкусӕгӕн, ме ’мкъласагӕн, дохтырӕн, дуканигӕсӕн кӕнӕ мын исты хорздзинад чи сарӕзта, уымӕн?» Хорз нӕ уаид, иу кӕнӕ дыууӕ боны дӕргъы гӕххӕттыл куы фынысан кӕнис, ныхасӕй кӕнӕ ӕндӕр хуызы бузныг цал хатты загътай, уый? Уый дын баххуыс кӕндзӕн, цӕмӕй уыцы миниуӕг фӕхуыздӕр кӕнай.

Фыццаджыдӕр бузныг хъуамӕ дзурӕм Йегъовӕ Хуыцауӕн. Хуыцау нын дӕтты, «хорзӕй цыдӕриддӕр ис, уый дӕр ӕмӕ алы ӕнӕфау лӕвар дӕр» (Иаковы 1:17). Фӕстаг хатт Хуыцауӕн зӕрдӕбынӕй бузныг кӕд загътай, цыдӕр хъуыддаджы дын кӕй баххуыс кодта, уый тыххӕй? (1 Фессалоникӕгтӕм 5:17, 18).

Адӕм нын нӕ хорздзинадӕн куы нӕ аргъ кӕной, уӕддӕр бузныг цӕмӕн хъуамӕ уӕм?

Иннӕтӕ нын, чи зоны, нӕ хорздзинадӕн нӕ аргъ кӕнынц. Уӕдӕ сын мах бузныг цӕмӕн хъуамӕ дзурӕм? Иу хъуыддагыл ма ахъуыды кӕнӕм.

Адӕмӕн нӕ хорздзинад бӕсты куы нӕ цӕуа, уӕддӕр сын хъуамӕ хорздзинад аразӕм, уымӕн ӕмӕ афтӕмӕй фӕзмӕм нӕ цӕстуарзон Сфӕлдисӕг Йегъовӕйы. Бирӕтӕ Йегъовӕйы уарзондзинадӕн нӕ аргъ кӕнынц, фӕлӕ сын уый уӕддӕр хорздзинад аразы (Ромӕгтӕм 5:8; 1 Иоанны 4:9, 10). «Йӕ хур скӕсын кӕны ӕвзӕртыл дӕр ӕмӕ хӕрзтыл дӕр, ӕмӕ къӕвда дӕр ратты рӕстгӕнджытӕн дӕр ӕмӕ фыдгӕнджытӕн дӕр». Мах дӕр ацы ӕбузныг дунейы хорздзинадӕн куы аргъ кӕнӕм ӕмӕ бузныг куы дзурӕм, «уӕд ӕцӕгдӕр уыдзыстӕм нӕ уӕларвон Фыды фырттӕ» (Матфейы 5:45).

[Фиппаинаг]

[Хицӕнгонд текст 23 фарсыл]

Иу кӕнӕ дыууӕ боны дӕргъы гӕххӕттыл нысан кӕн, ныхасӕй кӕнӕ ӕндӕр хуызы бузныг цал хатты загътай, уый

[Ныв 23 фарсыл]

Уӕ сывӕллӕттӕн фӕзминаг ут, бузныг кӕй дзурут, уымӕй

[Ныв 23 фарсыл]

Гыццыл сывӕллӕтты дӕр ахуыр кӕнӕн ис хорздзинадӕн аргъ кӕнын