1. Ngera el merael a chisel el nglunguuch a bo dosaod er ngii?

TE BETOK el miliol el chad el meliuekl er a beluulechad a medengelii sel nglunguuch el lomekedong er ngii el kmo, Delal a Nglunguuch el ngii a lebilecherei a Jesus el kerebai el kired. Tiang a kmal klou a belkul el nglunguuch, me a omesodel aike el kot el edei el tekoi el mildung a mo ngosukau el mo medengei a betok el kirel aike el mera el lolisechakl a Biblia.

2. A Jesus ngullisechakl er a redisaiplo er ngii el mo meluluuch el kirel a ngera el edei el tekoi?

² Ngar er a uchelel tia el nglunguuch, e a Jesus a dilu er a rulerrenges er ngii el kmo: “Ng ua tiakid cho moluluuch: ‘Demmam el ngar a eanged: Bo le modanges a chedaol ngklem; a Rengedem le mei; bo le motaut a soam er a beluulchad el ua ingii er a eanged.’” (Mateus 6:9-13) Ngua ngera klungel a ultutelel aika el edei el tekoi el ngar tia el nglunguuch?

3. Ngera kired el mo medengei el kirel a Rengedel a Dios?

³ Ngkmal betok a bla desuub el kirel a ngklel a Dios el Jehovah. Kede dirrek el mla mesaod er a moktek  er ngii, el aike el bla el rruul me aike el dirk bo loruul el kirel a klechad. Engdi a Jesus ngmillekoi el kirel a ngerang er a ledu er kid me doluluuch el kmo: “A Rengedem le mei”? Ngerang a Rengedel a Dios? E mekera bo longebkall me a lechub e longedaol er a ngklel a Dios sel lemei? Tia el Renged a lemei, ngngera deleuill er ngii me a moktek er a Dios?

4. Ngerang a Rengedel a Dios, e techa King er ngii?

⁴ A Rengedel a Dios a kabelment el kiltmeklii a Jehovah el Dios, e a king er ngii a bla el ngiltii a Dios. Me ngtecha King er a Rengedel a Dios? Ng Jesus Kristus. Ng King el okedongall el “Rubak er a re rubak e King er a re king” me ngngarbab er a rokui el chad el mengedereder. (Ocholt 17:14) Ngar er ngii a klisichel el mo meruul a lmuut el betok el ungil el tekoi. Ngngar er a uchei er a ngii di el chad el mla mengedereder.

5. Ngar er ker a Rengedel a Dios? Ngmo mengedereder er a ngerang?

⁵ A Rengedel a Dios ngmo mengedereder el ngar er ker? A kot, e ngar er ker a Jesus? Ke locha dirk medengei el kmo te milekodir er a teluo el kerrekar, engdi ngliluut el mekiis er a kodall. Telkib el taem er a uriul, e ngmlo er a demal er a eanged. (Rellir 2:33) Me a leuaisei, e a Rengedel a Dios a ngar er a eanged. Sei a uchul me a Biblia a kmo ng “rengedel el ngara eanged.” (2 Timothy 4:18, BT) Me alta ngngar er a eanged, engdi ngmo mengedereder er a beluulechad.​—Monguiu er a Ocholt 11:15.

6, 7. Ngera rullii a Jesus el kmal ungil el King?

⁶ Ngera rullii a Jesus el kmal ungil el King? A kot, e ngdiak el mad. Me a Biblia a lomekesiu er a Jesus me a  rechad el king, e ngmelekoi el kmo, a klengar er ngii a “diak bo le metemall.” (Hebru 7:16) Tia belkul a kmo, aike el rokui el ungil el tekoi el bo loruul a di ngar er ngii el mo cherechar. E ngii a mo meruul a meklou e ungil el tekoi.

⁷ Ka molatk er tia el ulaoch er a Biblia el kirel a Jesus el kmo: “A klisichel a RUBAK a mo msa llomeserreng, ma klemedengei, ma duch el mo mengedereder er a re chedal. Ng mo medengelii a soal a RUBAK e mo meluu er ngii, e mo metik er a deurreng el ngar omesiungel. Ng diak bo loukerrekeriil el okiu a ikel le ues ma ikel le renges; ng mo melemalt el oukerrekeriil er a re mechebuul, e mesebechakl a llemeltir a re ngariou a rengrir.” (Isaia 11:2-4) Aika el tekoi a ochotii el kmo, a Jesus a mo melemalt e chubechub el King el mo mengedereder er a rechad el ngar er a beluulechad. Kau ngdiak el soam el mo chederedall er a uaisei el king?

8. Te rua techang a mo mengedereder el obengkel a Jesus?

⁸ A ta er a klemerang el kirel a Rengedel a Dios a kmo: A Jesus a mo er ngii a rechad el mo obengkel el mengedereder. El di uai tiang, a apostol el Paulus a dilu er a Timothy el kmo: “A lsekum kede mukduch a rengud, e kede dirrek el mo mengedereder lobengkel.” (2 Timothy 2:12) Nguaisei, a Paulus me a Timothy me a rebebil er a reblak a rengrir el chad el lullilt er tir a Dios a mo mengedereder el obengkel a Jesus el ngar er a Renged el ngar er a eanged. Te tela el chad a mo nguu tia el techall?

9. Te telang a mo mengedereder el obengkel a Jesus, e oingerang e a Dios a ulemuchel el melilt er tir?

⁹ Ngdi ua aike el ulebeketakl er a 7 el Bliongel, a apostol el Johanes a milsa ues el kirel a “Ngelekel a Sib  [el Jesus Kristus] el dechor er a Rois Sion [el ngii a deruchellel er a omengedereder el ngar er a eanged]; te mlar ngii a re 144,000 el chad el ulebengkel el mle llechukl a ngklel ma ngklel a Demal er a medal a bderrir.” Me te rua techang tirka el 144,000? A Johanes a kmo: “Toltirakl er a Ngelekel a Sib el mor a ikel le bor ngii. Te mla mengubet e tuobed er a chelsir a rokui el chad er a beluulchad e tir ia kot el mo modars el mor a Dios me a Ngelekel a Sib.” (Ocholt 14:1, 4) Me tirka tirke el blak a rengrir el oltirakl er a Jesus Kristus el mlengilt el mo mengedereder el obengkel el ngar er a eanged. Me a uriul er a lebekiis er a kodall el mo ngmai a klengar er tir er a eanged, e “te mo mengedereder ra belulechad” el obengkel a Jesus. (Ocholt 5:10, BT) Me ngulemuchel er a taem er a rechapostol el mei, e a Dios a melilt er a reblak a rengrir el Kristiano el mo ta er tirka el 144,000.

10. Ngera me ngolechotel a bltkil a rengul a Dios a bo longedereder er a klechad a Jesus me a re 144,000?

¹⁰ Ngklou el bltkil a rengul a Dios a mlocholt er a lerellii a Jesus me a re 144,000 el mo mengedereder er a klechad. E le kot, e a Jesus a ungil el medengei el kmo, ngua ngerang a chelitechetul me a rengelel a klechad. A Paulus a millekoi el kirel a Jesus el kmo: “A Ngarbab el Prist er kid a diak di le tar a chad el diak lolechesiu a chelitechetud. A Ngarbab el Prist er kid a mlor ngii a rokui el ongarm el ua ikid, e ngdi dimlak le bor a klengit.” (Hebru 4:15; 5:8) Me tirke el mo obengkel el mengedereder me te chilarm er a rengelel a klechad e uluutekangel. Te dirrek el chilarm er a diak el cherrungel el klengar, e mle kirir el outekangel a bek el bedengel a secher. Me te kmal ungil el medengei aike el mondai el lechelebangel a rechad!

11. Ngera uchul me a Jesus a dilu er a redisaiplo er ngii el kmo, ngkirir el meluluuch el kirel a soal a Dios me ngmo meketmokl er a eanged?

¹¹ A Jesus er a ledu el kmo, a redisaiplo er ngii a kirir el meluluuch el olengit er a Rengedel a Dios me lemei, e ngdirrek el dilu er tir me lolengit me lemeruul a soal a Dios er tia el “beluulchad el ua ingii er a eanged.” A Dios a ngar er a eanged, me a reblak a rengrir el anghel er ngii a mengetmokl a soal er a eanged. Ngar er a 3 el Bliongel, e kede milsuub el kirel a mekngit el anghel el mlo diak loruul a soal a Dios e chiltikikii a Adam me a Eva el mo er a klengit. Ngar er a 10 el Bliongel, e kede mo mesuub aike el lolisechakl a Biblia el kirel ngika el mekngit el anghel el Satan el Diabelong. A Satan me a rebebil er a rechanghel el millilt el mo oltirakl er ngii a lebilechititerir me te kiei er a eanged el telkib el taem. Me ngdimlak el rokui el ngar er a eanged a mirruul a soal a Dios. Engdi, tia el blekeradel a mo mengodech sel bo lomuchel el mengedereder a Rengedel a Dios. Ngike el mo king, el Jesus Kristus, a mo oumekemad er a Satan.​—Monguiu er a Ocholt 12:7-9.

12. Ngera el eru el meklou a ultutelel el tekoi el dilubech a losaod a Ocholt 12:10?

¹² A ulaoch a mesaod aike el mo duubech el kmo: “E sola e ak rirengesii a klou el ngor el ngar a eanged el kmo, ‘A Osobel er a Dios a mla mei! A Dios a mla ochotii er a klisichel el kmo ng King! A Mesias er ngii a chemota klisichel er omerreder! Ele ngikel dilechor er medal a Dios er kid e uleltutakl er a re bebil er kid [el Satan] er a llomes ma klebesei a mla modik  er a eanged.’” (Ocholt 12:10) Ke miltab aike el teblo el meklou a ultutelel el tekoi el losaod tia el bades? A kot, e a Rengedel a Dios el ngar er a cheungel a Jesus Kristus a omuchel el mengedereder. E a ongerung, e a Satan a obidokl er a eanged el mei er a chutem.

13. Me a Satan er a lemodik er a eanged e ngera mlo rsel?

¹³ Ngera mlo rsel aika el eru el meklou a ultutelel el tekoi el dilubech? Kede menguiu el kmo: “Me bo ledeu a rengmiu, kemiu el eanged me kemiu el rokui el kiei er ngii!” (Ocholt 12:12) Me nguaisei, a reblak a rengrir el anghel a oldeu a rengrir e le Satan me a remekngit el anghel er ngii a mla mo diak el ngar er a eanged. Me tirke el rokui el ngar er a eanged a blak a rengrir el mo er a Jehovah, el ngar er a cherrungel el budech me a kltarreng. Me a soal a Dios a merella er a eanged.

14. Ngera dilubech e le Satan el mlodik el mei er a chutem?

¹⁴ E kuk mekera el kirel tia el chutem? A Biblia a kmo: “Ngdi ng kmal chebuul e beluulchad ma daob! Ele Diabelong a mla metengel el ekor kemiu e blekall er a klsiberreng, ele ng medengei el kmo ng di kedeb ku temel.” (Ocholt 12:12) A Satan a kesib a rengul e le ngmla modik er a eanged e medengei el kmo, ngkmal kedeb a temel el medechel. Me ngoba ngasecherreng e omuchel a uldikel, me a lechub e ng ‘chelebuul’ er tia el chutem. Kede mo mesuub a betok el kirel aika el ‘chelebuul’ er a ongingil el bliongel. Me sel dolatk er tiang, e kede mo oker el kmo, Ngmekera Rengedel a Dios e mo kutmeklii a moktek er a Dios el ngar er tia el chutem?

15. Ngera moktek er a Dios el kirel tia el chutem?

¹⁵ Ka molatk er a moktek er a Dios el kirel tia el chutem el msilubii er a 3 el Bliongel. Ngar er a Eden, e a Dios a ulechotii el kmo, ngmle soal tia el chutem a  bo el baradis el mui er a rechad el tir a melemalt el diak bo el mad. Me alta e a Satan a chiltikikii a Adam me a Eva el mo er a klengit, engdi tia dimlak el ngedechii a otutel a moktek er a Dios. Ngdirk telbilel a Jehovah el soal ‘a re melemalt a bo el ungilbesrir el kiei er a chelsel a beluu e mo oubeluu er ngii el di blechoel.’ (Psalm 37:29) E a Rengedel a Dios a mo kutmeklii tiang. El oeak a ngera el rolel?

16, 17. Ngera ngouchais a Daniel 2:44 el kirel a Rengedel a Dios?

¹⁶ Ka molatk er a ulaoch el ngar er a Daniel 2:44 el kmo: “Me sel taem el lorreder tirkel king, e a Dios el ngar a eanged a mo toketekii a rengedel el mo diak a ulebengelel. Misel renged a diak a sebechel el mo mesisiich er ngii, e ng bai mo okngemed a ikel bebil er a renged el rokui e sola e ngii a mo medechel el mo cherechar.” Tia ngera ngouchais er kid el kirel a Rengedel a Dios?

¹⁷ A kot, e a Rengedel a Dios a mo meketmokl er “sel taem el lorreder tirkel king” me a lechub e ngsel taem el dirk ngar er ngii a renged el mengedereder. Ongerung, e tia el Renged a mo diak a ulebengelel. Ngdiak a mo mesisiich er ngii me a ka bo el mutechei er a kuk ngodech el kabelment. Ongedei, e ngmo er ngii a mekemad er a delongelel a Rengedel a Dios me a renged er tia el beluulechad, e a Rengedel a Dios a mo mesisiich. E a ulebongel, e ngdi mo ta el Rengedel a Dios a kabelment el mengedereder er a klechad. Me a rechad a mo chederedall er a kot el ungil el omengedereder el sebechel el mo er ngii.

18. Ngera ngklel sel ulebongel el mekemad el mo er ngii er a delongelel a Rengedel a Dios me a kabelment er tia el chutem?

¹⁸ A Biblia a mesaod el kirel sel ulebongel el mekemad el mo er ngii er a delongelel a Rengedel a Dios me  a kabelment er tia el beluulechad. El uai tiang, ngolisechakl el kmo, sel bo el keed a ulebongel, e a remekngit el anghel a mo omerk a blulak el mo mengeblad er a “re king er a beluulchad el rokir.” E ngera uchul? Te mo “mengideb er tir el kirel sel mekemad el mor ngii er sel klou el Sils er a Dios el Olab a Bek el Klisiich.” Me a reking er a beluulechad a mo cheldull er “sel lomekedo er ngii er a Hebru el kmo Armakedon.” (Ocholt 16:14, 16) Me ngua lemedung er a bades, tia el ulebongel el klautok er a delongelel a kabelment er a klechad me a Rengedel a Dios a okedongall el kmo ngmekemad er a Armakedon.

19, 20. Ngera uchul me a moktek er a Dios a dirkak lemeketmokl er a chutem er chelechang?

¹⁹ Ngera ngmo kutmeklii a Rengedel a Dios el oeak a Armakedon? Ka molatk er a moktek er a Dios el kirel tia el chutem. Ngmle soal a beluulechad a bo el mui er a remelemalt e cherrungel el chad el ngar er a Baradis e mesiou er Ngii. Ngera uchul me tia el tekoi a dirkak lemeketmokl er chelechang? A kot, e kid a ngar er a klengit, me kede mo smecher e mad. Engdi kede silubii er a 5 el Bliongel el kmo, a Jesus a mlad el kired me bo el sebeched el mo kiei el mo cherechar. Ke locha mo lotkii a tekoi el ngar er a Ebangkelio er a Johanes el kmo: “Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.”​—Johanes 3:16.

²⁰ A dirrek el ta er a uchul a kmo, a rebetok el chad a meruul a mekngit. Te omulak, e mengeblad, e ngar er a deleboes el omeruul. Ngdiak el sorir el meruul a soal a Dios, me te mo nguemed sel lebo er ngii  a mekemedil a Dios el Armakedon. (Monguiu er a Psalm 37:10.) A kabelment el mengedereder er chelechang a dirrek el diak lolisiich er a rechad el mo meruul a soal a Dios. Ngbetok el kabelment a mechitechut, e mekngit el mengedereder er a rechad, e meruul a betok el chelebirukel. A Biblia a bleketakl el kmo: “A re bebil er a re chad er tial beluulchad a ngar ngii a klisichir, e a re bebil a mo chuarm er tir.”​—Olisechakl 8:9.

21. Ngmekerang a Renged e mo kutmeklii a moktek er a Dios er tia el chutem?

²¹ Uriul er a Armakedon, e a rechad a mo ngar cheungel a di chimo el kabelment, el ngii a Rengedel a Dios. Tia el Renged a mo kutmeklii a moktek er a Dios e mo uchul a betok el klengeltengat. El di uai tiang, ngmo choridii a Satan me a remekngit el anghel er ngii. (Ocholt 20:1-3) A klisichel a tengetengel a Jesus a mo motaut, me a reblak a rengrir el chad a dikea lluut el mo smecher e mad. Ngbai mo sebechir el kiei el mo cherechar. (Monguiu er a Ocholt 22:1-3.) A beluulechad a mo baradis. Seikid, e a Renged a mo kutmeklii a moktek er a Dios er tia el chutem e chemedolii a ngklel a Dios. Tiang ngera belkul? Ngbelkul a kmo, ngar er cheungel a Rengedel a Dios, e a rokui el chad a mo mengebkall er a ngklel a Jehovah.

22. Ngera me kede medengei el kmo, a Rengedel a Dios a dimlak el mei er a dirk lengar er a chutem a Jesus me a telkib el taem er a uriul er a lebekiis er a kodall?

²² A Jesus er a ledu er a rulebengkel el mo meluluuch el kmo, “A Rengedem le mei” e ngbleketakl el  kmo, a Renged a dirkak el mei er seikid el taem. Me ngmlei er sera lebo er a eanged? Ngdiak, e le Petrus me a Paulus a dul millekoi el kmo, a uriul er a lemokiis a Jesus, e a ulaoch el ngar er a Psalm 110:1 a mlotaut er ngii. Ngar tia el ulaoch e ngmelekoi el kmo: “A RUBAK a dilu er a rubak er ngak el king el kmo, ‘Bo mdengchokl er a kadekmek, el dimerkmo kngititerir a re cherrouem el mor eungel ochim.’” (Rellir 2:32-35; Hebru 10:12, 13) Me ngmle kirel el mengiil er a uchei er a bo lomuchel el mengedereder.

23. (a) Ngoingerang e a Rengedel a Dios a mlo omuchel el mengedereder? (b) Ngera mo soadel er a ongingil el bliongel?

²³ Ngmengiil el mo oingerang? Ngar er a chelsel aike el rak er a 1800 me a 1900, e a remesuub er a Biblia a mlo mtebengii el kmo tia el taem er a omengiil a mo merek er a rak er a 1914. (Kirel tia el rak, e momes er a suobel el ngar er a Bebil er a Omesodel el dai er ngii a kmo, “1914​—A Kmal Klou a Ultutelel el Rak er a Ulaoch er a Biblia.”) Me a tekoi el dilubech er a rak er a 1914 a meketeklii el kmo, ngmle melemalt a klemedengei er tir. A otutel a ulaoch er a Biblia a ochotii el kmo, sera 1914 e a Kristus a mlo King me a Rengedel a Dios a ulemuchel el mengedereder el ngar er a eanged. E seikid, e kede  mlo kiei er sel ‘kedeb el taem’ el dirk medechel el kirel a Satan. (Ocholt 12:12; Psalm 110:2) Ngdirrek el ulterekokl a rengud el melekoi el kmo, ngdi kmedung e a Rengedel a Dios a mo oltaut a moktek er a Dios er tia el chutem. Tia ngdiak el kmal meang el chais? Ke oumerang er ngii? A ongingil el bliongel a mo ngosukau el mo mesa el kmo, a Biblia a mera el olisechakl aika el tekoi.